29 C
Phnom Penh

CPP​​អួត​អាង​ថា​ មាន​ការ​ចុះ​ចូល​យ៉ាង​​ច្រើន​នៅ​ជិត​ពេល​​បោះ​ឆ្នោត

ដោយ ឌឹ ខេមបូឌា ដេលី

បទវិភាគ

នៅសល់ពេល​តែ​ប៉ុន្មាន​សប្តាហ៍​ទៀត​ប៉ុណ្ណោះ​មុន​ការ​បោះ​ឆ្នោត​ឃុំ-សង្កាត់​ ចូល​មកដល់ មាន​សមាជិករបស់​គណបក្ស​ប្រឆាំង​ និង​ក្រុម​យុវ​ជន​ទើប​តែ​ដល់​អាយុ​បោះ​ឆ្នោត​លើក​ដំបូង​ចំនួន​ជាង​៥.០០០​នាក់​ បាន​នាំ​គ្នា​​ចេញ​​មកចុះចូលជាមួយគណបក្ស​ប្រជា​ជន​កម្ពុ​ជា​ កាល​ពី​ថ្ងៃ​សៅរ៍​​ ដើម្បី​បញ្ជាក់អំពី​​ការ​គាំ​ទ្រ​របស់​ពួក​គេ​ចំពោះគណបក្ស​​​ ដែល​កំពុង​កាន់​អំ​ណាច​របស់​លោក​នាយក​រដ្ឋ​មន្ត្រី​ ហ៊ុន​ សែន​​ ហើយ​បាន​ទទួល​អំណោយ​នៅ​ក្នុង​ពិ​ធី​ដ៏​ធំ​មួយនៅ​ក្នុង​ខេត្ត​កំពង់​ចាម​ ដែល​មាន​លោក ហោ​ ណាំ​ហុង រដ្ឋ​មន្ត្រី​ក្រសួង​ការ​បរទេស ជា​អធិបត។

លោក​ នាង​ ណារិន​ អធិការរង​នគរ​បាល​ស្រុកបាធាយ​ ជា​កន្លែង​បើក​ប្រារព្ធពិ​ធី​បានឲ្យដឹង​ថា​ ក្នុងឱកាសនេះ គេ​ឃើញ​​មាន​សមា​ជិក​ចំនួន​៥.០៥៨​នាក់​មក​ពី​គណបក្ស​នយោ​បាយ​នានា​ បាន​ចុះ​ចូល​​គណបក្ស​ប្រជា​ជន​កម្ពុ​ជា​។

លោក​ នាង​ ណារិន​ បាន​លើក​ឡើង​ថា​ “ ​លោក​ ហោ​ ណាំហុង​ ​បាន​មាន​ប្រសាសន៍ទៅ​កាន់​ក្រុមមនុស្ស​​ទាំង​នោះ​ ព្រម​ទាំង​បាន​ចែក​អំណោយ​ជា [ សារុង​ និង​​ក្រមាជា​ច្រើន ]​ ឲ្យ​ប្រជា​ពល​រដ្ឋ។

លោក​ ហ៊ុន​ ណេង​ អភិ​បាល​ខេត្ត​កំពង់​ចាម​ដែលជាបង​ប្រុស​របស់​លោក​ ហ៊ុន​ សែន​ ក៏​បាន​ទទួល​ស្វា​គមន៍​ក្រុម​អ្នក​គាំ​ទ្រ​ថ្មីៗ​របស់​គណបក្ស​របស់​លោក​ ដោយ​ផ្ទាល់​ដែរ។ លោក​ ហ៊ុន​ ណេង​ បាន​មាន​ប្រសាសន៍​ថា​ “ មាន​ការ​ចុះ​ចូល​ជា​ច្រើន​​ពី​គ្រប់​ស្រុក-ក្រុង នៅ​ក្នុង​ខេត្ត​កំពង់​ចាម” ដោយ​លោក​កត់​សម្គាល់​ថា​ ក្រុម​អ្នក​ចុះចូល​​បាន​ចេញ​មក​ពី​គណបក្ស​ សម​ រង្ស៊ី​ គណ​បក្ស​ ហ៊្វុនស៊ិន​ប៉ិច​ និង​គណបក្ស​ នរោត្តម​ រណឫទ្ធិ។

លោក​បាន​បន្ថែម​ទៀត​ថា​ “ ក្រុម​អ្នក​ចុះចូល​​ភាគ​ច្រើន​បាន​មក​ចូល​រួម​ជាមួយ​[​ គណ​បក្ស​​ប្រជា​ជន​កម្ពុជា]​ កាល​ពី​ពីរ ឬប​ី​​ ខែ​មុន​នេះ​ ប៉ុន្តែ​ឥឡូវ​នេះ​យើង​គ្រាន់​តែ​មាន​​ឱកាស​ប្រារព្ធពិធី​ទទួល​យក​អ្នក​ចុះចូល​ដ៏​ធំ​មួយ​តែ​ប៉ុណ្ណោះ”។ ខណៈ​ដែល​ពាក្យ​ថា​ “ ចុះចូល” ​បាន​ក្លាយ​ជា​ផ្នែក​មួយដ៏​សំខាន់​នៃ​ដំណាក់​កាល​ធ្វើយុទ្ធ​នាកា​ឃោសនា​បោះ​ឆ្នោត​​ ជា​ពិសេស​សម្រាប់​​គណបក្ស​កំពុង​កាន់​អំណាច​នោះ​ ក្រុម​អ្នក​សង្កេត​ការណ៍​ជា​ច្រើន​នាក់​ បាន​ហៅ​ទង្វើ​នេះ​ថា​ជា​ទម្រង់​មួយ​នៃ“​ការ​ឃោ​ស​នា ” ហួស​សម័យទៅ​ហើយ​ មុន​ពេល​បោះឆ្នោត​នោះ។

លោក​ គល់​ បញ្ញា​ នាយកប្រតិបត្តិ​គណៈ​កម្មាធិ​ការ​សម្រាប់​ការ​បោះ​ឆ្នោត​ដោយ​សេរី​ និង​យុត្តិ​ធម៌ ​បាន​មាន​ប្រសាសន៍​ថា​ ការ​ចុះ​ចូល​ និង​ពិធី​ទាំង​នេះ​ធ្វើ​ឲ្យ​អន្តរាយ​ដល់​ការរីក​ចម្រើន​នៃ​ដំណើរការ​បោះឆ្នោត​នៅ​ប្រទេស​កម្ពុជា។

លោក​ គល់​ បញ្ញា​ បាន​មាន​ប្រសាសន៍​ថា​  “ ​ការ​ប្រកួត​ប្រជែង​ខាង​នយោបាយ​មិន​គួរ​យកចិត្តទុកដាក់​តែ​ទៅ​លើផល​ប្រយោជន៍​នយោ​បាយ​តែ​មួយ​មុខ​ទេ​ ប៉ុន្តែ​គេ​គួរតែ​បង្កើត​​ឲ្យ​មាន​វប្បធម៌​នយោ​បាយ​មួយ​ ដើម្បី​ឲ្យ​ប្រជា​ពលរដ្ឋ​ចូល​រួម​ក្នុង​ចលនា​នយោបាយ និង​ជជែក​ពិ​ភាក្សា​គ្នា​ ដើម្បី​ឲ្យ​ពួក​គេ​ចូលរួម​ជា​មួយអ្នក​នយោ​បាយ​ ដែល​ស្ទាត់​ជំ​នាញ​ នៅ​ក្នុង​ការ​ជជែក​ពិភាក្សា​គ្នា​ស្ដីអំពី​គោល​នយោ​បាយ”។

លោក​បា​ន​បន្ថែម​ថា “កា​រ​​ផ្សព្វផ្សាយអំពី​កា​រ​​ចុះ​ចូល​ បង្ហាញ​​ឲ្យពល​​រដ្ឋ​កម្ពុជាដឹង​​ថា មិន​ទាន់​មា​ន​ភាព​ចាស់​ទុំ​ទេ ខ្ញុំ​ខ្មាស់​គេ​​ណាស់​”។

លោកស្រី ពង្ស ឈីវ​ហ្គិច​ ប្រធាន​អង្គការ​សិទ្ធិ​មនុស្ស​​លី​កា​ដូ​ និង​ជា​ប្រធា​​ន​គណៈកម្មាធិកា​រ​អព្យាក្រឹត្យ និង​មិន​​លម្អៀង សម្រាប់​​កា​រ​បោះ​ឆ្នោត​ដោយសេរី​ និង​យុត្តិ​ធម៌ក្នុង​ប្រទេ​ស​កម្ពុជា បា​ន​មា​ន​ប្រ​សាសន​៍ថា កា​រ​​ផ្ទៀង​ផ្ទាត់​ទៅ​អំពីកា​រចុះ​ចូល​ពិ​ត​ប្រា​កដ គឺ​ពិ​បាក​ជា​ង​កា​រ​ប្រារព្ធពិធី​។

លោកស្រី​ ឈីវ​ហ្គិច បា​ន​មា​ន​ប្រ​សាសន៍​ថា “ តាម​ពិត​​ សកម្មភាព​របស់​ពួ​ក​គេមា​ន​កា​រ​លំ​បាក​ក្នុង​កា​រ​សង្កេត​ពិ​និត្យ​ ពី​ព្រោះ​​សកម្មភាព​នេះ ជានិច្ច​កា​លអាច​ធ្វើ​ទៅ​រួច”។ អ្នកចុះចូលត្រូវ​បាន​គេអូសទាញ​តាម​រយៈ​ឥទ្ធិពលនយោ​បាយ​ ដើម្បី​ធ្វើឲ្យគេព្រួយ​បារម្ភ​អំពី​​សុវត្ថិភាព​របស់ខ្លួន ក្នុង​បរិយាកាស​មួយ​ដែល​គ្រប់​គ្រង​ដោយ​អ្នក​មាន​អំណាច​។ លោក​ស្រី​ថ្លែង​ថា ហេតុ​ផល​ពិត​ប្រាកដ​នៃ​ការ​ចុះ​ចូល​ ពិបាកដឹង​ណាស់​”។

លោក យឹម​ សុវណ្ណ អ្នក​នាំពាក្យ​របស់​គណ​បក្ស​ សម រង្ស៊ី បាន​ថ្លែង​កាល​ពី​ម្សិល​មិញ​ថា អ្នក​​ចុះ​ចូល​ជាមួយ​គណបក្ស​ប្រជាជន​កម្ពុជា​ ដោយមិនស្មោះ​ត្រង់​ប៉ុន្មានទេ។ លោក​បាន​មាន​ប្រសាសន៍ថា “ យើង​មិន​ចង់​ផ្សព្វ​ផ្សាយ​រឿង​នេះ​ទេ ប៉ុន្តែ​ប្រសិន​បើ​ពួក​គេ​ចង់​ដឹង​ ខ្ញុំ​នឹង​ប្រាប់​ពួក​គេ​ថា អតីត​សមា​ជិក​គណ​បក្ស​ សម រង្ស៊ី​ ទាំង​នោះ​ បាន​ចុះ​ចូល​ជាមួយគណបក្ស​គ្រប់​គ្រងអំណាច​ ដើម្បី​ទទួលបានតួ​នាទី​ និង​ដើម្បី​លុយកាក់ ប៉ុន្តែ​ សមា​ជិក​គណ​បក្ស​ប្រជា​ជន​កម្ពុជា​ កំពុង​​ចុះ​ចូល​ជាមួយ​គណ​បក្ស​ សម រង្ស៊ី ដើម្បី​អ្វី​ទៅ? ដើម្បី​យុត្តិធម៌។ ដើម្បី​ជួយ​ប្រជា​ជន​”។

លោក​ ទុំ សម្បូរ អ្នក​នាំ​ពាក្យ​របស់​គណ​បក្សហ៊្វុន​ស៊ីន​​ប៉ិច បា​ន​មា​ន​ប្រ​សាសន៍​ថា ការ​អះ​អាង​របស់​គណ​បក្ស​ប្រជា​ជន​ ជារឿង​មិនពិត​ឡើយ​។លោក សម្បូរ បាន​មាន​ប្រសាសន៍ថា “ ខ្ញុំ​កំពុង​តែ​ធ្វើ​ការ​នៅ​ខេត្ត​កំពង់​ចាម ខ្ញុំ​បាន​តាមដាន​ព័ត៌មាន ហើយ​ខ្ញុំ​មិនអាច​បញ្ជាក់​ថា សមា​ជិក​ណា​របស់​គណបក្ស​ខ្ញុំ​បាន​ចុះ​ចូល​ជាមួយ​គណ​បក្ស​ប្រជា​ជន​កម្ពុជា​ទេ​។ ខ្ញុំ​សូម​បដិសេធ​​ចំពោះ​ព័ត៌មាន​នេះ”។

លោក​ នរាណារិទ្ធ អាណាន់ដាយា៉ត នាយក​​ខុទ្ធកាល័យ​របស់​គណ​បក្ស​នរោត្តម ​រណ្ណឬទ្ធិ បាន​ហៅ​ពិធី​របស់​គណ​បក្ស​ប្រជា​ជន​កម្ពុជា​ថា ជា​យុទ្ធនាការ​បង្ខូច​ឈ្មោះ។ លោក​បាន​ថ្លែង​ថា “ តាម​ទស្សនៈរបស់​ពួក​យើង​ យើង​មិន​ដែលបាន​ឮ​ថាសមាជិក​របស់​យើង​ ចុះចូល​នោះ​ទេ។ យើង​មិន​បាន​ទទួល​សេចក្តី​រាយ​ការណ៍​ណា​មួយ​ពី​មណ្ឌល​បោះ​ឆ្នោត​របស់​យើង​សោះ​ឡើយ សូម្បី​តែ​ពី​កំពង់​ចាម​ក៏​អត់​ដែរ។ មាននៅ​លើទំព័រ​កាសែតប៉ុណ្ណោះ យើងមិន​ខ្វល់​ឡើយ​”។

លោក​បាន​ថ្លែង​បន្ថែម​ទៀត​ថា “ ​ប្រជា​ពល​រដ្ឋ​ដឹង​ច្បាស់​ថា គេ​ពេញ​ចិត្ត​អ្វី​ និង​មិន​ពេញ​ចិត្ត​អ្វី ពួក​គេ​ដឹង​ថា អ្នក​ណា​ដែល​ពួក​គេ​ចង់​បោះ​ឆ្នោត​ឲ្យ​ និង​នរណា​ ដែល​ពួក​គេ​មិន​ចង់​បោះ​ឆ្នោត​ឲ្យ ដូច្នេះ​យើង​មិន​បារម្ភ​អំពី​រឿង​នេះ​ទេ”។

លោក​ ប៉ុល ហំម អ្នក​នាំ​ពាក្យ​គណបក្ស​សិទ្ធិ​មនុស្ស​ បាន​បដិសេធ​ផងដែរ ចំពោះ​ការ​ចុះ​ចូល​របស់ សមាជិកមក​ពី​គណ​បក្ស​របស់​ខ្លួន​៕

ប្រែ​សម្រួល​ដោយ ​ហួង កុក​ទៀន និង ចេវ ប៊ុននី ​

           

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស