ក្រុមមន្ត្រីបាននិយាយថា ខ្លួននៅមិនទាន់បូកសរុបនៅឡើយទេ នូវលទ្ធផលនៃការអនុវត្តគោលនយោបាយថ្មីមួយ នៅទូទាំងប្រទេស ដែលបានចូលជាធរមានកាលពីម្សិលមិញ ដែលក្នុងនោះនគរបាលចរាចរមិនត្រូវផាកពិន័យអ្នកបើកបររថយន្តគ្រប់ប្រភេទនៅនឹងកន្លែងឡើយ គឺត្រូវចេញសំបុត្រឲ្យពួកគេបង់ប្រាក់ជាក្រោយ។
បណ្តាអង្គការក្រៅរដ្ឋាភិបាល នៅតែមានការព្រួយបារម្ភថា វិធានថ្មីនេះនឹងកាន់តែផ្តល់ឱកាសឲ្យនគរបាលចរាចរ ដែលល្បីខាងពុករលួយស្រាប់ នូវលេសមួយសម្រាប់ទាមទារការសូកប៉ាន់ពីអ្នកបើកបរទៅវិញទេ។
លោក នេត សាវឿន អគ្គស្នងការនគរបាលជាតិ បានប្រកាសវិធានថ្មីនេះកាលពីខែមុន ក្នុងកិច្ចខំប្រឹងប្រែងមួយដើម្បីសម្រួលដល់កិច្ចការរបស់នគរបាលចរាចរក្នុងប្រទេសនិងធ្វើឲ្យប្រទេសកម្ពុជាជឿនលឿនដូចបណ្តាប្រទេសជិតខាងរបស់ខ្លួន។
ជំនួសឲ្យការផាកពិន័យអ្នកបើកបររថយន្តនៅ នឹងកន្លែង នគរបាលពេលនេះត្រូវចេញសំបុត្រឲ្យបង់ប្រាក់ក្នុងរយ: ពេល៣០ថ្ងៃ នៅតាមការិយាល័យនគរបាលចរាចរក្នុងមូលដ្ឋាន ឬនាយកដ្ឋាននគរបាលសណ្តាប់ធ្នាប់។
លោក ចេវ ហាក់ នាយរងការិយាយល័យនគរបាលចរាចរជើងគោករាជធានីភ្នំពេញ បានមានប្រសាសន៍ថា “ថ្ងៃនេះគឺជាថ្ងៃទីមួយហើយ ដែលនគរបាលចរាចរចាប់អនុវត្តតាមសារាចរណែនាំនេះ”។ លោកបានមានប្រសាសន៍ទៀតថា លោកសង្ឃឹមថា សារាចរណែនាំថ្មីនេះនឹងទទួលបានជោគជ័យ។
លោកបានមានប្រសាសន៍ថា “ការអនុវត្តច្បាប់មានការលំបាក ប៉ុន្តែយើងចង់អនុវត្តច្បាប់នេះឲ្យមានប្រសិទ្ធភាព។ ប្រសិនបើនគរបាលចរាចរប្រព្រឹត្តអំពើពុករលួយ អ្នកទាំងនោះនឹងត្រូវប្រឈមចំពោះមុខច្បាប់”។
មន្ត្រីនគរបាលចរាចរម្នាក់ឈរជើងនៅចំណុចប្រសព្វ នៃផ្លូវលេខ ២៧១ និងមហាវិថីមុនីរេ៉ត កាលពីរសៀលថ្ងៃម្សិលមិញ បានលើកឡើងថា លោកមានសំបុត្រផាកពិន័យនេះហើយ ប៉ុន្តែមិនទាន់បានឲ្យនរណាម្នាក់មួយសន្លឹកនៅឡើយទេ។
មន្ត្រីនគរបាលដែលសុំមិនបញ្ចេញឈ្មោះរូបនេះ បាននិយាយថា “យើងមានសំបុត្រផាកពិន័យនៅក្នុងដៃហើយ ហើយយើងនឹងអនុវត្តតាមសារាចរណែនាំនេះ។ យើងមិនដឹងថា វានឹងទៅជាបែបណាទេ ពីព្រោះយើងទើបតែចាប់ផ្តើម”។
ប៉ុន្តែលោក មាច សុខជា ដែលរថយន្តដឹកស្វាយរបស់លោកត្រូវបាននគរបាលឃាត់ឲ្យឈប់មុននេះបន្តិច ដោយសារតែបើកឆ្លងកាត់ភ្លើងស្តុបពណ៌ក្រហម នៅត្រង់ចំណុចផ្លូវប្រសព្វនេះ បាននិយាយថា លោកមិនដែលទទួលបានសំបុត្រផាកពិន័យទេ។
លោក មាច សុខជា ដែលបានទទួលស្គាល់ថា បានបើកឆ្លងកាត់ភ្លើងក្រហម និងបើកបរដោយគ្មានប័ណ្ណបើកបរនោះ បាននិយាយថា មន្ត្រីនគរបាលរូបនេះបានឲ្យគាត់បង់ពិន័យចំនួន ២៥.០០០រៀល ប៉ុន្តែគាត់សុំបញ្ចុះថ្លៃបានត្រឹម ២០.០០០រៀល។គាត់និយាយថា “ខ្ញុំគិតថា ខ្ញុំជាអ្នកខុស ប៉ុន្តែពេលនគរបាលចរាចរធ្វើបែបនេះ វាអាចនឹងធ្វើឲ្យមានអំពើពុករលួយកាន់តែខ្លាំង”។
លោក វ៉ន ពៅ ប្រធានសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ ដែលជាបណ្តាញអ្នករត់ម៉ូតូឌុប និងម៉ូតូរឺម៉កកង់បី ព្រួយបារម្ភថា នគរបាលចរាចរនឹងចាប់ផ្តើមទទួលយកសំណូក ជាថ្នូរនឹងការមិនចេញសំបុត្រផាកពិន័យថ្មីនេះ។លោកបានមានប្រសាសន៍ថា វិធានថ្មីនេះ “អាចនឹងបង្កលក្ខណ:កាន់តែងាយស្រួលសម្រាប់ឲ្យនគរបាលចរាចរអាចរកលុយដាក់ហោប៉ៅ និងរកលុយឲ្យមេរបស់ពួកគេ”។លោក ហេង ចាន់ធារី នាយការិយាល័យនគរបាលចរាចរជើងគោករាជធានីភ្នំពេញ បានថ្លែងថា អ្នកបើកបរគួរតែរាយការណ៍ទៅអាជ្ញាធរ ពេលឃើញមន្ត្រីនគរបាលចរាចរណាមួយប្រព្រឹត្តអំពើបែបនេះ។
លោកបានមានប្រសាសន៍ថា “ប្រសិនបើនគរបាលចរាចរល្មើសច្បាប់ចរាចរណ៍ អ្នកបើកបររថយន្តអាចប្តឹងពួកគេបាន។ ខ្ញុំចង់រំឭកប្រជាពលរដ្ឋគ្រប់គ្នាឲ្យគោរពច្បាប់ចរាចរណ៍”។អ្នកបើកបរម៉ូតូភាគច្រើនតែងតែសូកនគរបាលចរាចរ។ ប៉ុន្តែលោក ហេង ចាន់ធារី និងលោក ចេវ ហាក់ បានលើកឡើងថា ពួកលោកមិនដឹងថា តើរដ្ឋាភិបាលមានបំណងឲ្យអ្នកបើកបរម៉ូតូត្រូវគោរពតាមវិធានថ្មីនេះ ឬយ៉ាងណានោះទេ៕
ប្រែសម្រួលដោយ តែម សុខុម