មន្ត្រីតុលាការបាននិយាយថាកាលពីថ្ងៃច័ន្ទកូនប្រសាប្រុសរបស់លោក ចាន់យឿនអភិបាលខេត្តមណ្ឌលគិរីកំពុងត្រូវបានឃុំខ្លួនបណ្តោះអាសន្ននៅឯពន្ធនាគារប៉េហ្ស៊ីក្នុងរាជធានីភ្នំពេញបន្ទាប់ពីត្រូវបានចាប់ខ្លួនកាលពីថ្ងៃច័ន្ទនិងក្រោយមក ត្រូវបានតុលាការចោទប្រកាន់ពីបទព្យាយាមរារាំងមន្ត្រីរដ្ឋបាលព្រៃឈើមិនឲ្យចុះបង្ក្រាបករណីកាប់ឈើខុសច្បាប់។
ការចាប់ខ្លួនឈ្មោះ ធុយ ចាន់ថនកើតមានឡើងក្នុងរយៈពេលបីខែបន្ទាប់ពីសាលាដំបូងរាជធានីភ្នំពេញ បានសាកសួរនិងបានដោះលែងជននេះវិញ ពីបទជាប់ពាក់ព័ន្ធនឹងការព្រួតវាយដំកាលពីខែធ្នូទៅលើរូបលោកម៉េង តូនីអាយុ២៨ឆ្នាំ ចៅក្រមសាលាដំបូងខេត្តមណ្ឌលគិរី ដែលត្រូវបានគេវាយ និងចាប់ពង្រត់ក្នុងក្រុងសែនមនោរម្យ ។
លោក មាស ចាន់ពិសិដ្ឋ ព្រះរាជអាជ្ញារងអមសាលាដំបូងរាជធានីភ្នំពេញបានមានប្រសាសន៍កាលពីម្សិលមិញថា“តុលាការបានចោទប្រកាន់ [ធុយចាន់ថន] ពីបទរារាំងការបង្ក្រាបសកម្មភាពកាប់ឈើខុសច្បាប់ ដែលជាបទល្មើសព្រៃឈើ”។ប៉ុន្តែ លោកមិនបានរៀបរាប់លម្អិត អំពីអ្វីដែលឈ្មោះចាន់ថន បានប្រព្រឹត្តនោះទេ។
លោកគឹមរ័ត្នណារិនចៅក្រមស៊ើបសួរ ដែលបានសាកសួរឈ្មោះចាន់ថន កាលពីម្សិលមិញមិនអាចទាក់ទងសុំបទអត្ថាធិប្បាយបានទេ។
លោកខេងទីតូដែលអ្នកនាំពាក្យកងរាជអាវុធហត្ថលើផ្ទៃប្រទេស បានមានប្រសាន៍ថាឈ្មោះ ចាន់ថនត្រូវបានចាប់ខ្លួនកាលពីថ្ងៃច័ន្ទ នៅក្នុងស្រុកស្នួល ខេត្តក្រចេះ។
លោកទីតូបានមានប្រសាសន៍បន្តថា“យើងបានចាប់ខ្លួនជននេះតាមដីកាចាប់ខ្លួនរបស់តុលាការ ពាក់ព័ន្ធនឹងបទល្មើសព្រៃឈើ”។លោកបានបង្វែរសំណួរដទៃទៀតទៅសាលាដំបូងរាជធានីភ្នំពេញ។ មន្ត្រីតុលាការមិនបាននិយាយថាដីកាចាប់ខ្លួននោះ ចេញពីពេលណានោះទេ។
លោកចាបសុីនៀងប្រធានពន្ធនាគារប៉េហ្ស៊ីបានបញ្ជាក់អំពីការឃុំខ្លួនឈ្មោះចាន់ថនថា ជននេះត្រូវបានឃុំខ្លួនកាលពីរសៀលម្សិលមិញ ។
លោកឯមសុភក្ត្រអ្នកសម្របសម្រួលរបស់មជ្ឈមណ្ឌលអប់រំច្បាប់សម្រាប់សហគមន៍ប្រចាំខេត្តមណ្ឌលគិរីបាននិយាយថា បទល្មើសព្រៃឈើដែលបានចោទប្រកាន់នោះបានកើតឡើងតាំងពីពាក់កណ្ដាលឆ្នាំ២០១១ម៉្លេះហើយករណីនោះក៏មានជាប់ពាក់ព័ន្ធជាមួយនឹងប្រពន្ធរបស់ឈ្មោះចាន់ថន ដែរដែលត្រូវជាកូនស្រីរបស់លោក ចាន់ យឿន។
លោក សុភក្ត្រ បាននិយាយថា “ការចាប់ខ្លួននោះ គឺត្រឹមត្រូវហើយពីព្រោះ ជននេះ បានរកសុីឈើខុសច្បាប់ដោយអាងអំណាចរបស់ឪពុកក្មេកខ្លួន”។ លោកបានបន្ថែមថា “ខ្ញុំគិតថា ប្រសិនបើអាជ្ញាធរ ចាត់វិធានការរឿងនេះឲ្យបានល្អិតល្អន់វាបង្ហាញថាអាជ្ញាធរអាចទទួលបានជោគជ័យ”។
លោកចាន់សុវ៉េតអនុប្រធានផ្នែកអង្កេតរបស់អង្គការអាដហុកបានមានប្រសាសន៍ថាការចាប់ខ្លួន និងការចោទប្រកាន់នោះ គឺជាជំហានត្រឹមត្រូវមួយឆ្ពោះទៅរកការដោះស្រាយបញ្ហាពុករលួយ និងឆ្ពោះទៅរកការរឹតបន្តឹងការអនុវត្តច្បាប់នៅកម្ពុជា។
លោកបានបន្ថែមថា“នេះគឺជាការកែលម្អមួយ។វាជួយរឹតបន្ដឹងការអនុវត្តច្បាប់រដ្ឋពីព្រោះមន្ត្រីជាន់ខ្ពស់មានអំណាចខ្លះនៅពីក្រោយបទល្មើសព្រៃឈើនេះ”។ លោកសុវ៉េត បានជំរុញឲ្យរដ្ឋាភិបាលបន្ដបង្ក្រាបថែមទៀតលើមន្ត្រីពាក់ព័ន្ធក្នុងការកាប់ឈើនិងរត់ពន្ធឈើដោយខុសច្បាប់ ហើយផ្ដន្ទាទោសជាសាធារណៈ។
លោកចៅក្រម តូនីត្រូវបានគេវាយដំក្នុងពេលកំពុងផឹកសុីរួមតុជាមួយមន្ត្រីដទៃទៀត នៅក្នុងភោជនីយដ្ឋានមួយ។ នៅពេលនោះ អ្នកវាយលោកបានចាប់រុញលោកចូលក្នុងរថយន្ដ ហើយវាយលោកនឹងកាំភ្លើងខ្លីមុនពេលលោកអាចលោតគេចខ្លួនពេលរថយន្ដកំពុងបើកបរ។ លោកបានរងរបួសក្បាលយ៉ាងធ្ងន់ធ្ងរ និងផ្នែកខ្លះនៃរាងកាយ។ លោក ចាន់យឿនអភិបាលខេត្តមណ្ឌលគិរីពំុអាចទាក់ទងសុំបទអត្ថាធិប្បាយបានទេ៕
ប្រែសម្រួលដោយ ហម សុផាណ្ណា