30 C
Phnom Penh

តុលាការ​អាមេរិក​ នឹង​បើក​សវនាការលើរឿងក្ដី​រូប​ចម្លាក់​ ខ្មែរ​ ​មាន​អាយុកាល១.០០០ឆ្នាំ

ដោយ ឌឹ ខេមបូឌា ដេលី

បទវិភាគ

តុលាការ​អាមេរិក​ នឹង​បើក​សវនាការលើរឿងក្ដី​រូប​ចម្លាក់​ខ្មែរ​ ​មាន​អាយុកាល១.០០០ឆ្នាំដើម្បី​រឹប​អូស​​រូប​ចម្លាក់​នេះ​ ហើយ​​ថា ក្រ​សួង​​សន្តិ​សុខ​ជាតិ​អាមេរិក ​ក៏​​​បាន​ត្រៀម​ខ្លួន​រឹប​អូស​វត្ថុបុរាណ​នេះដែរ។

ទោះ​ជា​យ៉ាង​ណា ​ក្រុម​ហ៊ុន​សុថេប៊ី ​​​បាន​​វាយ​បក​វិញ ដោយ​និយាយ​ថា រូប​ចម្លាក់​នេះ​ត្រូវ​បាន​នាំ​ចូល​​សហ​រដ្ឋ​អាមេរិក ដោយ​ស្រប​​ច្បាប់​ ហើយ​បាន​ប្តេជ្ញា​​​​ការ​ពារ​សិទ្ធិ​របស់​ខ្លួន​​​​​នៅ​ក្នុង​តុលា​ការ។

កាល​ពី​ថ្ងៃ​​ព្រ​ហស្បតិ៍ ចៅ​ក្រម​សហ​ព័ន្ធ​​​អាមេរិកមួយរូប​ បាន​​​អនុញ្ញាត​ឲ្យ​ក្រុម​ហ៊ុនសុ​ថេប៊ី ​រក្សា​ទុក​រូប​ចម្លាក់​នេះ​​ជា​បណ្តោះ​អាសន្ន​​រហូត​ដល់​ពេល​បើក​សវ​នាការ​​​ ​នៅ​ថ្ងៃ​ទី​១២​ខែមេសា​​ខាង​មុខ​នេះ។

​កាសែត ឌឹ ញូវយ៉ក ​ថែមស៍ ​បាន​ធ្វើ​សេច​ក្តី​រាយ​ការណ៍ថា ចៅ​ក្រម ចច ប៊ី ដា​នីញែលស៍ ​​បាន​បង្គាប់​ឲ្យ​ក្រុម​ហ៊ុន​សុថេ​ប៊ី ​ផ្អាក​ដំណើរ​​ការ​លក់​ដេញ​​ថ្លៃ​រូបចម្លាក់​នេះ​សិន​​ និង​អនុញ្ញាត​ឲ្យ​ក្រសួង​​សន្តិ​សុខ​ជាតិ​អាមេរិក ​​​​ធ្វើ​ការត្រួត​ពិ​និត្យ​​។

លោក​ស្រី មីឆេល បេនណេត ​អ្នក​នាំ​ពាក្យ​​របស់ស្ថាន​ទូត​​សហ​រដ្ឋ​អាមេរិក ​ប្រ​ចាំ​រាជ​ធានី​ភ្នំ​ពេញ​​ បាន​មាន​ប្រ​សាស​ន៍​កាល​ពី​ថ្ងៃ​សុក្រ​ថា  “ កាល​ពី​ថ្ងៃ​ទី​៥​ខែ​មេសា​ឆ្នាំ​២០១២​ ចៅ​ក្រម​​តុលាការ​​សង្កាត់​ភាគ​ខាង​ត្បូង​​ក្រុង​ញូវយ៉ក​​ ​​បាន​​ចេញ​ដី​កា​​​មួយ​ បង្គាប់​ឲ្យ​ក្រុម​ហ៊ុនសុ​ថេប៊ី ​ផ្អាក​​សកម្ម​ភាព​លក់​ ឬ​​យក​រូប​ចម្លាក់​នេះ​ទៅ​​​​រក្សា​ទុក​​នៅ​​កន្លែង​ផ្សេង ​ហើយ​បាន​កំណត់​បើក​សវនាការ​​​នៅ​ថ្ងៃទី​១២​ខែ​មេសា​ ឆ្នាំ​២០១២ ​ខាង​មុខ​នេះ​​​សម្រាប់​គ្រប់​​ភាគី​​ដែល​មាន​ចំណាប់​អារម្មណ៍”។

ក្រុមហ៊ុន​សុថេប៊ី ត្រូវ​បាន​ស្នើ​សុំ​ឲ្យ​ជួយ​ដាក់​លក់​វត្ថុបុរាណ​នេះ ដោយ​ម្ចាស់​វត្ថុ​បុរាណ​នេះ គឺស្រ្តី​អ្នក​ប្រមូល​ទិញ​វត្ថុ​បុរាណ​មា្នក់ជា​ជនជាតិ​បែលហ្ស៊ិក ដែល​ឈ្មោះ​របស់​

គាត់​ត្រូវបាន​ការពារ​ដោយ​ក្រុមហ៊ុន​ដាក់​ដេញ​ថ្លៃ។ ក្រុមហ៊ុន​ដាក់​ដេញ​ថ្លៃ​បាន​កំណត់​តម្លៃ​វត្ថុបុរាណ​នេះ​ក្នុង​តម្លៃ​ចន្លោះ​ពី ពីរ​លាន​ដុល្លារ ទៅ​បី​លាន​ដុល្លារ​។

ក្រោយ​ពី​ក្រុមហ៊ុន​សុថេប៊ី​បាន​ប្រកាស​ពីការលក់​​ដេញថ្លៃ​វត្ថុ​បុរាណ​នេះ​​កាលពី​ឆ្នាំមុន​ រដ្ឋា​ភិបាល​កម្ពុជា​​មាន​ប្រតិកម្ម​តែម្តង។

លោកស្រី បេនណេត បាន​បន្ត​ថា​ “ រដ្ឋា​ភិបាល​​កម្ពុជា​បានបញ្ជូន​​សំណើ​មួយ​ទៅ​ស្ថាន​ទូត​សហរដ្ឋ​អាមេរិក​ប្រចាំ​នៅ​កម្ពុជា​ ដើម្បី​ស្នើ​ឲ្យ​ជួយ​​បញ្ជូន​វត្ថុបុរាណ​នេះ​ត្រឡប់​មក​ប្រទេស​កម្ពុជា​វិញ។​ ស្ថាន​ទូត​សហរដ្ឋ​អាមេរិក

បាន​បញ្ជូន​សំណើ​នេះ​បន្ត​ទៅ​ការិយាល័យ​ពង្រឹង​ច្បាប់​គយ និងអន្តោ​ប្រវេសន៍ ​របស់​អាមេរិក​ នៅបុរី​​ញូវ​យ៉ក​”។

លោក ផៃ ស៊ីផាន អ្នក​នាំ​ពាក្យ​ ទីស្តី​ការ​គណៈ​រដ្ឋ​មន្ត្រី​ បាន​មាន​ប្រសាសន៍​ថា ការ​ទាម​ទារ​យក​វត្ថុ​បុរាណនេះ​មកវិញ​ មិន​ជា​បញ្ហា​លុយ​កាក់​នោះទេ។​

លោក បាន​មាន​ប្រសាសន៍​កាលពី​ថ្ងៃ​សុក្រ​​ថា​ “ វាមិនមែន​ដោយ​សារតែ​តម្លៃ​ជា​ទឹក​ប្រាក់​​នោះ​ទេ​ ប៉ុន្តែ​ដោយ​សារតែ​តម្លៃ​កេរ​ដំណែលនិង​តម្លៃ​សម្រាប់​មនុស្ស​ជាតិ​​របស់វា​ទៅវិញ​ទេ”។​

​ឥឡូវនេះ​លោកឧបនាយករដ្ឋមន្ត្រី សុខ​ អាន ដែល​ជា​ប្រធាន​គណៈកម្មាធិការ​ជាតិ​ទទួល​បន្ទុក​យូណេស្កូ កម្ពុជា​និង​ជា​ប្រធាន​គណៈ​កម្មាធិការ​សម្រប​សម្រួល​អង្គរ​ ដែល​គ្រប់គ្រងឧទ្យានបុរាណវត្ថុអង្គរកំពុងតែ​​ដោះ​ស្រាយ​បញ្ហានេះ ។

ក្រោយ​ពី​មាន​ការ​ផ្ញើ​អីុម៉េល​ឆ្លើយ​ឆ្លង​រវាងអ្នក​ជំនាញ​ខាងវត្ថុបុរាណខ្មែរ និងមន្រ្តី​ក្រុមហ៊ុនសុថេប៊ី លោក បារ៉ារ៉ា មេធាវីនៅ​សង្កាត់​ភាគខាង​ត្បូង​បុរីញូវ​យ៉ក ដែល​បាន​ដាក់​ពាក្យ​បណ្តឹង​រដ្ឋ​ប្ប​វេណី​ កាលពីថ្ងៃពុធ ប្តឹង​ក្រុមហ៊ុន​សុថេប៊ី​ បាន​ចោទ​ប្រកាន់​ថា ក្រុមហ៊ុន​ដាក់​ដេញ​ថ្លៃ​ បាន​ដឹង​ថា​វត្ថុ​បុរាណ​នេះ​ត្រូវ​បាន​លួច​។

នៅ​ក្នុង​កិច្ច​សម្ភាសជាមួយ​ កាសែត ឌឹ ញូវយ៉ក ថែមស៍ អ្នកស្រី អេម៉ា ប័ងឃើ ដែល​ជាអ្នក​ចង​ក្រង​ឯកសារ​ជាច្រើន​អំពី​ចម្លាក់​វត្ថុបុរាណ​ធ្វើ​ពី​សំរិទ្ធ​ និង​មាស​នៅ​សម័យ​អង្គរ​ បានអះអាងថា គាត់គឺ​ជា​អ្នក​ជំនាញខាង​​វត្ថុ​បុរាណ​ ដែល​បាន​ផ្ញើសារ​តាម​អីុម៉េល​នោះ។

នៅក្នុងសារមួយ អ្នកស្រីប័ងឃើ បាន​ប្រាប់​ក្រុម​ហ៊ុន​សុថេប៊ីថា អាជ្ញាធរ​កម្ពុជា ជឿជាក់​ថាវត្ថុ​បុរាណ​នេះ​ត្រូវបាន​គេលួច។

នៅ​ពេល​ទាក់​ទង​តាម​អីុម៉េល​ កាល​ពី​ថ្ងៃសុក្រ អ្នកស្រី ប័ងឃើ​ បាន​មាន​ប្រសាសន៍​ថា គាត់​ទើបតែ​ចេញ​ពីការ​វះកាត់​ដ៏​សំខាន់​មួយ​ ហើយ​មិន​អាច​​ធ្វើ​អត្ថា​ធិប្បាយ​ពីបញ្ហា​នេះ​បានទេ៕

ប្រែសម្រួលដោយ តែម​ សុខុម 

                                             និង ស៊ា ​ស៊ុយឈាង            

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស