29 C
Phnom Penh

អាជ្ញាធរ​សូម​អភ័យទោស​មន្ត្រី​កង​យោធ​ពល​​ខេមរភូមិន្ទ​ម្នាក់​ចំពោះ​​ការ​ឆែក​ឆេរ​ផ្ទះ​របស់​​គាត់​

ដោយ ឌឹ ខេមបូឌា ដេលី

បទវិភាគ

ឧត្តម​សេនីយ៍​ត្រី​មួយ​រូប​ក្នុង​ជួរ​កង​យោ​ធពល​ខេមរភូមិន្ទ​ ដែល​ផ្ទះ​និង​​ចម្ការ​កៅស៊ូ​របស់​លោ​ក​ស្ថិត​ក្នុង​ខេត្ត​មណ្ឌល​គិរី​ត្រូវ​នគរ​បាល​​ឆ្មក់​ចូល​កាល​ពី​សប្ដាហ៍​មុន​នោះ ​បាន​អះអាង​កាលពី​ម្សិលមិញ​ថា អាជ្ញា​ធរ​បាន​សូម​អភ័យ​ទោស​​លោក​​បន្ទាប់ពី​​លោក​បាន​គំរាម​ប្ដឹង​ពួក​​គេ។

នគរបាល​បាន​​ឆ្មក់​ចូល​ផ្ទះ​របស់​ឧត្តម​សេនី​យ៍ត្រី​ ឈិត​ ម៉េង​ស្រេង​ ស្ថិត​ក្នុង​ស្រុក​​កែវសីមា ហើយ​រឹប​អូស​​បានឈើ​ប្រណីត​ជា​ច្រើន​ដុំ​​ដែល​រក្សាទុក​នៅ​ទីនោះ​ ប៉ុន្តែ​មិន​បាន​ធ្វើ​ការ​ចាប់​ខ្លួន​ទេ។
លោក​ឧត្តមសេនីយ៍​ត្រី ម៉េង​ស្រេង​ បាន​អះអាង​ថា លោក​គ្មាន​​កំហុស​ទេ​ បន្ទាប់​ពី​ការ​ឆ្មក់​ចូល​នោះ​ ហើយ​បាន​ចោទ​ប្រកាន់​អាជ្ញា​ធរ​ពី​បទ​បង្ខូច​កេរ្តិ៍​ឈ្មោះ​របស់​​លោក​។

ដោយ​មិន​បញ្ជាក់ថា នរណាបាន​សូម​​អភ័យ​ទោស​​ចំពោះ​​លោក​ពិត​ប្រាកដ​ ឬ​​ថា​តើ​​សំណុំ​រឿង​​​បិទ​ហើយ​​ឬ​យ៉ាង​ណា​នោះ​ លោក​ឧត្តម​សេនីយ៍​ត្រី​ ម៉េង​​ស្រេង​ ដែល​ជា​មេបញ្ជា​ការ​កង​យោធ​ពល​ខេម​រភូមិន្ទ​ខេត្ត​នេះ​បាន​មាន​ប្រសា​​សន៍​កាលពី​ម្សិលមិញ​ថា “សំណុំ​រឿង​នេះ​ចប់​​សព្វគ្រប់​ហើយ​ ពីព្រោះ​នៅ​ពេល​ខ្ញុំ​បាន​គំរាម​​ប្ដឹង​ពួក​គេ​ អាជ្ញាធរ​ពាក់​ព័ន្ធ​បាន​សូម​អភ័យ​ទោស​ខ្ញុំ​”។

លោក​ សូ សុវិជ្ជា ព្រះរាជអាជ្ញារង​អម​សា​លា​ដំបូង​ខេត្ត​នេះ​ដែ​ល​បាន​ចេញ​ដីការ​ឲ្យ​​នគរបាល​​ឆែក​ឆេរ​ផ្ទះ​របស់់ឧត្តម​សេនីយ៍​ត្រី​រូប​នេះ ​បាន​មាន​ប្រសា​សន៍​កាល​ពី​ម្សិល​មិញ​ថា ខណៈ​​លោក​មិន​បាន​សូម​អភ័យ​​ទោស​​ លោក​មិន​មាន​​គម្រោង​​កោះ​ហៅ​​ឧត្តម​​សេនីយ៍​ត្រី ម៉េង​ស្រេង មក​សាកសួរ​ទេ។ លោក​ថ្លែង​ថា “ខ្ញុំ​មិន​មាន​គម្រោង​​​​កោះ​ហៅ​លោក​មក​សាក​សួរ​ទេ​ ពីព្រោះ​នេះ​​ជា​សមត្ថ​កិច្ច​​រដ្ឋ​បាល​​ព្រៃឈើ​ខេត្ត​”។

លោក អេង​ ប៊ុន​ហ៊ាង​ អភិបាល​ខេត្ត​មណ្ឌល​​គិរី​ដែល​កាល​ពី​សប្ដាហ៍​មុន​បាន​​មា​ន​​ប្រសាសន៍​ថា លោកឧត្តមសេនីយ៍​ត្រី ម៉េង​ស្រេង​ កំពុង​ត្រូវ​បាន​សាកសួរ​ ហើយ​អាច​ប្រឈម​មុខ​ចំពោះមុខ​ច្បាប់​នោះ​ បាន​បដិ​សេធ​មិន​ធ្វើ​អត្ថាធិប្បាយអំពី​សំណុំ​រឿង​នេះទេ​ កាលពី​ម្សិល​មិញ​​។

លោក​ សុខ​ រដ្ឋា អ្នក​សម្រប​សម្រួល​អង្គ​ការ​សិទ្ធិ​មនុស្ស​អាដហុក​ប្រចាំខេត្ត​នេះ​បាន​រិះគន់​អាជ្ញាធរ​ថា មិន​បាន​តាម​ដាន​​រឿង​​នេះ​ឲ្យ​បាន​ត្រឹម​ត្រូវ​។ លោក​បាន​មានប្រសាសន៍​ថា “​រឿង​នេះ​ចម្លែក​ណាស់​ ពួក​គេ​បាន​រក​ឃើញ​ភ័ស្ដុ​តាង​គ្រប់គ្រាន់​នៅ​ផ្ទះ​របស់​ជន​ល្មើស​ទៅ​ហើយ​ ប៉ុន្តែ​ពួក​គេ​បែរ​ជា​សូម​អភ័យ​​ទោស​ជន​ល្មើស​​ទៅ​វិញ​”។

លោក​បាន​បន្ថែមទៀត​​ថា “ខ្ញុំ​គិត​ថា នេះ​គឺដោយ​​សារ​អាជ្ញាធរ​មាន​ភាព​កម្សោយ​ ពួក​គេ​មិន​​អាច​អនុវត្ត​ច្បាប់​ឲ្យ​បាន​ត្រឹម​ត្រូវ​ ឡើយ​ពីព្រោះ​ពួក​គេ​ខ្លាច​អ្នក​មាន​អំណាច​”៕​ សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស