ព្រះរាជអាជ្ញាអមសាលាដំបូងខេត្តបានមានប្រសាសន៍ថា សាលាដំបូងខេត្តស្វាយរៀង កាលពីម្សិលមិញបានសាកសួរកម្មការិនីរោងចក្រកាត់ដេរពីរនាក់ ចំណោមកម្មការិនីបីនាក់ ដែលត្រូវបានបាញ់ប្រហារ អំឡុងការតវ៉ាមួយនៅតំបន់សេដ្ឋកិច្ចពិសេស ក្នុងក្រុងបាវិត កាលពីខែកុម្ភៈ។
នាងកែវនា អាយុ១៨ឆ្នាំ នាងប៊ុនចិន្តាអាយុ២១ឆ្នាំ និងនាង នុត សុខន អាយុ២៣ឆ្នាំ បានប្តឹងលោក ឈូកបណ្ឌិតអតីតអភិបាលក្រុងបាវិត ថាជាជនសង្ស័យតែម្នាក់គត់ទទួលខុសត្រូវក្នុងការបាញ់ប្រហារកាលពីថ្ងៃទី២០ខែកុម្ភៈនៅតំបន់សេដ្ឋកិច្ចពិសេសម៉ាន់ហាតតាន់ ដោយទាមទារជំងឺចិត្តពី៤០.០០០ដុល្លារ ទៅ៥០.០០០ដុល្លារ។
លោកហ៊ឹងប៊ុនជា ព្រះរាជអាជ្ញាអមសាលាដំបូងខេត្តកាលពីម្សិលមិញ បានបដិសេធមិនធ្វើអត្ថាធិប្បាយអំពីលទ្ធផលនៃការសាកសួរទេប៉ុន្តែបានលើកឡើងថា នាងសុខន ធ្លាក់ខ្លួនឈឺពេលកំពុងសម្ភាសនាង ហើយត្រូវបានបញ្ជូនទៅគ្លីនិកឯកជន។ លោកប៊ុនជា បានមានប្រសាសន៍បន្ថែមថា តុលាការនៅមិនទាន់ចេញដីកាចាប់ខ្លួនលោក បណ្ឌិតនៅឡើយទេ។
លោកបានមានប្រសាសន៍ថា“យើងមិនទាន់បានបញ្ជូនសំណុំរឿងនេះទៅចៅក្រមស៊ើបសួរនៅឡើយទេ ដើម្បីចេញដីកាចាប់ខ្លួនជនសង្ស័យពីព្រោះខ្ញុំមិនទាន់បញ្ចប់ការសាកសួរជនរងគ្រោះចុងក្រោយនៅឡើយទេ”។
នាងចិន្តា ដែលទទួលរងគ្រោះធ្ងន់ធ្ងរបានមានប្រសាសន៍ថានាងខ្លាចណាស់មិនហ៊ានអត្ថាធិប្បាយអំពីការផ្តល់សក្ខីកម្មរបស់នាងបានទេ ដោយអះអាងថា នាងនិងក្រុមគ្រួសាររបស់នាងបានទទួលការគំរាមតាមទូរស័ព្ទនាពេលថ្មីៗនេះ។ នាងបាននិយាយថា“ ខ្ញុំមិនអាចនិយាយប្រាប់អ្នកយកព័ត៌មានបានទេពីព្រោះមានការគំរាមតាមទូរស័ព្ទដល់សុវត្ថិភាពគ្រួសាររបស់ខ្ញុំ”។
លោកមឿនតុលា ប្រធានផ្នែកគម្រោងការងារ របស់មជ្ឈមណ្ឌលអប់រំច្បាប់សម្រាប់សហគមន៍ ដែលកំពុងផ្តល់ជំនួយខាងផ្លូវច្បាប់ដល់ជនរងគ្រោះ បានមានប្រសាសន៍ថាគ្រួសាររបស់នាង ចិន្តា បានទទួលទូរស័ព្ទពីបុរសម្នាក់ ដោយបានសួរអំពីរឿងរា៉ាវរបស់នាង ដែលបានកើតឡើងនៅថ្ងៃបាញ់ប្រហារនោះ។នាងចិន្តាបានអះអាងថា នាងកំពុងដើរទៅបន្ទប់ទឹក ស្រាប់តែមានគេបាញ់នាង ប៉ុន្តែបុរសដែលគេមិនស្គាល់អត្តសញ្ញាណបានប្រាប់នាងថានាងពិតជាបានចូលរួមក្នុងការតវ៉ា ហើយចោលដុំថ្ម។
លោក តុលា បានមានប្រសាសន៍ថា “បុរស រូបនោះមិនប្រាប់ឈ្មោះរបស់ខ្លួនទេគ្រាន់តែប្រាប់នាងថា ខ្លួនធ្វើការជាអ្នកយកព័ត៌មាន ប៉ុន្តែមិននិយាយថាមកពីកាសែតណាមួយនោះទេ”។ លោកបានមានប្រសាសន៍បន្ថែមថា អ្នកទូរស័ព្ទអាថ៌កំបាំងនោះក៏បាននិយាយដែរថា ខ្លួននៅក្នុងក្រុងបាវិត។
លោក អំសំអាត អ្នកគ្រប់គ្រងបច្ចេកទេសប្រចាំអង្គការសិទ្ធិមនុស្សលីកាដូបានមានប្រសាសន៍ថាលោកបារម្ភអំពីសុវត្ថិភាពរបស់ជនរងគ្រោះ ពីព្រោះពួកគេត្រូវបានពួកមន្ត្រីទៅសួរសុខទុក្ខ ដោយឧបត្ថម្ភជាប្រាក់ឲ្យពួកគេដើម្បីជាថ្នូរឈប់ប្តឹងលោក បណ្ឌិត តទៅទៀត។ លោកបានមានប្រសាសន៍ថា“ យើងស្នើឲ្យតុលាការចាត់វិធានការការពារសុវត្ថិភាពដល់ជនរងគ្រោះ និងស្វែងរកយុត្តិធម៌ឲ្យជនរងគ្រោះដោយចាប់ខ្លួនជនសង្ស័យមកផ្តន្ទាទោស”៕
ប្រែសម្រួលដោយចេវប៊ុននី