30 C
Phnom Penh

ការព្រាងផែនទី​ស្នើសុំ​ដាក់់​ព្រៃឡង់​ជាតំបន់​ការពារថយមក​ត្រឹម ៤៨០.០០០​ហិកតា

ដោយ ឌឹ ខេមបូឌា ដេលី

បទវិភាគ

មន្ត្រី​រដ្ឋបាល​ព្រៃ​ឈើ​បាននិយាយ​ថា​ សំណើរ​របស់​រដ្ឋបាល​ព្រៃឈើក្នុង​ការ​ដាក់​បញ្ចូល​ព្រៃឡង់​​ ដែលជា​ព្រៃ​ចុង​ក្រោយ​ឲ្យ​​​ជា​តំបន់ការពារត្រូវបាន​កាត់បន្ថយ​ជាង​២០​ភាគរយដោយសល់​ត្រឹមតែ​៤៨០.០០០​​​ហិកតា​​​​ប៉ុណ្ណេាះ។

ក្នុង​ពេលបើក​សិក្ខាសាលា​ពិគ្រោះ​យោបល់​នៅទីក្រុង​ភ្នំពេញកាលពី​ខែមុនរដ្ឋបាលព្រៃឈើនិងអ្នកភូមិបានពិភាក្សា​គ្នាសុំរក្សាទុកព្រៃ ឡង់ទំហំ ៦១៥.០០០​ហិកតា​ជាតំបន់ការពារក៏ប៉ុន្តែកាល​​​ពីម្សិល​​​មិញ​ លោកធនសារ៉ាត់អ្នកនាំពាក្យ​រដ្ឋបាល​ព្រៃឈើ​បាន​មានប្រសាសន៍ថាឥឡូវនេះ​គេបាន​កាត់​តំបន់​ព្រៃឡង់​មកនៅ​ត្រឹមតែ​ចំនួន៤៨៤.៨៧២​ហិកតា​ប៉ុណ្ណេាះ​ដើម្បី​​​ដាក់​ជាតំបន់​ការពារ​ ដែលស្ថិតនៅ​ជាប់​ខេត្តក្រចេះកំពង់ធំព្រះវិហារនិងស្ទឹងត្រែង។

លោកសារ៉ាត់​ បានមានប្រសាសន៍ថារដ្ឋបាល​ព្រៃឈើ​បានរៀប​ចំសំណើ​រួច​​​រាល់​​​ហើយដោយគ្រោងបញ្ជូន​សំណើនេះ​ទៅ​​​ក្រសួងកសិកម្ម​ក្នុង​ពេលឆាប់ៗ​ខាងមុខ​នេះប​ន្ទាប់មកបញ្ជូនទៅទីស្តីការគណៈរដ្ឋមន្ត្រីនិងក្រសួងពាក់ព័ន្ធ​ផ្សេងៗទៀតដើម្បី​​​ធ្វើ​​​ការ​​​​​​អនុម័ត។

លោកសារ៉ាត់បាន​បន្ថែមទៀតថាកាល​​​ពី​​​ម្សិល​​​មិញ ​រដ្ឋបាល​ព្រៃឈើ​បាន​ទទួល​ការ​​​ស្នើសុំរបស់អ្នកភូមិ​ អំពីការព្រាង​ផែនទី​ការពារ​ព្រៃឡង់​ហើយ។

លោក​ ស៊ីនសានអ្នកតំណាងឲ្យបណ្តាញ​​​ប្រជាជនការពារព្រៃឡង់បាននិយាយថាអ្នកភូមិ​ស្វាគមន៍​នឹង​ការព្រាង​ផែនទី​របស់​រដ្ឋបាលព្រៃឈើប៉ុន្តែ​លោក​បាន​បន្ថែមថាពួកអ្នកភូមិនៅ​មានការ​ព្រួយបារម្ភពីព្រោះ “តំបន់ព្រៃ​សំខាន់ៗ​ត្រូវបាន​គេ​​​កាត់​ចេញ​ពីផែនទី​ព្រាងផ្ទុយទៅវិញ​តំបន់​ដីស្រែ​​​ចម្ការ​របស់អ្នក​ភូមិ​បែរជា​ត្រូវ​គេដាក់​បញ្ចូល​ក្នុង​ផែនទីរបស់តំបន់ការពារ​ទៅ​​​វិញ”។

លោក ​សាន ​បានបន្ថែមទៀតថា​ សមាជិក​​​​ក្រុម​​​អ្នកភូមិ​ ដែលមាន​ភូមិជាប់​តំបន់​ក្នុង​​​ខេត្ត​​​ទាំងបួន​​ កំពុងតែ​ស្វែងរក​ជួប​ជាមួយ​អង្គការ​ក្រៅ​រដ្ឋាភិបាល​នៅរាជធានី​ភ្នំពេញ ​ដើម្បីសុំ​ឲ្យជួយគូរផែនទី​ ដោយប្រើប្រាស់​បច្ចេកវិទ្យា​ទំនើបជីភីអេស(GPS) ដើម្បី​កំណត់ដែន​ការពារ​ឲ្យបាន​ត្រឹមត្រូវ។

លោកសានបាន​លើកឡើង​ទៀតថា “យើង​​​នឹងនាំយកការយល់ឃើញរបស់​​​យើង​ទៅរដ្ឋបាលព្រៃឈើ ​ដើម្បី​ពិនិត្យនិងប្រៀប​​​ធៀប​ជាមួយ​​ផែនទីព្រាង​របស់​រដ្ឋបាល​ព្រៃឈើ”។

លោកឈុតវុទ្ធីប្រធាន​អង្គការ​ការពារ​ធនធាន​ធម្មជាតិ​ ដែលបាន​ជួយ​កំណត់​ដែន​​​ការពារ​បាន​និយាយថា​​ អ្នកភូមិ​ប្រញាប់​ជំទាស់​​​​ពេកពីព្រោះ​រដ្ឋាភិបាល​មិនទាន់បាន​បញ្ចប់​ផែនការ​របស់ខ្លួន​នៅឡើយ​ទេ។​

ព្រៃឡង់​ជាតំបន់ព្រៃ​បៃតង​ពិសេសមួយ​ ដែលមាន​ផ្ទៃដីទំនាបទំហំ៦៥០.០០០​​​ហិកតា ​​​និងមាន​តំបន់​ព្រៃស្នូល​​មិនទាន់​​​ប៉ះ​​​ពាល់​ទំហំ១៣៥.០០០ហិកតា ​ហើយ​ធនធាន​ព្រៃឡង់​ផ្តល់នូវ​ចំណូល​ដល់គ្រួសារ​ជនជាតិ​ដើម​កួយរាប់ម៉ឺន​គ្រួសារ។

កាលពីឆ្នាំទៅ ក្រុមអង្គការ​សង្គមស៊ីវិលបានបើកយុទ្ធនាការ​ការពារ​ព្រៃឡង់ ពីព្រោះវាកំពុងតែ​ទទួលរងនូវ​ការកាប់​បំផ្លាញដើម្បីធ្វើកសិកម្មជីករករ៉ែនិងការ កាប់ឈើ​ដោយ​ខុសច្បាប់។​ នៅសប្តាហ៍​ក្រោយ​ក្រុមអ្នកការពារ​ព្រៃឡង់នឹងធ្វើការដើរ​ល្បាត​រយៈពេល១៥ថ្ងៃ ដើម្បីបណ្តេញ​អ្នកកាប់​ឈើ​ខុសច្បាប់។

លោក មា៉ាឃឹស ហាតកេ (Marcus Hardtke)   អ្នកជំនាញផ្នែក​បរិស្ថាន ​ឯករាជ្យ ​បាន​លើក​ឡើងថា ការព្រាងផែនទី​តំបន់ការពារនេះ​បានបញ្ចូល​នូវតំបន់​សំខាន់ៗ​រួចហើយ។​លោក​បានបន្ថែមថា“ជាសរុប​ ផែនទីព្រាងថ្មីៗនេះគឺសម្រាប់ការពារ​តំបន់​ព្រៃក្រាស់”។

លោកបានថ្លែងថារឿង​ដែល​​​គួ​ឲ្យព្រួយ​​​បារម្ភ​មួយទៀត​នោះគឺ​ការផ្តល់​ដីសម្បទាន​​​រុករករ៉ែដែលគ្របដណ្តប់​មួយ​​​ផ្នែកធំលើ​​​តំបន់ព្រាងទុកការពារនេះ​។លោក​​​បាន​​​បន្ថែមថា“បញ្ហានេះ​ ជារឿង​គួរ​​​ឲ្យ​​​បារម្ភនៅ​​​​​​ពេល​ក្រុម​មន្ត្រី​ពិភាក្សា​នៅ​​​ទីស្តីការ​គណៈ​​​រដ្ឋមន្ត្រី”។លោកបន្តទៀតថាដែន​តំបន់​ការពារ​ព្រៃឡង់​នៅមិនទាន់​ច្បាស់លាស់​នៅឡើយទេនៅពេល​មានការ​​​ជជែកគ្នាក្នុងជួរ​រដ្ឋាភិបាល ​វានឹងមាន​ការ​​​ផ្លាស់ប្តូរ៕

ប្រែសម្រួល​ដោយហួងកុកទៀន

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស