កាលពីម្សិលមិញ អ្នកភូមិប្រមាណ១៥០គ្រួសារដែលពាក់ព័ន្ធនៅក្នុងជម្លោះដីធ្លីជាយូរមកហើយជាមួយសេដ្ឋី លី យ៉ុង ផាត់ សមាជិកព្រឹទ្ធសភាមកពីគណបក្សប្រជាជនកម្ពុជា បាននាំគា្នតវ៉ាដោយសន្តិវិធីនៅខាងក្រៅសាលាដំបូងខេត្តកំពង់ស្ពឺ នៅពេលដែលអ្នកភូមិចំនួនប្រាំនាក់កំពុងត្រូវបានសាកសួរជុំវិញការចោទប្រកាន់ថា ពួកគាត់បានកាន់កាប់ដីរបស់សមាជិកព្រឹទ្ធសភារូបនេះដោយខុសច្បាប់។
អ្នកភូមិមកពី ឃុំអមលាំងស្រុកថ្ពងកំពុងតែតវ៉ាទាមទារសិទ្ធិរស់នៅលើដីទំហំ៩.០០០ហិកតា ដែលត្រូវបានផ្តល់ជាដីសម្បទានទៅឲ្យក្រុមហ៊ុនភ្នំពេញស្ករសរបស់លោក លីយ៉ុង ផាត់ កាលពីខែកុម្ភៈឆ្នាំ២០១០។ លោក ផលវណ្ណៈអ្នកតំណាងឲ្យអ្នកភូមិបាននិយាយថា “អ្នកភូមិរបស់យើងបានរស់នៅលើដីនេះអស់រយៈពេល១០ឆ្នាំមកហើយហេតុអ្វីបានជាគេព្យាយាមយកដីអ្នកភូមិបែបនេះទៅវិញ”?
លោកបានបន្តថា “ ក្រុមហ៊ុនជាច្រើនប្រើប្រព័ន្ធតុលាការដើម្បីយកដីអ្នកភូមិ។ខ្ញុំគិតថានេះជាវិធីគំរាមកំហែងអ្នកភូមិទោះបីជាអ្នកភូមិមិនត្រូវបានឃុំខ្លួនក៏ដោយ”។ លោករ័ត្នថាវីអ្នកឃ្លាំមើលប្រចំាខេត្តរបស់អង្គការ អាដហុក បានមានប្រសាសន៍ថា ការសាកសួរនេះបណ្តាលមកពីពាក្យបណ្តឹងរបស់លោកសុខរេនប្រធានមណ្ឌលសុខភាពអន្លង់ជ្រៃនៅក្នុងឃុំអមលាំង ហើយលោកថាវីបានអះអាងថា ប្រធានមណ្ឌលសុខភាពរូបនេះធ្វើជាអ្នកតំណាងឲ្យក្រុមហ៊ុនរបស់លោក លី យ៉ុង ផាត់។
លោកថាវីបានបន្តថា “ យើងមិនដឹងថាតើសាលាដំបូងសម្រេចចោទប្រកាន់ពួកគេឬក៏អត់ទេពីព្រោះ ព្រះរាជអាជ្ញារងអមសាលាដំបូងនេះមិនបានប្រាប់យើងនោះទេ”។ លោកចាន់សុវ៉េតអនុប្រធានផ្នែកអង្កេតរបស់អង្គការអាដហុក បានមានប្រសាសន៍ថា អ្នកភូមិទាំងប្រាំនាក់នោះត្រូវបានដោះលែងបន្ទាប់ពីត្រូវបានសាកសួររួច ប៉ុន្តែ “ ព្រះរាជអាជ្ញារូបនេះបានប្រាប់ពួកគាត់ថា ពួកគាត់គួរតែរុះរើផ្ទះរបស់ពួកគាត់ចេញពីដីមានជម្លោះនេះ”៕
ប្រែម្រួលដោយ ស៊ា ស៊ុយឈាង