ប្រធាន​អង្គការ​សិទ្ធ​ិមនុស្ស​សហប្រជាជាតិ​រិៈគន់​សេចក្ដី​ព្រាង​ច្បាប់​ស្ដី​ពី​អង្គការក្រៅរដ្ឋាភិបាល

លោក​ស្រីណាវីភីឡៃ (Navi Pillay) ឧត្តម​ស្នងការ​សហ​ប្រជាជាតិ​​ទទួល​បន្ទុក​សិទ្ធិ​មនុស្ស​​​​​កាល​ពី​ថ្ងៃ​ពុធ​ បាន​ចាត់ទុក​ប្រទេស​កម្ពុជាថា​ជាប្រទេសមួយ​​ស្ថិត​​​ក្នុង​ចំណោម​ប្រទេស​​​ប្រាំបី​​ ដែលមាន​​ច្បាប់​គ្រប់គ្រង​​អង្គការ​ក្រៅ​រដ្ឋាភិបាលព្រោះ​​ថា ​ច្បាប់​បែបនេះ​ “​ធ្វើ​ឲ្យ​ប៉ះ​ពាល់​ដល់​សិទ្ធិ​មនុស្ស​”។

លោក​​ស្រីភីឡៃ​ បាន​លើក​ឡើង​នៅ​ក្នុង​សេចក្ដី​ថ្លែង​ការណ៍​ពី​អង្គការ​សហ​ប្រជាជាតិ​ថា“សង្គម​ស៊ីវិល​មួយ​ដែល​ឯករាជ្យនិង​មាន​ការ​ប្តេជ្ញាខ្ពស់​​និង​អាចធ្វើ​​ការ​ដោយសេរី​នោះគឺ​ជា​ផ្នែកមួយ​ដ៏​សំខាន់​​សម្រាប់​កសាង​សង្គម​រឹងមាំ​មួយ​ និង​​ជា​បណ្តាញ​ទំនាក់​ទំនង​​ដ៏​​​សំខាន់​រវាង​រដ្ឋាភិបាល​ ​និង​ប្រជាពល​រដ្ឋ​របស់​ខ្លួន​។ហេតុ​ដូច្នេះ​​វាមាន​សារៈសំខាន់​ណាស់​​ក្នុង​ការ​​​​ឲ្យ​អង្គការ​ក្រៅ​រដ្ឋាភិបាល​អាចបំពេញ​ការងារ​​​បាន​ត្រឹម​ត្រូវ​”។

និយាយ​ពី​ប្រទេស​កម្ពុជា​វិញ​​ លោក​ស្រី​​​បាន​លើក​ឡើង​ពី​មាត្រា​មួយ​នៅ​ក្នុង​សេចក្តី​ព្រាង​​ច្បាប់ស្តី​ពី​​អង្គការ​ក្រៅ​រដ្ឋាភិបាល​ ដែល​​​អាច​ផ្ដល់​សិទ្ធិ​ឲ្យ​រដ្ឋាភិបាល​​បិទ​អង្គការ​ណា​​​មួយ​​ដែល​ធ្វើ​ឲ្យ​ប៉ះពាល់​ដល់​ “ឯកភាព​​ជាតិ​ វប្បធម៌ទំនៀម​​ទម្លាប់និង​ប្រពៃណី​របស់​សង្គម​​​​កម្ពុជា”។

លោក​ស្រី​ក៏​បានបញ្ជាក់​ផង​​ដែរពី​ការ​ខ្វះ​​ដំណើរការ​ប្តឹង​ជំទាស់​ពី​សំណាក់​​អង្គការ​ក្រៅ​​​​រដ្ឋាភិបាលនៅ​ពេល​បែបបទ​ចុះ​​ឈ្មោះ​​​របស់​​​​ខ្លួន​​ជាមួយ​​រដ្ឋាភិបាល​ត្រូវ​បាន​ច្រាន​ចោល​ ប៉ុន្ដែ​លោក​ស្រី​បាន​ស្វាគមន៍ចំពោះ​ការ​សន្យា​​​របស់​ប្រទេស​នេះ​ថានឹង ​បន្ដ​ពិគ្រោះ​យោបល់ជា​មួយ​អង្គការ​ក្រៅ​រដ្ឋាភិបាលអំពី​សេចក្ដី​ព្រាង​ច្បាប់​នេះ​។

អង្គការ​ក្រៅ​រដ្ឋាភិបាល​ខ្លួន​ឯង​ផ្ទាល់​បាន​លើក​ឡើង​ម្ដង​ហើយ​ម្ដង​ទៀត​អំ​ពី​ក្ដី​ព្រួយ​បារម្ភ​ថាសេចក្ដី​ព្រាង​ច្បាប់ក្នុង​ទម្រង់​ដើម​​ នឹង​ដាក់​កម្រិត​សិទ្ធិ​សេរី​ភាព​នៃ​ការ​ជួបជុំ​ និង​ការ​បញ្ចេញ​មតិ​​នៅ​​ប្រទេស​កម្ពុជា​។

​ប៉ុន្មាន​ខែ​ថ្មីៗនេះ​ លោក​នាយក​រដ្ឋមន្ត្រី​ ហ៊ុនសែន ​ បាន​ស្នើឲ្យ​ពន្យារ​ពេល​សេចក្ដី​ព្រាង​ច្បាប់​នេះ​រហូត​ដល់​ឆ្នាំ​២០១៤​ គឺ​ក្រោយ​ការ​បោះ​ឆ្នោត​ជាតិ​។លោកនុតសា​​​​​​អានរដ្ឋលេខាធិការក្រសួង​មហាផ្ទៃ​ ដែល​បាន​​​​ដឹក​នាំ​ដំណើរការ​ព្រាង​​ច្បាប់​នេះ​បាន​មាន​​​ប្រសាសន៍កាល​ពី​ម្សិល​មិញថាសេចក្ដី​ព្រាង​ច្បាប់​នេះ​នៅ​តែពន្យារពេល​ដដែល​ ហើយ​​​លោក​​មិន​ដឹង​ថា​ ពេល​ណា​នឹ​ង​​បន្ដសេចក្តី​ព្រាង​ច្បាប់​នេះ​នៅ​ពេល​ណា​នោះទេ​។ លោក​បាន​បន្ដ​ថា“ ​ទោះបីជា​យើង​ត្រូវ​ការ​ច្បាប់​ស្តី​ពី​អង្គ​ការ​ក្រៅ​រដ្ឋាភិបាល​​នេះ​ក៏ដោយ​ ក៏យើង​ត្រូវ​តែ​រង់​ចាំ​បញ្ជាពី​មន្ត្រី​ជាន់​ខ្ពស់​ដែរ​”៕

ប្រែសម្រួល​ដោយស៊ាស៊ុយឈាង

© 2012 – 2014, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.