សកម្មជនការពារសិទ្ធិមនុស្សបានអះអាងកាលពីម្សិលមិញថា ជនសង្ស័យពីរនាក់នៅក្នុងការបាញ់សម្លាប់លោកឈុត វុទ្ធីសកម្មជនការពារព្រៃឈើនិងលោកអិុនរតនា មន្ដ្រីកងរាជអាវុធហត្ថនោះ កំពុងត្រូវបានឃុំខ្លួន ដើម្បីសាកសួរនៅខេត្តកោះកុង ប៉ុន្តែមន្ដ្រីរដ្ឋាភិបាលមិនព្រមបញ្ជាក់ពីការអះអាងបែបនេះទេ។
លោកនាង បូរ៉ាទីណូអ្នកសម្របសម្រួលរបស់អង្គការសិទ្ធិមនុស្សអាដហុកប្រចាំខេត្តកោះកុងបានមានប្រសាសន៍ថា លោក រ៉ាន់ បូរ័ត្នអាយុ២៧ឆ្នាំត្រូវបានឃុំខ្លួននៅក្នុងមន្ទីរឃុំឃាំងកងរាជអាវុធហត្ថចាប់តាំងពីថ្ងៃសុក្រមក ហើយជនសង្ស័យមិនស្គាល់ឈ្មោះម្នាក់ទៀតត្រូវបានឃុំខ្លួនតាំងពីថ្ងៃអង្គារ។
លោករ៉ាន់បូរ័ត្នត្រូវបានអះអាងថាជាសន្ដិសុខនៅក្រុមហ៊ុន ធីមបឺ ហ្គ្រីន (Timber Green) ជាក្រុមហ៊ុនដែលគេគិតថា មានអាជ្ញាប័ណ្ណកាប់ឈើនៅក្នុងតំបន់អនាគតអាងស្តុកទឹកជំុវិញទំនប់វារីអគ្គិសនីឫស្សីជ្រុំ ក្នុងខេត្តកោះកុងហើយក្រុមហ៊ុនចិន ហ៊ួឌានខប (Huadian Corp)ដែលជាក្រុមហ៊ុនថាមពលចិនគ្រប់គ្រងដោយរដ្ឋកំពុងសង់ទំនប់នេះ។
លោកបូរ៉ាទីណូ បានលើកឡើងថា “ បើតាមលោកហ៊ុនរ៉ាន់ដែលជាឪពុករបស់ជនសង្ស័យឈ្មោះ រ៉ាន់ បូរ័ត្ន បានឲ្យដឹងថារ៉ាន់ បូរ័ត្នត្រូវបានកងរាជអាវុធហត្ថចាប់ខ្លួនតាំងពីប្រាំថ្ងៃមុនម៉្លេះ ហើយឥឡូវនេះកូនប្រុសគាត់កំពុងត្រូវឃុំខ្លួននៅទីបញ្ជាការដ្ឋានកងរាជអាវុធហត្ថខេត្ត”។ លោក បូរ៉ាទីណូបានបានបញ្ជាក់ថា រ៉ាន់ បូរ័ត្ន គឺជាមិត្តជិតស្និទ្ធរបស់លោក អិុន រតនា មន្ដ្រីកងរាជអាវុធហត្ថ ដែលត្រូវបានបាញ់សម្លាប់។
ការហៅទូរស័ព្ទជាច្រើនលើកច្រើនសាទៅកាន់លោក ហ៊ុន រ៉ាន់ មន្ត្រីរដ្ឋបាលព្រៃឈើចូលនិវត្តន៍ មិនមានការឆ្លើយតបទេ។
លោកចាន់សុវ៉េត អនុប្រធានកម្មវិធីសិទ្ធិមនុស្សរបស់អង្គការអាដហុកបានមានប្រសាសន៍ថា ក្រៅពី រ៉ាន់ បូរ័ត្ន សកម្មជនការពារសិទ្ធិមនុស្សជឿជាក់ថាជនសង្ស័យម្នាក់ផ្សេងទៀត
ត្រូវបានកងរាជអាវុធហត្ថឃុំខ្លួន ដើម្បីសាកសួរកាលពីថ្ងៃអង្គារ។
លោក ចាន់ សុវ៉េត បានលើកឡើងថា “ មេបញ្ជាការកងរាជអាវុធហត្ថបានចាប់ខ្លួនមនុស្សពីរនាក់ ហើយបានឃុំខ្លួនពួកគេនៅទីបញ្ជាការដ្ឋានកងរាជអាវុធហត្ថ”។លោកបានបញ្ជាក់ថា លោកបាននិយាយជាមួយក្រុមគ្រួសាររបស់ រ៉ាន់ បូរ័ត្ន ពិតមែន ហើយលោកមិនស្គាល់ឈ្មោះជនសង្ស័យទីពីរនោះទេ។
លោក ចាន់ សុវ៉េត បានមានប្រសាសន៍ថា“ ជនសង្ស័យទាំងពីរនាក់នេះមិនទាន់ត្រូវបានបញ្ជូនទៅតុលាការនៅឡើយទេ”។
លោកឧត្ដមសេនីយ៍ឯក ម៉ក់ ជីតូ ដែលកំពុងតែដឹកនាំក្រុមការងារពិសេស រួមមួយចាត់តាំងដោយលោកនាយករដ្ឋមន្ត្រី ហ៊ុនសែន ឲ្យធ្វើការស៊ើបអង្កេតលើការបាញ់សម្លាប់អ្នកទាំងពីរនេះ មិនប្រាប់ថា មានការនាំខ្លួនជនណាម្នាក់មកសាកសួរឬក៏អត់នោះទេ ប៉ុន្តែលោកបានប្រាប់ថាគ្មាននរណាម្នាក់ត្រូវបានចាប់ខ្លួននោះទេ។
លោកម៉ក់ ជីតូ មានប្រសាសន៍មុនពេលបដិសេធមិនធ្វើអត្ថាធិប្បាយបន្ថែមថា“ក្រុមមន្ត្រីមិនបានចាប់ខ្លួនជនសង្ស័យនោះទេប៉ុន្ដែ ក្រុមការងាររបស់យើងបានទៅដល់កន្លែងកើតហេតុនេះ [កាលពីថ្ងៃពុធ] ហើយសង្ឃឹមថា ពីរទៅបីថ្ងៃទៀតក្រុមការងាររបស់យើងនឹងបញ្ចប់ការស៊ើបអង្កេតនេះហើយ”។
លោក សំ ឃិតវៀន ស្នងការនគរបាលខេត្តកោះកុងគ្រាន់តែបានមានប្រសាសន៍ថា “នគរបាលកំពុងសហការជាមួយកងរាជអាវុធហត្ថខេត្ត” ហើយលោកមិនអាចធ្វើអត្ថាធិប្បាយបន្ថែមអំពីការស៊ើបអង្កេតនេះបានទេ។
ក្រុមសកម្មជនការពារសិទ្ធិមនុស្សដែលបានអះអាងថា រ៉ាន់ បូរ័ត្ន ត្រូវបានឃុំខ្លួននោះក៏បានលើកឡើងដែរថា ពួកគេមានការព្រួយបារម្ភចំពោះការឃុំខ្លួន រ៉ាន់ បូរ័ត្ន រយៈពេលយូរបែបនេះ។
តាមច្បាប់ អាជ្ញាធរអាចឃំុខ្លួនជនសង្ស័យបណ្ដោះអាសន្នបានតែ៤៨ម៉ោងប៉ុណ្ណោះ បន្ទាប់មកត្រូវតែបញ្ជូនទៅឲ្យចៅក្រមស៊ើបសួរ។ទោះជាយ៉ាងណា លោកសុកសំអឿននាយកប្រតិបត្តិក្រុមអ្នកច្បាប់ការពារសិទ្ធិកម្ពុជាបានលើកឡើងថា គេអាចឃុំខ្លួនជនសង្ស័យលើសរយៈពេល៤៨ម៉ោង បាន ប្រសិនបើជនសង្ស័យជាទាហាន ហើយត្រូវមេបញ្ជាការរបស់ខ្លួនជាអ្នកឃុំនោះ។
ដោយធ្វើតាមអង្គការសហប្រជាជាតិសហគមន៍អឺរ៉ុបបានចេញសេចក្ដីថ្លែងការណ៍មួយកាលពីម្សិលមិញសម្តែងការព្រួយបារម្ភចំពោះករណីការបាញ់សម្លាប់នេះ ហើយអំពាវនាវឲ្យមានការស៊ើបអង្កេតករណីនេះដោយឯករាជ្យ។
សេចក្ដីថ្លែងការណ៍នេះបានលើកឡើងថា “គណៈប្រតិភូសហគមន៍អឺរ៉ុបអំពាវនាវឲ្យមានការស៊ើបអង្កេតឲ្យបានឆាប់រហ័ស ហ្មត់ចត់ និងដោយឯករាជ្យលើករណីបាញ់សម្លាប់នេះ ដែលធ្វើឲ្យប៉ះពាល់ដល់កិច្ចខិតខំប្រឹងប្រែងរបស់រដ្ឋាភិបាល និងសង្គមស៊ីវិលក្នុងការទប់ស្កាត់បទល្មើសកាប់ឈើខុសច្បាប់ក្នុងប្រទេសកម្ពុជា”។
អ្នកយកព័ត៌មានពីរនាក់របស់កាសែត ខេមបូឌា ដេលី មានវត្តមាននៅក្នុងហេតុការណ៍បាញ់សម្លាប់លោក ឈុត វុទ្ធី ប៉ុន្ដែអ្នកយកព័ត៌មានទាំងពីរនេះមិនបានឃើញអ្នកទទួលខុសត្រូវ ចំពោះការបាញ់លោកឈុត វុទ្ធីនិងលោកអិុនរតនា នោះទេ៕
ប្រែសម្រួលដោយ ស៊ាស៊ុយឈាង