កាលពីម្សិលមិញ លោកនាយករដ្ឋមន្ត្រី ហ៊ុន សែន បានរិះគន់អ្នកគ្រប់គ្រងផ្សាររដ្ឋ ទាំងអស់ដែលទទូចទារភាស៊ីពីអាជីវករនៅពេលព្រឹកជាជាងពេលរសៀលដោយលើកឡើងថា លោកនឹងបញ្ចប់ការអនុវត្តបែបនេះ បន្ទាប់ពីមានការត្អូញត្អែរពីអាជីវករ។
លោក ហ៊ុន សែន បានលើកឡើងនៅក្នុងសុន្ទរកថានៅវិទ្យាស្ថានជាតិអប់រំក្នុងរាជធានីភ្នំពេញថា “ពេលព្រឹក នៅពេលអាជីវករមិនទាន់លក់ដាច់ផង អ្នកទារភាស៊ីបានទាត់ធាក់កញ្ច្រែងបន្លែបាត់ទៅហើយ”។ លោកបានមានប្រសាសន៍ថា “ខ្ញុំបានឮពីទីផ្សារថា អ្នកលក់បានត្អូញត្អែរ ហើយអ្នកទិញក៏បានត្អូញត្អែរដែរ”។
សព្វថ្ងៃការគ្រប់គ្រងផ្សាររដ្ឋភាគច្រើនប្រគល់ទៅឲ្យក្រុមហ៊ុនឯកជន ប៉ុន្តែ លោក ហ៊ុន សែន បានបញ្ជាឲ្យលោក ប៉ា សុជាតិវង្ស អភិបាលរាជធានីភ្នំពេញ ដែលមានវត្តមាននៅពិធីកាលពីម្សិលមិញដែរនោះ ស៊ើបអង្កេតអំពីបញ្ហានោះ ហើយពិនិត្យមើលក្រុមហ៊ុនទាំងនោះកុំឲ្យធ្វើបាបអាជីវករ។
លោកនាយករដ្ឋមន្ត្រីក៏បានត្អូញត្អែរដែរថា អំពើអយុត្តិធម៌ទាំងអស់នៅក្នុងប្រទេសកម្ពុជា មិនថាតូចតាចប៉ុណ្ណាទេ គឺគេគិតថា មកពីរូបលោកទាំងអស់។ លោកបានមានប្រសាសន៍ថា “ប្រសិនបើ មានបញ្ហាណាមួយ បញ្ហាដែលបានកើតឡើងនោះគឺដោយសារនាយករដ្ឋមន្ត្រី។ ប្រសិនបើអ្នកទារភាស៊ីតាមផ្សារទៅទាត់កញ្ច្រែង គេថាបណ្ដាលមកពី ហ៊ុន សែន។ ប្រសិនបើការផ្ដន្ទាទោសរបស់តុលាការមិនយុត្តិធម៌ ក៏បណ្ដាលមកពី ហ៊ុន សែន”។
លោកបានបន្ថែមថា ការពិតតុលាការជាស្ថាប័នឯករាជ្យ ហើយអ្នកទារភាស៊ីធ្វើសកម្មភាពនោះលោកមិនបានដឹងទេ។លោកប្រាប់ពួកគេថា “សូមអ្នកទារភាស៊ីតាមផ្សារទាំងអស់កែប្រែឥរិយាបថរបស់ខ្លួនទៅ៕ សារុន