មានភាពអាថ៌កំបាំងជុំវិញអត្តសញ្ញាណរបស់បុរសជនជាតិខ្មែរម្នាក់ ដែលបានផ្ញើកញ្ចប់មួយចំនួនមានទម្ងន់សរុបប្រហែល៨៤គីឡូក្រាម ចេញពីរាជធានីភ្នំពេញទៅកាន់ប្រទេសអូស្ត្រាលី ហើយកញ្ចប់ទាំងនោះត្រូវគេជឿថា ជាផ្នែកមួយនៃថ្នាំញៀនហេរ៉ូអីុនមួយចំនួនធំ ដែលត្រូវបាននគរបាល និងភ្នាក់ងារគយអូស្ត្រាលីរកឃើញ កាលពីចុងសប្តាហ៍កន្លងទៅនេះ។
បុរសពីរនាក់ឈ្មោះ សុខ សម្បត្តិ អាយុ៣២ឆ្នាំ និងម្នាក់ទៀតឈ្មោះ កែវ ឆដាភា អាយុ៣៨ឆ្នាំ ត្រូវបានតុលាការចោទប្រកាន់ កាលពីថ្ងៃច័ន្ទក្នុងទីក្រុងម៉ែលប៊ើន ចំពោះការជាប់ពាក់ព័ន្ធរបស់ពួកគេទាក់ទិននឹងថ្នាំញៀនហេរ៉ូអីុនផ្ញើតាមយន្តហោះ ចេញពីប្រទេសកម្ពុជានេះ។ បុរសទាំងពីរនេះត្រូវបានចាប់ខ្លួនក្រោយការពិនិត្យកញ្ចប់ដ៏គួរឲ្យសង្ស័យចំនួនពីរ នៅឯប៉ុស្តិ៍ប្រៃសណីយ៍មួយក្នុងប្រទេសអូស្ត្រាលី ដែលបានផ្ញើចេញពីប្រទេសកម្ពុជា រហូតបានឈានទៅដល់ការលបឆ្មក់ចូលផ្ទះចំនួនពីរកន្លែង ស្ថិតក្នុងក្រុងម៉ែលប៊ើន និងទីក្រុងស៊ីដនី។ សមត្ថកិច្ចបានរកឃើញសារធាតុដ៏គួរឲ្យសង្ស័យនេះមានទម្ងន់សរុបចំនួន៦៥គីឡូក្រាម។
វិក្កយបត្ររបស់បុ៉ស្ដិ៍ប្រៃសណីយ៍កម្ពុជា ក្នុងរាជធានីភ្នំពេញបង្ហាញថា កញ្ចប់ចំនួនប្រាំ ដែលក្នុងកញ្ចប់នីមួយៗមានទម្ងន់ចន្លោះពី១៥គីឡូក្រាម ទៅ១៨គីឡូក្រាមនោះ ត្រូវបានផ្ញើចេញ កាលពីថ្ងៃទី២៩ ខែមីនា ទៅកាន់ផ្ទះពីរកន្លែង ស្ថិតក្នុងតំបន់ស្ព្រីងវ៉េល(Springvale) និងតំបន់ឃីបូរ៉ូហ្វ (Keyborough) ដែលជាតំបន់ជាយក្រុងម៉ែលប៊ើន ជាផ្ទះដែលនគរបាលអូស្ត្រាលីបានលបឆ្មក់ចូល។
ស្មៀនម្នាក់នៅប៉ុស្តិ៍ប្រៃសណីយ៍កម្ពុជាបានបញ្ជាក់ កាលពីថ្ងៃអង្គារថា ផ្អែកលើរូបថតកញ្ចប់មានលាក់សារធាតុញៀន ដែលត្រូវបានដកហូត ផ្តល់ដោយនគរបាលសហព័ន្ធអូស្ត្រាលី កញ្ចប់ដែលសមត្ថកិច្ចបានដកហូតទាំងនោះ បានផ្ញើចេញពីរាជធានីភ្នំពេញកាលពីថ្ងៃទី២៩ខែមីនា ។ យោងតាមឯកសារប្រៃសណីយ៍បានឲ្យដឹងថា អ្នកផ្ញើកញ្ចប់ទាំងនេះមានឈ្មោះ លី ប៊ុណ្ណារិទ្ធ មានអាសយដ្ឋាននៅក្នុងសង្កាត់ផ្សារដេប៉ូ១ ខណ្ឌទួលគោក រាជធានីភ្នំពេញ។
ទោះជាយ៉ាងណា ការស៊ើបរបស់អ្នកយកព័ត៌មាន បានរកឃើញថា គ្មានមនុស្សឈ្មោះ លី ប៊ុណ្ណារិទ្ធ រស់នៅក្នុងអាសយដ្ឋាននេះទេ ហើយលេខទូរស័ព្ទដៃរបស់អ្នកផ្ញើនៅក្នុងវិក្កយបត្រប្រៃសណីយ៍ផងនោះ មិនអាចទាក់ទងបានទេកាលពីថ្ងៃអង្គារ និងកាលពីម្សិលមិញ។
អាសយដ្ឋាននៅលើវិក្កយបត្រនោះ គឺធ្លាប់ជាហាងលក់ទូរស័ព្ទដៃមួយ ដែលម្ចាស់ផ្ទះ បាននិយាយថា ខ្លួនបានរស់នៅក្នុងផ្ទះនេះតាំងពីការដួលរលំរបបខ្មែរក្រហមក្នុងឆ្នាំ១៩៧៩មក។
ម្ចាស់ផ្ទះនេះឈ្មោះ ឡាយ សុវណ្ណមុនីរាជបាននិយាយថា លោកមិនធ្លាប់ឮឈ្មោះ លី ប៊ុណ្ណារិទ្ធ ពីមុនមកទេ ហើយលោកក៏មិនបានផ្ញើរបស់អ្វីទៅប្រទេសអូស្ត្រាលី នោះដែរ។ លោកបាននិយាយថា “ អាសយដ្ឋានរបស់ខ្ញុំមាននៅខាងមុខហាងស្រាប់ ដូច្នេះនរណាមកក៏ឃើញអាសយដ្ឋានរបស់យើងដែរ។ វាងាយស្រួលសម្រាប់ពួកគេប្រើណាស់”។
ពេលទាក់ទង កាលពីថ្ងៃអង្គារ ប្រធានភូមិ ដែលទទួលខុសត្រូវគ្រប់គ្រងតំបន់នេះ បានបញ្ជាក់ថា ឈ្មោះ លី ប៊ុណ្ណារិទ្ធ ពិតជាមានផ្ទះនៅខាងក្រោយអតីតហាងលក់ទូរស័ព្ទនេះមែន មានចម្ងាយមិនឆ្ងាយពីគ្នាប៉ុន្មានទេ ។ ពេលសម្ភាសកាលពីម្សិលមិញ លោក លី ប៊ុណ្ណារិទ្ធ បាននិយាយថា លោកខ្លួនឯងក៏មិនដឹងថា ហេតុអ្វីបានជាឈ្មោះរបស់លោកមានជាប់នៅលើវិក្កយបត្រកញ្ចប់ប្រៃសណីយ៍ដ៏គួរឲ្យសង្ស័យទាំងនោះដែរ។
លោក លី ប៊ុណ្ណារិទ្ធ បាននិយាយថា “ ខ្ញុំមិនធ្លាប់បានផ្ញើអ្វីទៅកាន់ប្រទេសអូស្ត្រាលីទេ។ ខ្ញុំមិនមានស្គាល់នរណាម្នាក់រស់នៅក្នុងប្រទេសអូស្ត្រាលីឡើយ”។ លោកនិយាយទៀតថា លោកធ្វើជាភ្នាក់ងារលក់ឲ្យក្រុមហ៊ុនមួយ ដែលនាំចូលឱសថ និងផលិតផលសម្អាងចូលមកប្រទេសកម្ពុជា។ក្រុមហ៊ុននេះមានសាខានៅក្នុងប្រទេសសិង្ហបុរី វៀតណាម ស្រីលង្កា និងម៉ូរីស ប៉ុន្តែពិតជាមិនបាននាំចេញអ្វីពីប្រទេសកម្ពុជានោះទេ។
កាលពីថ្ងៃអង្គារ មន្ត្រីប្រៃសណីយ៍កម្ពុជា បាននិយាយថា រាល់អ្នកផ្ញើកញ្ចប់តម្រូវឲ្យបង្ហាញអត្តសញ្ញាណ។ កញ្ចប់រឹបអូសបានក្នុងប្រទេសអូស្ត្រាលីទាំងនោះ ពោរពេញទៅដោយថ្នាំញៀនហេរ៉ូអីុន។ កញ្ចប់ទាំងនោះមានការតាក់តែងលម្អ មានទាំងរូបមើមយិនស៊ិន និងរូបសត្វឥន្ទ្រីព្រមទាំងមានទង់ជាតិអាមេរិក នៅលើស្លាបរបស់វាផងដែរ។
វិក្កយបត្ររបស់ប្រៃសណីយ៍កម្ពុជា បានបញ្ជាក់ថា កញ្ចប់ផ្ញើចេញ កាលពីថ្ងៃទី២៩ខែមីនា ដោយឈ្មោះ លី ប៊ុណ្ណារិទ្ធ ទាំងនោះថាជា “ តែ” ប៉ុន្តែនគរបាល និងភ្នាក់ងារគយអូស្ត្រាលី បានលើកឡើងក្នុងសេចក្តីថ្លែងការណ៍រួមមួយថា កញ្ចប់ផ្ញើពីកម្ពុជាទាំងនោះ ត្រូវបានបិទស្លាកថា ជាថ្នាំលាបសក់។
លោក គៀត ច័ន្ទថារិទ្ធ អ្នកនាំពាក្យនគរបាលជាតិកម្ពុជា បានមានប្រសាសន៍កាលពីម្សិលមិញថា នគរបាលកំពុងរង់ចាំព័ត៌មានផ្លូវការពីប្រទេសអូស្រ្តាលី ជុំវិញករណីនេះ មុនពេលបើកការស៊ើបអង្កេត៕
ប្រែសម្រួលដោយ តែម សុខុម