បុរសខ្លាំងក្រាញអំណាចតពូជនៅកម្ពុជាលោក ហ៊ុន សែន តែងតាំងអតីតប្រធានគណបក្សអំណាចខ្មែរលោក សួន សេរីរដ្ឋា ធ្វើជាទីប្រឹក្សាផ្ទាល់។
ក្នុងសេចក្តីសម្រេចស្ដីពីការតែងតាំងមន្ត្រីគណបក្ស ចុះថ្ងៃទី២៧ ខែកក្កដា កន្លងទៅ ហើយដែលសារព័ត៌មាន The Cambodia Daily ទើបបានទទួល ឲ្យដឹងថា ការតែងតាំងលោក សួន សេរីរដ្ឋា ជាទីប្រឹក្សារបស់លោក ហ៊ុន សែន ប្រធានគណបក្សប្រជាជនកម្ពុជា ធ្វើឡើងតាមការសម្រេចគណៈអចិន្ត្រៃយ៍នៃគណៈកម្មាធិការកណ្ដាល។
អតីតប្រធានគណបក្សអំណាចខ្មែរលោក សួន សេរីរដ្ឋា ធ្លាប់ត្រូវបានតុលាការក្រោមបញ្ជាលោក ហ៊ុន សែន ចាប់ខ្លួន និងកាត់ទោសឲ្យជាប់ពន្ធនាគារចំនួន ៥ឆ្នាំ និងពិន័យជាប្រាក់ចំនួន ១០លានរៀលកាលពីថ្ងៃទី២៥ ខែសីហា ឆ្នាំ២០១៧ ពីបទ «ញុះញង់កុំឲ្យយោធិនស្តាប់បង្គាប់ ធ្វើឲ្យខូចទឹកចិត្តកងទ័ព និងបទញុះញង់ឲ្យប្រព្រឹត្តបទឧក្រិដ្ឋជាអាទិ៍»។
អតីតប្រធានគណបក្សអំណាចខ្មែររូបនេះត្រូវបានព្រះមហាក្សត្រចេញព្រះរាជក្រឹត្យមួយត្រាស់បង្គាប់លើកលែងទោសកាលពីថ្ងៃទី២៣ ខែសីហា ឆ្នាំ២០១៨ បន្ទាប់ពីលោក សួន សេរីរដ្ឋា ក៏បានសរសេរលិខិតមួយដោយសុំទោសលោក ហ៊ុន សែន និងស្នើសុំឲ្យបុរសខ្លាំងរូបនេះជួយអន្តរាគមន៍ឲ្យមានការដោះលែងលោកពីពន្ធនាគារវិញ។
លោក សួន សេរីរដ្ឋា បច្ចុប្បន្នជារដ្ឋលេខាធិការក្រសួងអភិវឌ្ឍន៍ជនបទ និងជាប្រធានក្រុមប្រឹក្សាភិបាលវេទិកាសន្តិភាពកម្ពុជា (វ.ស.ក) អះអាងថា សន្តិភាពដែលខ្មែរមានបានមកដល់សព្វថ្ងៃនេះ គឺបានមកដោយញើសឈាម និងទឹកភ្នែកជាមួយនឹងការយកជីវិតទៅប្តូររបស់សម្តេចតេជោ ហ៊ុន សែន។
លោកថា សម្តេចប្រហែលជាមិនល្អ ១០០% ដូចពួកអ្នករមឹលគុណគាត់ចង់បានទេ តែគាត់ល្អលើសពី ១០០% សម្រាប់អ្នកដឹងគុណគាត់ ដែលស្គាល់ពីតម្លៃនៃការលះបង់របស់គាត់ និងទទួលស្គាល់នូវសច្ចភាពប្រវត្តិសាស្ត្រ។
កាលពីឆ្នាំ២០១៧ មុនពេលដែលចូលរួមជីវភាពនយោបាយជាមួយគណបក្សប្រជាជនកម្ពុជា អតីតប្រធានគណបក្សអំណាចខ្មែរ លោក សួន សេរីរដ្ឋា បានត្មះតិះដៀលរដ្ឋាភិបាលរបស់លោក ហ៊ុន សែន ថាគ្មានសមត្ថភាពអាចបង្កើតឱកាសការងារ និងមុខរបរដល់ប្រជាពលរដ្ឋខ្មែរដែលកំពុងពេញកម្លាំងបម្រើការងារក្នុងប្រទេស។
លោកលើកឡើងថា ពលរដ្ឋខ្មែរជាច្រើននាក់ត្រូវបង្ខំចិត្តចាកចេញទៅធ្វើការនៅក្រៅប្រទេស និងថាភាគច្រើនមិនអាចវិលមកចូលរួមពិធីបុណ្យចូលឆ្នាំ ឬបុណ្យប្រពៃណីផ្សេងៗទេ ដោយលោកថាគឺពួកគេត្រូវទ្រាំនៅស៊ីឈ្នួលធ្វើការឲ្យគេនៅក្រៅប្រទេស។
ប៉ុន្តែក្រោយពេលចូលរួមជីវភាពជាមួយគណបក្សប្រជាជនកម្ពុជា លោក សួន សេរីរដ្ឋា បានលើកឡើងសរសើរលោកនាយករដ្ឋមន្ត្រី ហ៊ុន សែន ថាសន្តិភាពដែលខ្មែរបានមកដល់ថ្ងៃនេះ គឺបានមកដោយញើសឈាម និងទឹកភ្នែកជាមួយនឹងការយកជីវិតទៅប្តូររបស់បុរសម្នាក់ គឺលោកនាយករដ្ឋមន្ត្រី ហ៊ុន សែន៕