នាយកប្រតិបត្តិ របស់ធនាគារអេស៊ីលីដា បានមានប្រសាសន៍ កាលពីម្សិលមិញថា ធនាគារអេស៊ីលីដា ដែលជាធនាគារធំបំផុតក្នុងប្រទេសកម្ពុជា កំពុងតែគិតចង់ហក់ចូលក្នុងទីផ្សារសេដ្ឋកិច្ចក្នុងប្រទេសភូមា ដោយមានផែនការបើកសាខាមីក្រូហិរញ្ញវត្ថុបីកន្លែងក្នុងប្រទេសនេះនៅត្រឹមខែមករា ឆ្នាំក្រោយ។
លោក អិុន ចាន់នី នាយកប្រតិបត្តិរបស់ធនាគារនេះ បានមានប្រសាសន៍ថា លោកបានពិភាក្សាអំពីផែនការនេះ កាលពីថ្ងៃច័ន្ទ ជាមួយគណ:ប្រតិភូមកបំពេញទស្សនកិច្ចមួយក្រុមរបស់ភូមា ដឹកនាំដោយលោក ណាយអៃ (Nay Aye) ទេសាភិបាលរង នៃធនាគារជាតិរបស់ភូមា ដែលបានមកសិក្សាអំពីរបៀបអភិវឌ្ឍវិស័យធនាគារក្នុងប្រទេសកម្ពុជា។
ដំណើរទស្សនកិច្ចនេះ កើតមានឡើងបន្ទាប់ពីធនាគារកណ្តាល នៃប្រទេសភូមាកាលពីដើមខែនេះ បានសម្រេចឲ្យមានការដូរប្រាក់ គីយ៉ាត (kyat) ដែលជារូបិយប័ណ្ណជាតិរបស់ខ្លួនយកប្រាក់ដុល្លារ។ ការបោះឆ្នោតបំពេញអាសន: ក៏ត្រូវបានធ្វើឡើងដែរ នៅក្នុងប្រទេសនេះ កាលពីថ្ងៃទី១ ខែមេសា ដោយអំឡុងពេលនោះ លោកស្រី អ៊ុង សានស៊ូ ជី និងគណបក្សសម្ពន្ធជាតិ ដើម្បីលទ្ធិប្រជាធិបតេយ្យរបស់លោកស្រី បានឈ្នះអាសន:សភា យ៉ាងច្រើនលើសលប់។
ចាប់តាំងពីលោកប្រធានាធិបតី ថេន សេនបានជាប់ឆ្នោត កាលពីឆ្នាំមុនមក ប្រទេសភូមាបាននិងកំពុងព្យាយាមជាខ្លាំង ដើម្បីទាក់ទាញវិនិយោគិនបរទេស។ធនាគារអេស៊ីលីដា គឺជាក្រុមហ៊ុនដ៏ធំដំបូងគេក្នុងប្រទេសកម្ពុជា ដែលបានប្រកាសពីការចូលទៅដាក់ទុនវិនិយោគនៅក្នុងប្រទេសនេះ។
លោក អិុន ចាន់នី បានលើកឡើងពីមូលហេតុ ដែលនាំឲ្យធនាគារអេស៊ីលីដា មានបំណងចង់ឈានជើងចូលទៅវិនិយោគក្នុងប្រទេសភូមាថា “ ទីផ្សារក្នុងប្រទេសភូមា គឺធំជាងនៅទីនេះបួនដង ហើយស្ថាប័នមីក្រូហិរញ្ញវត្ថុ មានតិចតួចណាស់ ហើយភាគច្រើនជារបស់អង្គការក្រៅរដ្ឋាភិបាល”។
ទោះជាយ៉ាងណា លោក អិុន ចាន់នី បានមានប្រសាសន៍ថា ប្រទេសនេះត្រូវអនុម័តច្បាប់ជាច្រើនទៀត មុនពេលវិនិយោគិនបរទេស ដែលមានចំណាប់អារម្មណ៍លើវិស័យធនាគារពាណិជ្ជកម្ម អាចចាប់ផ្តើមរកស៊ីបាន។
លោកបានមានប្រសាសន៍ថា “ ច្បាប់នៅក្នុងប្រទេសភូមានាពេលបច្ចុប្បន្ននេះ មិនទាន់អនុញ្ញាតឲ្យមានធនាគារពាណិជ្ជកម្មនៅឡើយទេ ប៉ុន្តែបានអនុញ្ញាតឲ្យ មានធនាគារមីក្រូហិរញ្ញវត្ថុ”។ ធនាគារអេស៊ីលីដា មានបទពិសោធគ្រប់គ្រាន់ក្នុងការធ្វើប្រតិបត្តិការរកស៊ីក្នុងប្រទេសមួយ ដែលកំពុងតែងើបយ៉ាងសន្សឹមៗពីវិបតិ្តអស្ថិរភាពនយោបាយដ៏រ៉ាំរ៉ៃ។ កាលពីឆ្នាំ១៩៩៣ អេស៊ីលីដា បានចាប់ផ្តើមឲ្យខ្ចីឥណទានតូចៗ នៅក្នុងប្រទេសកម្ពុជា ក្នុងនាមជាអង្គការក្រៅរដ្ឋាភិបាល មុនពេលក្លាយខ្លួនជាធនាគារពាណិជ្ជកម្មពេញលេញមួយក្នុងឆ្នាំ២០០៣។
នៅក្នុងប្រទេសភូមា សាខាមីក្រូហិរញ្ញវត្ថុចំនួនបីកន្លែង របស់ធនាគារអេស៊ីលីដា ត្រូវបានគ្រោងបើកឲ្យប្រតិបត្តិការនៅក្នុងទីក្រុងម៉ានដាឡាយ (Mandalay) និងក្រុងយ៉ាងហ្គូន និងតំបន់អាយ៉ាយ៉ាវ៉ាឌី (Ayayarwady)។
លោក អិុន ចាន់នី បានមានប្រសាសន៍ថា ម្ចាស់ភាគហ៊ុនរបស់ធនាគារនេះអាចនឹងអនុម័តលើផែនការនេះ នៅក្នុងកិច្ចប្រជុំរបស់ក្រុមប្រឹក្សានាយកយ៉ាងយឺតបំផុតត្រឹមថ្ងៃអង្គារ ដើម្បីត្រួសត្រាយផ្លូវសម្រាប់ការដាក់ពាក្យសុំជាផ្លូវការ ទៅធនាគារកណ្តាលរបស់ប្រទេសភូមា ហើយសាខាទីមួយនឹងចាប់ បើកនៅខែមករា។ លោកបានមានប្រសាសន៍ថា “ យើងមិនឃើញមានបញ្ហាអំពីធនធានមនុស្សទេ”។
លោក អិុន ចាន់នី បានមានប្រសាសន៍ថា លោករំពឹងថា បុគ្គលិកជ្រើសចូលថ្មីនឹងត្រូវចំណាយពេលស្នាក់នៅក្នុងប្រទេសកម្ពុជាបីខែ ដើម្បីទទួលការ បណ្តុះបណ្តាលលើជំនាញផ្សេងៗ ដូចជា ការសិក្សាពីជីវប្រវត្តិរបស់អ្នកខ្ចីប្រាក់ជាដើម។
និយាយពីធនាគារពាណិជ្ជកម្មវិញ អេស៊ីលីដា និងធនាគារផ្សេងៗទៀត នឹងត្រូវរង់ចាំរហូតដល់ប្រទេសភូមាអនុម័តច្បាប់ថ្មី ដើម្បីលុបចោលការរឹតបន្តឹងលើការចូលទៅរកស៊ី របស់ពួកគេក្នុងប្រទេសនេះ។
លោកស្រី ងួន សុខា អគ្គនាយិកាធនាគារជាតិ នៃកម្ពុជា បានថ្លែងថា គណ:ប្រតិភូភូមានេះក៏បានធ្វើទស្សនកិច្ចនៅធនាគារជាតិដែរកាលពីថ្ងៃច័ន្ទ។ លោកស្រីមិនបានជួបផ្ទាល់ជាមួយក្រុមប្រតិភូនេះទេ ប៉ុន្តែបានស្វាគមន៍ ចំពោះចំណាប់អារម្មណ៍ចង់ដឹង ពីបទពិសោធណាមួយពីប្រទេសកម្ពុជា។
នៅឯកិច្ចប្រជុំកំពូលពាណិជ្ជកម្មអាស៊ាន-សហភាពអឺរ៉ុប ក្នុងរាជធានីភ្នំពេញ កាលពីសប្តាហ៍មុន លោក វីនស្តុន សេត អ៊ុង (Winston Set Aung) ទីប្រឹក្សាសេដ្ឋកិច្ចរបស់ប្រធានាធិបតីភូមា បានមានប្រសាសន៍ថា ច្បាប់ថ្មីស្តីពីការគ្រប់គ្រងធនាគារកណ្តាលរបស់ប្រទេស ត្រូវបានព្រាងរួចរាល់ហើយ៕
ប្រែសម្រួលដោយ តែម សុខុម