អ្នកកាសែតពីរនាក់មកពីបណ្តាញផ្សព្វផ្សាយព័ត៌មានដាច់ដោយឡែកពីគ្នានិយាយថាពួកគេត្រូវសាលាដំបូងខេត្តបន្ទាយមានជ័យធ្វើការសាកសួរកាលពីម្សិលមិញជុំវិញការចោទប្រកាន់ថា ពួកគេបានបរិហារកេរ្តិ៍ទាហានម្នាក់នៅក្នុងអត្ថបទរបស់ពួកគេអំពីវិវាទដីធ្លីមួយនៅក្នុងក្រុងប៉ោយបែ៉ត។
លោក ពេជ្រ សុវណ្ណារ៉ា ប្រធានសមាគមការពារអ្នកកាសែតមានព្រំដែនដែលបានចុះផ្សាយអត្ថបទរបស់ខ្លួនតាមប្រព័ន្ធអីុនធើណិត និង លោក ផូូ ប៊ុនថន ដែលធ្វើការឲ្យស្ថានីយទូរទស្សន៍ហង្សមាសបាននិយាយថា លោកស្រី កែវ សុគន្ធា ព្រះរាជអាជ្ញារងអមសាលាដំបូងខេត្តបានកោះហៅពួកគាត់មកសាកសួរជុំវិញពាក្យបណ្តឹងដែលបានប្តឹងកាលពីថ្ងៃទី ៣ខែមករា។
ពាក្យបណ្តឹងដែលប្តឹងដោយលោក ហង្ស ម៉ៅ ជាពាណិជ្ជករ ព្រម ទាំងជាទាហានដែរនោះ ទាក់ទងទៅនឹងអត្ថបទដាច់ដោយឡែកពីគ្នាចំនួនពីរកាលពីថ្ងៃទី៥ខែធ្នូ របស់អ្នកកាសែតទាំងពីរនាក់នេះដែលបានសម្ភាសអ្នកភូមិដែលជាប់ពាក់ព័ន្ធក្នុងវិវាទដីធ្លីជាមួយលោក ហង្ស ម៉ៅ ។
លោក សុវណ្ណារ៉ា ដែលអត្ថបទរបស់លោកចុះផ្សាយពីក្រុមអ្នកភូមិដែលលើកឡើងថា លោក ហង្ស ម៉ៅ បានជាប់ពាក់ព័ន្ធក្នុងវិវាទដីធ្លីជាច្រើនខុសពីធម្មតា ហើយទំនងជាជាប់ពាក់ព័ន្ធនឹងវិវាទជាច្រើនទៀតនោះ មានប្រសាសន៍ថា លោកបានប្រាប់តុលាការថា អត្ថបទរបស់លោកមិនមែនបរិហារកេរ្តិ៍ឡើយ។
លោក សុវណ្ណារ៉ា បានមានប្រសាសន៍ថា “អត្ថបទរបស់ខ្ញុំធ្វើឡើងតាមវិជ្ជាជីវៈដោយបានសម្ភាសគ្រប់ប្រភពទាំងអស់រួមទាំងលោក ហង្ស ម៉ៅ ផងដែរ។ ទាំងលោកស្រី សុគន្ធា និងក្រឡាបញ្ជីរបស់គាត់មិនអាចទាក់ទងបានទេកាលពីម្សិលមិញ។ ទោះយ៉ាងណា លោក ហង្ស ម៉ៅ បានអះអាងថា លោកបានដាក់ពាក្យបណ្តឹងពីបទបរិហារកេរ្តិ៍ប្តឹងអ្នកកាសែតទាំងពីរនាក់នេះ។
លោក ហង្ស ម៉ៅ បានមានប្រសាសន៍ថា “ពួកគេបានបរិហារកេរ្តិ៍ខ្ញុំ ដោយនិយាយថា ខ្ញុំបានចាប់យកដីអ្នកភូមិ ហើយបានបំផ្លាញផ្ទះប្រាំមួយខ្នង ដែលជាប់ពាក់ព័ន្ធក្នុងវិវាទដីធ្លីនោះ”។
លោកបន្ថែមថា “ពួកគេមិនបានសម្ភាសខ្ញុំទេ ហើយជាពិសេសជាងនេះទៅ ទៀតនោះ ជួនកាលពួកគេបានរាយការណ៍ថា ខ្ញុំជាឧត្តមសេនីយ៍ត្រីមួយរូបមកពីកងពលតូចលេខ៧០នៃកងយោធពលខេមរភូមិន្ទ ដែលបានប្រើប្រាស់អំណាចយោធារបស់ខ្លួនចាប់យកដីរបស់អ្នកភូមិ”។
លោក ហង្ស ម៉ៅ ដែលបានលើកឡើងថា លោកជាទាហានធម្មតាម្នាក់នៅក្នុងកងពលតូចលេខ៧០នោះបានពន្យល់ថា “គោលបំណងដែលខ្ញុំដាក់ពាក្យបណ្តឹងគឺសុំឲ្យអ្នកកាសែតទាំងពីររូបនេះចាក់ផ្សាយនិងចុះផ្សាយឡើងវិញថា ខ្ញុំមិនបានប្រើប្រាស់អំណាចយោធាឃុបឃិតជាមួយអាជ្ញាធរ និងតុលាការចាប់យកដីរបស់ប្រជាពលរដ្ឋ”។
អ្នកកាសែតទាំងពីររូបនេះបាននិយាយថា ឥឡូវនេះពួកគេកំពុងពិចារណាប្តឹងបកលោក ហង្ស ម៉ៅ វិញពីបទបរិហារកេរ្តិ៍ ចំពោះការធ្វើពាក្យបណ្តឹងពីបទបរិ ហារកេរ្តិ៍។
លោក ស៊ុម ចាន់គា អ្នកសម្របសម្រួលនៅអង្គការសិទ្ធិមនុស្សអាដហុកប្រចាំខេត្តនេះបានមានប្រសាសន៍ថា លោក ហង្ស ម៉ៅ គួរសុំឲ្យអ្នកកាសែតទាំងពីររូបនេះធ្វើការកែតម្រូវបានហើយ។
លោក ស៊ុម ចាន់គា បានមានប្រសាសន៍ថា ប្រសិនបើនរណាម្នាក់មិនពេញចិត្តនឹងព័ត៌មាននោះ ពួកគេគួរសុំឲ្យកាសែត ឬគេហទំព័រធ្វើការកែតម្រូវជាជាងការប្រើប្រព័ន្ធតុលាការមកគាបសង្គត់អ្នកកាសែត”៕សារុន