32 C
Phnom Penh

បុរស​​​បីនាក់​​​ចោទ​​​​​​ប្រកាន់នគរ​​​បាល​​​ខេត្ត​​​រតនគិរីពីបទ​​​ធ្វើទារុណកម្ម​​​​​​ពួកគេ​​​ អំឡុង​​​ពេល​​​ពួកគេ​​​ជាប់​​​ឃុំ

ដោយ ឌឹ ខេមបូឌា ដេលី

បទវិភាគ

កាលពីម្សិលមិញ បុរស​​​បីនាក់​​​​​​មកពី​​​ស្រុក​​​លំផាត់ ខេត្ត​​​រតនគិរី​​​បាន​​​ដាក់​​​ពាក្យ​​​បណ្ដឹង​​​ទៅ​​​សាលា​​​ដំបូង​​​ខេត្ត​​នេះ​​​ និង​​​អង្គការ​​​សិទ្ធិមនុស្ស​​​អាដ​​​ហុក ដើម្បី​​​ប្ដឹង​​​នគរ​​​បាល​​​ម្នាក់​​​ដែល​​​ពួក​​​គេ​​​​​​ចោទ​​​ប្រកាន់ពីបទ​​​ធ្វើ​​​ទារុណ​​​កម្ម​​​លើ​​​ពួកគេ​​​ ខណៈ​​​ពេលពួកគេ​​​​​​កំពុង​​​ជាប់​​​ឃុំ​​​។

បុរស​​​ទាំងបីនាក់​​​ដែល​​​មាន​​​ឈ្មោះដូច​​​ជា ណុប រី អាយុ​​​២៣​​​ឆ្នាំ ឈ្មោះ ដួង ដេត អាយុ​​​២៨​​​ឆ្នាំ និង​​​ឈ្មោះ ហ៊ឹម ខឿន អាយុ​​​២៨​​​ឆ្នាំ​​​ដូច​​​គ្នាបាន​​​ដាក់​​​ពាក្យ​​​ប្ដឹង​​​មន្ត្រីនគរ​​​បាល​​​​​​ឃុំ​​​សេដា​​​ម្នាក់​​​ឈ្មោះ ធឿន រ៉ូតានី ជា​​​មន្ត្រី​​​នគរ​​​បាល​​​តែ​​​ម្នាក់គត់​​​ដែល​​​ពួកគេ​​​អាច​​​ចំណាំ​​​បាន​​​ថា ស្ថិត​​​ក្នុង​​​ចំណោម​​​នគរ​​​បាល​​​មួយ​​​ក្រុម​​​ដែល​​​បានវាយដំ​​​បុរស​​​វ័យ​​​ក្មេង​​​ទាំង​​​បីនាក់នេះ អំឡុង​​​​​​​​​ពេល​​​ពួកគេ​​​ជាប់​​​ឃុំ​​​រយៈពេល​​​ប្រាំមួយ​​​ម៉ោង​​​នៅ​​​ប៉ុស្តិ៍​​​នគរ​​​បាល​​​កាលពី​​​​​​ថ្ងៃអង្គារ​​​។

យោង​​​តាម​​​ពាក្យ​​​បណ្ដឹង​​​នេះ​​​បាន​​​ឲ្យ​​​ដឹង​​​ថា បុរស​​​ឈ្មោះ ដួង ដេត និង​​​មិត្ត​​​ភក្ដិ​​​របស់​​​ខ្លួន​​​បាន​​​ទៅ​​​ចូល​​​រួម​​​​​​ក្នុង​​​ពិធី​​​មង្គល​​​ការ​​​មួយ​​​កាល​​​ពីល្ងាច​​​ថ្ងៃ​​​អង្គារ​​​ ហើយ​​​ពួកគេ​​​បាន​​​សម្រេច​​​​​​​​​​​​​​​​​​​​​​​​​​​​​​​​​ចិត្ត​​​ប្រឈម​​​តតាំង​​​នឹង​​​លោក​​​ ធឿន រ៉ូតានី ដែល​​​ធ្លាប់​​​បាន​​​វាយ​​​ដំ​​​​​​ឈ្មោះ ដួង ដេត កាល​​​ពី​​​លើក​​​មុន​​​។

ឈ្មោះ ដួង ដេត បាន​​​លើក​​​ឡើង​​​ថា “ខ្ញុំ​​​បាន​​​ប្រទះ​​​ឃើញ​​​បុរស​​​ឈ្មោះ នី [រ៉ូតានី​​​] ដែល​​​​​​​​​ធ្លាប់​​​វាយ​​ខ្ញុំ​​​កាលពីលើកមុន ហើយ​​​ខ្ញុំ​​​បាន​​​សួរ​​​គាត់​​​ថា ហេតុអ្វី​​​បាន​​​ជា​​​គាត់​​​វាយ​​​ខ្ញុំ​​​។  ពេល​​​នោះគាត់​​​ក៏​​​ចាប់​​​ក្រៀក​​​ខ្ញុំ​​​វ៉ៃ​​​ខ្នោះ”។ បុរស​​​រូប​​នេះ​​​បាន​​​លើក​​​ឡើង​​​ទៀត​​​ថា ឈ្មោះ ហ៊ឹម ខឿន និង​​​ឈ្មោះ ណុប រី ដែល​​​ជា​​​មិត្ត​​​ភក្ដិ​​​​​​របស់​​​ខ្លួន​​​បាន​​​ឃើញ​​​ហេតុការណ៍​​​នោះ​​​ផ្ទាល់​​​ហើយ​​​ក៏​​​បាន​​​ប្រឈម​​​តតាំង​​​នឹង​​​​​​នគរ​​​បាល​​​ប្រាំ​​​នាក់​​​ដែល​​​មក​​​ជួយ​​​លោក ធឿន រ៉ូតានី។

បុរស​​​ទាំង​​​បីនាក់​​​នេះ​​​ត្រូវ​​​បាន​​​ចាប់​​​ខ្លួន​​​នៅ​​​ពេល​​​នោះ រួច​​​បញ្ជូន​​​ទៅ​​​ប៉ុស្តិ៍​​​នគរ​​​បាល​​​​​​នៅ​​​ពេល​​​​​​ប្រហែល​​​ជា​​​ពាក់​​​កណ្ដាល​​​អធ្រាត្រ​​​ ហើយ​​​ពួក​​​គេ​​​បាន​​​ជាប់​​​ឃុំ​​​នៅ​​​ទី​​​នោះ​​​រហូត​​​ដល់​​​ម៉ោង​​​ប្រហែល​​​៦​​​ព្រឹក​​​។

ឈ្មោះ ដួង ដេត និយាយ​​​ថា “ពួកគេ​​​បាន​​​វាយ​​​ដំ​​​ពួក​​​យើង​​​ប្រហែល​​​១ម៉ោង”។ បុរស​​​រូប​​​​​​​​​នេះ​​​បាន​​​និយាយ​​​ទៀត​​​ថា ​​​នគរ​​​បាល​​​ប្រហែល​​​​​​​​​ប្រាំនាក់​​​បាន​​​ដាល់​​​មុខ​​​ ដង​​​ខ្លួន​​​ផ្នែក​​​ខាង​​​លើ​​​ ជើង​​​និង​​​ដៃ​​​របស់ពួកគេ​​​។  កាលពីម្សិលមិញ លោក សូយ ថៃ អធិការ​​​​​​​​​ស្រុក​​​លំផាត់ បាន​​​បដិសេធ​​​ថា នគ​​​រ​​​បាល​​​ឃុំ​​​មិន​​​​​​​​​បាន​​​ប្រើ​​​អំពើ​​​ហិង្សា​​​វាយ​​​ដំ​​​​​​ដូច​​​ការ​​​ចោទ​​​ប្រកាន់នោះ​​​ទេ ហើយបាន​​​​​​មាន​​​ប្រសាសន៍​​​ថា បុរស​​​ទាំង​​​នេះ​​​ត្រូវ​​​បាន​​​ចាប់​​​ខ្លួន​​​ដោយ​​​សារ​​​តែ​​​ពួកគេ​​​ស្រវឹង​​​ស្រា​​​​​​បង្ក​​​បញ្ហា។

លោក​​​មាន​​​ប្រសាសន៍​​​ថា “ពួកគេ​​​ជា​​​ក្មេង​​​ទំនើង​​​នៅ​​​ក្នុង​​​ភូមិ​​​នេះ នគរ​​​បាល​​​មិន​​​បាន​​​វាយ​​​ដំពួកគេ​​​នោះទេ។ នគរ​​​បាល​​​គ្រាន់តែ​​​ឃាត់​​​​​​​​​​​​ខ្លួនពួកគេ​​​ប៉ុណ្ណោះ ដោយសារ​​​តែ​​​ពួក​​​គេ​​​ស្រវឹង​​​​​​​​​ស្រា​​​ខ្លាំង​​​ពេក និងដោយ​​​សា​​​រ​​​តែ​​​​​​ពួកគេ​​​អាច​​​ធ្វើ​​​អ្វី​​​ផ្សេង​​​ទៀត​​​​​​”​​​​​​ ដើម្បី​​​បង្ក​​​បញ្ហា​​​។ លោក​​​បាន​​​មាន​​​ប្រសាសន៍​​​បន្ត​​​​​​ថា ពួកគេ​​​ត្រូវ​​​បាន​​​ឃុំ​​​ខ្លួន​​​រហូត​​​ដល់​​​​​​ពួកគេ​​​ស្វាង​​​ស្រា។

លោក រស់ សារ៉ាំ ព្រះរាជ​​​អាជ្ញារ​​ង​​​អម​​​សាលា​​​​​​​​​ដំបូង​​​ខេត្ត​​​រតនគិរី មាន​​​ប្រសាសន៍​​​ថា លោក​​​ទទួល​​​បានពាក្យ​​​បណ្ដឹង​​​ពី​​​ឈ្មោះ​​​ ដួង ដេត ឈ្មោះ ហ៊ឹម ខឿន និង​​​ឈ្មោះ ណុប រី រួច​​​ហើយ​​​ ហើយ​​​លោក​​​នឹង​​​កោះហៅ​​​បុរស​​​ទាំង​​​បីនាក់​​​នេះ​​​ ​​​និង​​​មន្ត្រី​​​នគរ​​​បាល​​​​​​រូប​​​នេះ​​​ទៅ​​​​​​ធ្វើ​​​ការ​​​សាក​​​​​​​​​​​​​​​​​​​​​​​​​​​សួរ​​​នៅ​​​សប្ដាហ៍​​​ក្រោយ​​​៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស