អតីតប្រធានអង្គការប្រឆាំងការជួញដូរមនុស្សអាហ្វេស៊ីប (Afesip) បានបដិសេធចំពោះការអះអាង ដែលបានធ្វើឡើងដោយនាយិកាអង្គការប្រឆាំងការជួញដូរមនុស្សអាហ្វេស៊ីប គឺអ្នកស្រីម៉មសូម៉ាលីដែលថាក្មេងស្រីចំនួនប្រាំបីនាក់ ត្រូវទាហានកម្ពុជាសម្លាប់ បន្ទាប់ពីមានហេតុការណ៍មួយបានកើតឡើងនៅមណ្ឌលសំចតរបស់អង្គការអាហ្វេសុីប ដែលមានទីតាំងនៅក្នុងរាជធានីភ្នំពេញកាលពីឆ្នាំ២០០៤។
អ្នកស្រី សូម៉ាលី បានធ្វើការអះអាងបែបនេះ កាលពីថ្ងៃទី៣ខែមេសានៅពេលថ្លែងទៅកាន់ អ្នកតំណាងរបស់ប្រទេសជាសមាជិកអង្គការសហប្រជាជាតិ និងក្នុងចំណោមអង្គការអន្តរជាតិ និងប្រព័ន្ធផ្សព្វផ្សាយ ដែលបានពិភាក្សាស្តីពីការជួញដូរមនុស្ស ក្នុងទីស្នាក់់ការកណ្តាលរបស់អង្គការសហប្រជាជាតិ នៅបុរីញូវយ៉ក។
នៅពេលរៀបរាប់ពីការឆ្មក់ចូលទៅក្នុងមណ្ឌលសំចតខ្លួនរបស់អ្នកស្រី កាលពីឆ្នាំ២០០៤អ្នកស្រី សូម៉ាលី មានប្រសាសន៍ថា“ទាហានបានឆ្មក់ចូលមណ្ឌល ហើយបាននាំក្មេងស្រីទាំងនោះ ចេញពីមណ្ឌលហើយក្មេងស្រីប្រាំបីនាក់ ត្រូវបានសម្លាប់”។
លោកភីយាលេហ្គ្រុស (Pierre Legros) ប្រធានអន្តរជាតិរបស់អង្គការអាហ្វេស៊ីប និងត្រូវជាអតីតស្វាមីរបស់អ្នកស្រី សូម៉ាលីដែលបានដឹងអំពីហេតុការណ៍ឆ្មក់ចូលនោះ បានមានប្រសាសន៍កាលពីម្សិលថា មិនមានស្រ្តី និងក្មេងស្រីណាម្មាក់ ត្រូវបានសម្លាប់ទាំងនៅក្នុងហេតុការណ៍ឆ្មក់ចូលកាលពីឆ្នាំ២០០៤ នៅឯមណ្ឌលក្នុងខណ្ឌទោលគោកនិងក្រោយពេលពេលឆ្មក់ចូលនោះទេ។
លោកលេហ្គ្រុសបានលើកឡើងនៅក្នុងកិច្ចសម្ភាសថា “ មិនមាននរណាម្មាក់ត្រូវបានសម្លាប់ក្នុងហេតុការណ៍នោះទេ”។ លោកលេហ្គ្រុស បានបន្តថា “ ខ្ញុំមិនដែលឮថាមាននរណាម្នាក់ត្រូវបានសម្លាប់នោះទេ។ យើងបានក្លាយជាអ្នកដើរតួក្នុងរឿងនយោបាយ នៅពេលនោះហើយសូម៉ាលីក៏ជាអ្នកដើរតួក្នុងរឿងនយោបាយនេះដែរ។ហេតុដូច្នេះ ការនិយាយថា មនុស្សប្រាំបីនាក់ត្រូវបានសម្លាប់ នៅក្នុងទីស្នាក់ការកណ្តាលរបស់អង្គការ គឺខ្ញុំគិតថាវាគឺជាកំហុសមួយដ៏ធំរបស់សូម៉ាលី។ គាត់មិនត្រូវនិយាយអ៊ីចឹងទេ”។
ការប្រកាន់ថា មានអំពើឃាតកម្មនោះបានកើតឡើងបន្ទាប់ពីមានការឆ្មក់ចូលជាទ្រង់ទ្រាយធំមួយកាលពីឆ្នាំ២០០៤ ទៅក្នុងសណ្ឋាគារឆាយហួ២នៅក្នុងរាជធានីភ្នំពេញជាទីកន្លែងដែលមានស្រ្តី និងក្មេងស្រីចំនួន៨៣នាក់ ត្រូវបានគេរំដោះចេញពីសណ្ឋាគារនោះ ហើយនាំយកទៅដាក់ក្នុងមជ្ឈមណ្ឌលរបស់អង្គការអាហ្វេស៊ីប។មួយថ្ងៃក្រោយមក បុរសមួយក្រុមប្រដាប់ដោយអាវុធ ព្រមទាំងសាច់ញាតិរបស់ស្ត្រី និងក្មេងស្រីជាប់ឃំុ បានសម្រុកចូលទៅក្នុងមជ្ឈមណ្ឌលសំចតនោះពេលនោះស្ត្រីនៅខាងក្នុង ក៏ត្រូវបានពួកគេបង្ខំឲ្យចាកចេញពីតាំងនោះដែរ ដោយពួកគេអះអាងថា ស្ត្រីទាំងនេះត្រូវបានគេយកទៅឃំុខ្លួនផ្ទុយនឹងឆន្ទះរបស់ខ្លួន។
នៅពេលក្រុមសកម្មជនសិទ្ធិមនុស្ស និងក្រសួងការបរទេសសហរដ្ឋអាមេរិកបានថ្កោលទោសយ៉ាងខ្លាំង ចំពោះការឆ្មក់ចូលមជ្ឈមណ្ឌលរបស់អង្គការ អាហ្វេស៊ីបនោះ គេមិនបានរាយការណ៍អំពីករណីស្លាប់ ឬការរងរបួសនៅពេលកើតហេតុ ឬពេលក្រោយមកទៀតនោះទេ។
អ្នកស្រី សូម៉ាលថ្លែងតាមអីុមែលកាលពីថ្ងៃសៅរ៍ថា អ្នកស្រីកំពុងធ្វើដំណើរទៅកាន់ន់ៅទីក្រុងបាងកក ដើម្បីពិនិត្យសុខភាពហើយមិនអាចធ្វើអត្ថាធិប្បាយចំពោះអ្វីដែលអ្នកស្រីបានប្រាប់មន្ត្រីអង្គការសហប្រជាជាតិនោះទេ ចំណែកឯលោក សៅ ឈឿត នាយកប្រតិបត្តិរបស់អង្គការអាហ្វេស៊ីបនៅកម្ពុជាបានបដិសេធមិនធ្វើអត្ថាធិប្បាយទេ។
ការិយាល័យសិទ្ធិមនុស្សរបស់អង្គការសហប្រជាជាតិនៅរាជធានីភំ្នពេញបានលើកឡើងកាលពីសបា្តហ៍មុនថា ខ្លួនមិនបានដឹងថាមានការស្លាប់ដូចដែលអ្នកស្រីសុម៉ាលីបានលើកឡើងនោះទេ។ មន្ត្រីនគរបាលជាន់ខ្ពស់ជាច្រើនរូបបានពណ៌នាពីការអះអាងនានាថា ខុសពីការពិត។
លោក លេហ្គ្រុសដែលបានរៀបការជាមួយអ្នកស្រីសូម៉ាលី រហូតមកដល់ឆ្នាំ២០០៨បានថ្លែងថា លោកកំពុងតែបង្ហាញឲ្យគេដឹងនៅពេលនេះ ដោយសារតែមានរបាយការណ៍ជាច្រើនស្តីពីឃាតកម្មនៅឯអង្គការ អាហ្វ្ីស៊ីបព្រមទាំងមានការចេញផ្សាយដកស្រង់សម្តីអតីតភរិយារបស់លោកដែលនិយាយថា កូនស្រីរបស់អ្នកទាំងពីរត្រូវបានអ្នកជួញដូរមនុស្សចាប់ជំរិតនៅឆ្នាំ២០០៦ ដោយសារតែខឹងនឹងការឆ្មក់ចូលសណ្ឋាគារ ឆាយហួនោះ។
លោក លេហ្គ្រុសបានថ្លែងដូច្នេះថា“អ្នកស្រីបាននិយាយថា អ្នកស្រីមានកូនស្រីម្នាក់ ត្រូវបានគេចាប់ជំរិត… នាងមិនដែលមាននរណាម្នាក់បានចាប់ជំរិតនាងទេ។តាមពិតនាងបានរត់ចេញពីផ្ទះ ទៅតាមមិត្តប្រុសរបស់នាងទេ”៕
ប្រែសម្រួលដោយ ស៊ាស៊ុយឈាង