]នគរបាលបានឲ្យដឹងកាលពីម្សិលមិញថា រដ្ឋបាលព្រៃឈើនៅក្នុងខេត្តព្រះវិហារកាលពីថ្ងៃសៅរ៍ បានឆ្មក់ចូលទីកន្លែងស្តុកឈើដាច់ស្រយាលមួយក្នុងស្រុកជាំក្សាន្ត ជាទីដែលពួកគេបានរកឃើញឈើប្រណីតខុសច្បាប់២០០កំណាត់។
យោងតាមលោក នួន សុខុម អនុប្រធានខណ្ឌរដ្ឋបាលព្រៃឈើខេត្តបានឲ្យដឹងថា ឈើ១៥ម៉ែត្រគូប ត្រូវបានរកឃើញរួមមានឈើធ្នង់ បេង និងនាងនួន ហើយត្រូវបានរកឃើញផងដែរបន្ទាប់ពីអ្នកស្រុកបានរាយការណ៍ប្រាប់នគរបាលអំពីទីតាំងឃ្លាំងស្ដុកឈើនេះនៅក្បែរជើងភ្នំដងរែក។
លោកបានមានប្រសាសន៍ថា “យើងបានឆែកឆេរផ្ទះនេះបន្ទាប់ពីទទួលបានដីកាតុលាការខេត្តកាលពីព្រឹកថ្ងៃសៅរ៍ ហើយរកឃើញឈើនេះ”។
លោកបានបន្ថែមថា “យើងបានដឹកឈើនេះទៅកាន់ការិយាល័យខណ្ឌរដ្ឋបាលព្រៃឈើស្រុក ហើ យពេលនេះកំពុងតែស៊ើបអង្កេត ដើម្បីស្វែងរកម្ចាស់ឈើ និងនាំខ្លួនពួកគេទៅតុលាការ”។ ក្នុងករណីដោយឡែកមួយនៅក្នុងខេត្តស្ទឹងត្រែង រដ្ឋបាលព្រៃឈើមូលដ្ឋានបានរកឃើញកំ ណាត់ឈើខុសច្បាប់រាប់ពាន់កំណាត់នៅលើដីសម្បទានសេដ្ឋកិច្ចមួយនៅក្នុងឃុំ
ស្រែគរ ស្រុកសេសាន កាលពីថ្ងៃសុក្រ។
លោក សិទ្ធ សំណាង ប្រធានខណ្ឌរដ្ឋបាលព្រៃឈើក្រុងស្ទឹងត្រែងបានមានប្រសាសន៍ថា មន្ត្រីរបស់លោកបានរកឃើញឈើកប់នៅលើដីរបស់ក្រុមហ៊ុនស៊ីវហ្គិច អិុនវ៉េសមិន ខូអិុលធីឌី ក៏ប៉ុន្តែមិនប្រាកដថា ឈើនេះពិតជារបស់ក្រុមហ៊ុននោះឡើយ។លោកឲ្យដឹងថា “យើងបានរកឃើញឈើរាប់ពាន់កំណាត់ ហើយបានប្រើគ្រឿងយន្តពីរគ្រឿងជីកកកាយដីនោះ។ ពេលនេះយើងកំពុងតាមរកអ្នកទទួលខុសត្រូវឈើនេះ”។
លោក ហ៊ូ សំអុល អ្នកសម្របសម្រួលរបស់អង្គការសិទ្ធិមនុស្សអាដហុក ប្រចាំខេត្តនេះបានមានប្រសាសន៍ថា អាជ្ញាធរបានជីកកកាយដីចំនួន១០កន្លែង និងបានរកឃើញឈើចំនួន១០.០០០កំណាត់ ប្រហែល១.០០០ម៉ែត្រគូប៕ប៊ុននី