នគរបាល និងមន្ត្រីឃុំបាននិយាយកាលពី ម្សិលមិញថា នគរបាលកំពុងរង់ចាំឲ្យបុរសម្នាក់ដឹងខ្លួនវិញ បន្ទាប់ពីប៉ុនប៉ងធ្វើអត្តឃាតដើម្បីចាប់ខ្លួនពីបទរំលោភ ហើយសម្លាប់អតីតគូដណ្តឹងរបស់ខ្លួនក្នុងខេត្តកណ្តាលកាលពីថ្ងៃអាទិត្យ។
លោក សេង ស្រាង អធិការរងនគរបាលស្រុក ពញាឮបានមានប្រសាសន៍ថា ភឿន នី អាយុ២៣ឆ្នាំ បានផឹកថ្នាំកណ្តុរហើយត្រូវបាននគរបាលប្រទះឃើញសន្លប់នៅផ្ទះរបស់ខ្លួន។គ្រួសារជនរងគ្រោះបានជូនដំណឹងទៅនគរបាលថា សពរបស់ស្ត្រីរងគ្រោះត្រូវបានប្រទះឃើញនៅក្នុងចម្ការស្វាយមួយនៅម៉ោង២រសៀល។
នគរបាលបានបញ្ជូន ភឿន នី ទៅកាន់មន្ទីរពេទ្យកាល់ម៉ែតក្នុងរាជធានីភ្នំពេញ ហើយបានរង់ចាំឲ្យជននេះដឹងខ្លួនវិញ។ លោក សេង ស្រាង បានមានប្រសាសន៍ថា “បន្ទាប់ពីបានរំលោភ និងសម្លាប់គូដណ្តឹងរបស់ខ្លួនហើយ ជនសង្ស័យរូបនេះបានព្យាយាមធ្វើអត្តឃាត ប៉ុន្តែ ត្រូវបានជួយសង្គ្រោះ ហើយដឹកទៅកាន់មន្ទីរពេទ្យ” ដោយលោកបន្ថែមថា នៅពេលបុរសរូបនេះដឹងខ្លួនវិញយើងនឹងចាប់ខ្លួនតែម្តង។
យោងតាមលោក អ៊ី កាវីន នាយប៉ុស្តិ៍បានឲ្យដឹងថា ភឿន នី បានសម្លាប់ ហាន ស្រីនាង អាយុ១៨ឆ្នាំនៅម៉ោងប្រហែល៩ព្រឹកថ្ងៃអាទិត្យ បន្ទាប់ពីបានឌុបនាងតាមម៉ូតូរបស់ខ្លួនទៅកាន់ចម្ការស្វាយនៅចម្ងាយប្រហែល៤០០ម៉ែត្រពីភូមិ ព្រៃកុ ល ឃុំឈ្វាំង។
លោក កាវីន បានមានប្រសាសន៍ថា ហាន ស្រីនាង និង ភឿន នី បានស្រឡាញ់គ្នា ហើយបានភ្ជាប់ពាក្យកាលពីឆ្នាំ២០១៣។ ទោះយ៉ាងណា គម្រោងរៀបការរបស់ពួកគេនៅពេលអនាគតបានបាក់បែកដោយសារឪពុកម្តាយស្ត្រីរងគ្រោះមិនយល់ព្រមឲ្យកូនស្រីរបស់ខ្លួនរៀបការជាមួយជនសង្ស័យរូបនេះដែលពួកគាត់គិតថា គ្មានការទទួលខុសត្រូវ ហើយផឹកស៊ីខ្លាំងពេក។
លោកបានមានប្រសាសន៍ថា “ជនសង្ស័យបាននិយាយថា ខ្លួននៅតែស្រឡាញ់គូដណ្តឹងរបស់ខ្លួនបើទោះឪពុកម្តាយរបស់នាងបានផ្តាច់ពាក្យក៏ដោយ” ដោយលោកបន្ថែមថា ជនសង្ស័យបានប្តេជ្ញាថា នឹងយកនាងធ្វើប្រពន្ធឲ្យបាននៅថ្ងៃណាមួយ។
លោក ឃុន ឃិន នាយប៉ុស្តិ៍ឃុំបានមានប្រសាសន៍ថា កោសល្យវិច័យបានបញ្ជាក់ថា ជនរងគ្រោះត្រូវបានរំលោភមុនពេលសម្លាប់ជាក្រោយ។ លោកបានមានប្រសាសន៍ថា “ជនសង្ស័យរូបនេះបានរំលោភរួចសម្លាប់ ហើយបានទុកខោក្នុងរបស់ខ្លួន និងខោក្នុងរបស់នាងនៅក្បែរកន្លែងកើតហេតុ”។ លោក ឃុន ឃិត មានប្រសាសន៍ថា “ស្ត្រីរងគ្រោះមានស្លាកស្នាមត្រង់កដែលបង្ហាញថា នាងត្រូវជនសង្ស័យរឹតកសម្លាប់”៕សារុន