កាលពីម្សិលមិញទីស្តីការគណៈរដ្ឋមន្ត្រីបានចេញសេចក្តីថ្លែងការណ៍មួយស្តីបន្ទោសចំពោះការធ្វើអត្ថាធិប្បាយរិះគន់ព្រះមហាក្សត្រ នរោត្តម សីហមុនី ក្នុងពេលថ្មីៗនេះ ហើយបានរំឭកដាស់តឿនសាធារណជនអំពីព្រះរាជ្យសិទ្ធិដែលមិនអាចរំលោភបំពានបានរបស់ព្រះមហាក្សត្រគ្រងរាជ្យសម្បត្តិ។
ព្រះមហាក្សត្រ នរោត្តម សីហមុនី គឺជាចំណុចដែលគេចាប់អារម្មណ៍បំផុតនៅពេលមានភាពជាប់គាំងផ្នែកនយោបាយក្នុងពេលបច្ចុប្បន្ននេះ ជុំវិញជម្លោះនៃការបោះឆ្នោត កាលពីខែកក្កដា ដោយសារព្រះរាជតួនាទីរបស់ព្រះអង្គតាមរដ្ឋធម្មនុញ្ញតម្រូវឲ្យព្រះអង្គធ្វើជាអធិបតីក្នុងការបើកសម័យប្រជុំសភាលើកដំបូង ក្នុងនីតិកាលថ្មីនីមួយៗ។
គណបក្សសង្គ្រោះជាតិចង់ឲ្យព្រះមហាក្សត្រពន្យារពេលការបើកសម័យប្រជុំសភាលើកដំបូង នៅថ្ងៃច័ន្ទនេះ រហូតដល់ខ្លួនដោះស្រាយជម្លោះដោយការចរចាជាមួយគណបក្សប្រជាជនកម្ពុជារួចហើយសិន។ គណបក្សប្រជាជនកម្ពុជា កំពុងជំរុញឲ្យកិច្ចប្រជុំនេះចាប់ផ្ដើមដំណើរការទៅបានតាមការគ្រោងទុក។
ទីស្តីការគណៈរដ្ឋមន្ត្រីបានលើកឡើងក្នុងសេចក្ដីថ្លែងការណ៍នោះថា “ក្នុងពេលថ្មីៗនេះ រាជរដ្ឋាភិបាលបានសង្កេតឃើញថា ការបញ្ចេញមតិរបស់ប្រជាពលរដ្ឋមួយចំនួនតាមរយៈប្រព័ន្ធផ្សព្វផ្សាយ តាមវិទ្យុ កាសែត គេហទំព័រ និងជាពិសេសតាមប្រព័ន្ធទំនាក់ទំនងសង្គមហ្វេសប៊ុក បានរិះគន់យ៉ាងខ្លាំងទៅលើអង្គព្រះមហាក្សត្រ ដែលធ្វើឲ្យប៉ះពាល់ដល់ព្រះកិតិ្តនាម និងព្រះកិត្តិយសរបស់ព្រះមហាក្សត្រ ជាទីគោរពសក្ការៈដ៏ខ្ពង់ខ្ពស់របស់យើង”។ “ដូច្នេះហើយ រាជរដ្ឋាភិបាលសូមអំពាវនាវឲ្យប្រជាពលរដ្ឋគ្រប់រូបរក្សាតម្លៃ សេចក្តីថ្លៃថ្នូរ និងគោរពព្រះមហាក្សត្រនៃជាតិរបស់យើងនិងគោរពរដ្ឋធម្មនុញ្ញដែលជាច្បាប់កំពូល”។
សេចក្តីថ្លែងការណ៍នោះបានដកស្រង់មាត្រា៧និងមាត្រា៨នៃរដ្ឋធម្មនុញ្ញ។ មាត្រា៧ចែងថា “អង្គព្រះមហាក្សត្រមិនអាចនរណារំលោភបំពានបានឡើយ”។
មាត្រា៨ នៃរដ្ឋធម្មនុញ្ញចែងពីព្រះរាជតួនាទីរបស់ព្រះមហាក្សត្រថា “ អង្គព្រះមហាក្សត្រទ្រង់គង់ជានិមិត្តរូបនៃឯកភាពជាតិ និរន្តភាពជាតិ ជាអ្នកធានានូវឯករាជភាព អធិបតេយ្យ បូរណភាពទឹកដី និងជាអ្នកធានានូវការគោរពសិទ្ធិ និងសេរីភាព របស់ប្រជាពលរដ្ឋគ្រប់រូប”។
លោក ឯក ថា អ្នកនាំពាក្យអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រី បានបដិសេធមិនធ្វើអត្ថាធិប្បាយអំពីសេចក្តីថ្លែងការណ៍នេះទេ។
សេចក្តីថ្លែងការណ៍នោះមិនបានលើកឡើងពីការធ្វើអត្ថាធិប្បាយណាមួយ ដែលខ្លួនស្តីបន្ទោសនោះទេ ប៉ុន្តែ ការផ្សព្វផ្សាយតាមប្រព័ន្ធទំនាក់ទំនងសង្គមហ្វេសប៊ុក ក្នុងពេលថ្មីៗនេះបានលើកជាសំណួរអំពីទំនាក់ទំនងរបស់ព្រះមហាក្សត្រជាមួយលោកនាយករដ្ឋមន្ត្រី ហ៊ុន សែន។
កាលពីថ្ងៃច័ន្ទ វិទ្យុបារាំងអន្តរជាតិបានផ្សាយពីអត្ថបទវិភាគមួយ ដែលអះអាងថាមនុស្សមួយចំនួនកំពុងប្រើប្រាស់ព្រះមហាក្សត្រ ដើម្បីផលប្រយោជន៍នយោបាយក្នុងវិបត្តិបច្ចុប្បន្ននេះ។
លោក សុក សំអឿន មេធាវីដ៏ល្បី និងជាប្រធានក្រុមអ្នកច្បាប់ការពារសិទ្ធិកម្ពុជាជាអង្គការផ្តល់ជំនួយផ្នែកច្បាប់បានមានប្រសាសន៍ថា លោកមិនបានដឹងថា មានមាត្រាណាមួយនៅក្នុងរដ្ឋធម្មនុញ្ញដែលត្រូវបានប្រើសម្រាប់ដាក់ទោសនរណាម្នាក់នោះទេ ប្រហែលដោយសារក្រមព្រហ្មទណ្ឌរបស់ប្រទេសកម្ពុជាបានបញ្ចូលទោសចំពោះការបំពានបែបនេះ។
លោក សុក សំអឿន បានលើកឡើងពីករណីស្រ្តីអ្នកគ្រប់គ្រងរោងចក្រជនជាតិចិនម្នាក់ ដែលបានហែកព្រះឆាយាល័ក្ខព្រះមហាក្សត្រ សម្តេចឪ នរោត្ដម សីហនុ កាលពីឆ្នាំមុន ហើយបានសង្កេតឃើញថា ស្ត្រីជនជាតិចិននោះត្រូវបានផ្តន្ទាទោសពីបទបំផ្លាញទ្រព្យសម្បត្តិ។ ស្ត្រីនោះត្រូវបានផ្តន្ទាទោស និងព្យួទោសរយៈពេលមួយឆ្នាំ ហើយបង្គាប់ឲ្យបញ្ជូនចេញពីប្រទេសកម្ពុជា។
លោក សុក សំអឿន មានប្រសាសន៍បន្តថាប្រសិនបើរដ្ឋាភិបាលពិតជាយកចិត្តទុកដាក់អំពីការអនុវត្តមាត្រា៧នេះមែននោះ “ខ្លួនគួរតែបន្ថែមការដាក់ទោសចំពោះអ្នកទាំងឡាយណា ដែលមើលងាយ និងប្រមាថព្រះមហាក្សត្រ ទៅក្នុងក្រមព្រហ្មទណ្ឌ”។ នៅពេលសួរអំពីសេចក្តីថ្លែងការណ៍របស់ទីស្តីគណៈរដ្ឋមន្ត្រី លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានមានប្រសាសន៍ថា ច្បាប់របស់ប្រទេសក៏ធានានូវសិទ្ធិសេរីភាពនៃការបញ្ចេញមតិផងដែរ។ លោកបានថ្លែងបន្តថា “ ប្រទេសនេះជាប្រទេសប្រកាន់លទ្ធិប្រជាធិបតេយ្យ ដូច្នេះប្រជាពលរដ្ឋមានសិទ្ធិក្នុងការបញ្ចេញមតិរបស់ខ្លួន”។
លោកបានបន្តថា “យើងមិនបានប៉ះពាល់ដល់អង្គព្រះមហាក្សត្រឡើយយើងគោរពព្រះមហាក្សត្រ។ ព្រះមហាក្សត្របានស្នើឲ្យគណបក្សទាំងពីរស្វែងរកយុត្តិធម៌ជូនប្រជាពលរដ្ឋ ដូច្នេះអ្នកទាំងឡាយណាដែលមិនគោរពឆន្ទៈរបស់ប្រជាពលរដ្ឋ គឺជាអ្នករំលោភបំពានព្រះមហាក្សត្រទៅវិញទេ៕
(រាយការណ៍បន្ថែមដោយ Zsombor Peter)
ប្រែសម្រួលដោយ ឃិន ណៃ