មន្ត្រីគយម្នាក់បានឲ្យដឹងកាលពីម្សិលមិញថា បុរសពីរនាក់ត្រូវបានចាប់ខ្លួនកាលពីយបថ្ងៃអាទិត្យនៅអាកាសយានដ្ឋានអន្តរជាតិសៀមរាប ដោយសារប៉ុនប៉ងរត់ពន្ធភ្លុកដំរី៧៩គីឡូក្រាម ចេញពីប្រទេស។
លោក អង្គ សុខណូ ប្រធានគយនៅឯអាកាសយានដ្ឋាននេបាះនឲ្យដឹងថា បុរសទាំងពីរនាក់នេះ ជាជនជាតិវៀតណាម និងបានព្យាយាមជិះយន្តហោះទៅកាន់ប្រទេសកូរ៉េខាងត្បូងដោយមានវ៉ាលិសច្រកពេញទៅដោយភ្លុកដំរី ដែលពេលនោះពួកគេត្រូវបានចាប់ខ្លួន។ លោកបានមានប្រសាសន៍ថា “ដំបូង ពួកគេបានបដិសេធថា វ៉ាលិសទាំងបីនោះមិនមែនជារបស់ពួកគេទេ ប៉ុន្តែនៅពេលយើងពិនិត្យលេខលិខិតឆ្លងដែនទៅនឹងអីវ៉ាន់នេះ ឃើញថា វាដូចគ្នា”។
លោក សុខណូបានឲ្យដឹងថា នេះជាការចាប់បានភ្លុកដំរីដំបូងហើយក្នុងឆ្នាំនេះ ប៉ុន្តែថា កាលពីឆ្នាំទៅ អ្នកប៉ុនប៉ងរត់ពន្ធភ្លុកដំរីចំនួនប្រាំនាក់ត្រូវបានចាប់ខ្លួន។ លោក សុខណូ បានបន្ថែមថា “យើងបានប្រគល់បុរសជនជាតិវៀតណាមទាំងនោះទៅមន្ត្រីព្រៃឈើរបស់យើងដើម្បីចាត់ការតាមនីតិវិធីតុលាការកាលពីយប់មិញ និងបញ្ជូនភ្លុកដំរីនេះទៅរក្សាទុកនៅទីស្នាក់ការគយក្នុងរាជធានីភ្នំពេញ”។ ភ្លុកដំរីត្រូវបានគេជឿថា នៅក្នុងបណ្តាប្រទេសខ្លះនៅអាស៊ី ដើម្បីធ្វើជាឱសថ ដែលនាំឲ្យមានការជួញដូរភ្លុកនេះខុសច្បាប់នៅក្នុងតំបន់៕ ប៊ុននី