យោងតាមប្រព័ន្ធផ្សព្វផ្សាយអង់គ្លេសបានឲ្យដឹងថា ឪពុករបស់លោក ហ្គ្រិក ហ្វ្រីយិត ប្រធានក្រុមហ៊ុនវិនិយោគទុនអង់គ្លេសដែលរងការរិះគន់ច្រើនដែលត្រូវបានចាប់ខ្លួនកាលពីឆ្នាំមុនតាមការចោទប្រកាន់ថា បានលាងលុយ និងឆបោកនោះ បានសរសេរលិខិតមួយកាលពីម្សិលមិញ ផ្ញើជូនលោកនាយករដ្ឋមន្ត្រី ហ៊ុន សែន តាមរយៈស្ថានទូតខ្មែរប្រចាំទីក្រុងឡុងដ៍ស្នើសុំឲ្យមានការ ដោះលែងកូនប្រុសរបស់លោក។
លោក ភីតធ័រ ហ្វ្រីយិត បានប្រាប់កាសែត Herald Express ថា “យើងអាចសរសេរលិខិតរបស់យើងបាន ប៉ុន្តែ យើងមិនអាចជួបឯកអគ្គរដ្ឋទូតបានទេ។ យើងអាចលើកឡើងពីបញ្ហារបស់យើង ហើយខ្ញុំសង្ឃឹមថា វានឹងមានប្រសិទ្ធភាព”។
លោក ហ្គ្រិក ហ្វ្រីយិត ដែលជាម្ចាស់ភាគហ៊ុនដ៏ធំនៅក្នុងក្រុមហ៊ុន Sustainable AgroEnergy PLC ត្រូវបានចាប់ខ្លួនកាលពីខែមីនាតាមការចោទប្រកាន់ពីបទក្លែងបន្លំឯកសារ និងប្រើប្រាស់ឯកសារទាំងនោះដើម្បីទិញដីរាប់ពាន់ហិកតាដោយខុសច្បាប់ពីអ្នកស្រី ម៉ៅ មា៉ល័យ ភរិយារបស់លោក កែ គឹមយ៉ាន អតីតអគ្គមេបញ្ជាការកងយោធពលខេមរភូមិន្ទ។
ក្រោយមកនៅខែមករា គាត់ត្រូវបានចោទប្រកាន់ពីបទលាងលុយ បន្ទាប់ពីមានការស៊ើបអង្កេតពីសំណាក់អង្គភាពប្រឆាំងអំពើពុករលួយ។ ក្រុមហ៊ុន Sustainable AgroEnergy PLC បានស្ថិតនៅក្រោមការសុើបអង្កេតនៅក្នុងប្រទេសអង់គ្លេសចាប់តាំងពីឆ្នាំ២០១២មក តាមការចោទប្រកាន់ថា គាត់បានឆបោកលុយគេចំនួន៥៤លានដុល្លារ ហើយទ្រព្យសកម្មរបស់ក្រុមហ៊ុននេះត្រូវបានបង្កក។
អាជ្ញាធរនិយាយថា មនុស្សនៅក្នុងប្រទេសអង់គ្លេសចំនួន២.០០០នាក់បានវិនិយោគនៅក្នុងគម្រោងចម្ការរបស់ក្រុមហ៊ុន Sustainable AgroEnergy PLC នៅក្នុងខេត្តបន្ទាយមានជ័យដោយមានការសន្យាផ្តល់ប្រាក់កម្រៃខ្ពស់៕គឹមហឿន