ក្រុមមន្ត្រីបានឲ្យដឹងកាលពីម្សិលមិញថា មនុស្សប្រាំពីរនាក់បានស្លាប់ និង២៤នាក់របួសនៅក្នុងគ្រោះថ្នាក់ចរាចរណ៍ដាច់ដោយឡែកពីគ្នាបីលើកពាក់ព័ន្ធនឹងរថយន្តដឹកសាំងរបស់ក្រុមហ៊ុនមួយចំនួនក្នុងចំណោមក្រុមហ៊ុនប្រេងឥន្ធនៈធំៗនៅក្នុងប្រទេសកម្ពុជា។នៅក្នុងគ្រោះថ្នាក់ចរាចរណ៍ទាំងបីលើកនោះ នគរបាលបានឲ្យដឹងថា អ្នកបើកបររថយន្តធុនធំជាអ្នកទទួលខុសត្រូវ។
លោក សឿន សារឿន អនុប្រធាននគរបាលចរាចររាជធានីភ្នំពេញផ្នែកស្ថិតិបានមានប្រសាសន៍ថា គ្រោះថ្នាក់ចរាចរណ៍ចុងក្រោយបានកើតឡើងកាលពីរសៀលថ្ងៃច័ន្ទ នៅម៉ោងប្រហែល៤រសៀលតាមផ្លូវជាតិលេខ៥ស្ថិតក្នុងខណ្ឌឫស្សីកែវ រាជធានីភ្នំពេញនៅពេលដែលរថយន្តរបស់ក្រុមហ៊ុនសូគីម៉ិចមួយគ្រឿងបានកិនក្មេងប្រុសអាយុ២ឆ្នាំ និងម្ដាយរបស់វាស្លាប់ ហើយមនុស្សបីនាក់ទៀតរងរបួស ពេលដែលអ្នកទាំងនេះកំពុងអង្គុយនៅលើចិញ្ចើមផ្លូវ។
នគរបាលចាប់ខ្លួនអ្នកបើកបររថយន្តនោះ ដែលគេមិនទាន់បង្ហាញឈ្មោះ និងអាយុ ប៉ុន្តែលោក សារឿន បាននិយាយថា អ្នកបើកបរនោះស្រវឹងស្រានៅពេលបង្កគ្រោះថ្នាក់ចរាចរណ៍។ លោកបានមានប្រសាសន៍ថា “ អ្នកបើកបររថយន្តរបស់ក្រុមហ៊ុនសូគីម៉ិចស្រវឹងស្រា”។លោកបន្ថែមថា ជននេះនឹងត្រូវបញ្ជូនទៅតុលាការនៅពេលឆាប់ៗនេះ។
លោក ម៉ៅ សាម៉េត ប្រធានការិយាល័យនគរបាលចរាចរខេត្តព្រៃវែងមានប្រសាសន៍ថា កាលពីយប់ថ្ងៃច័ន្ទ នៅម៉ោងប្រហែល១២និង៣០នាទីរំលងអធ្រាត្រនៅតាមផ្លូវជាតិលេខ៨ ស្ថិតក្នុងស្រុកពារាំង ខេត្តព្រៃវែង រថយន្តរបស់ក្រុមហ៊ុនប្រេងឥន្ធនៈតេលា បានបុករថយន្តវ៉ែនមួយគ្រឿង បណ្ដាលឲ្យមនុស្សបីនាក់ស្លាប់និងអ្នកដំណើរ១៦នាក់ទៀតរងរបួស។ លោក សាម៉េត បានមានប្រសាសន៍ថា បុរសអាយុ២៤ឆ្នាំម្នាក់ និងស្ត្រីអាយុ១៧ឆ្នាំម្នាក់បានស្លាប់ភ្លាមៗ ចំណែកឯស្ត្រីអាយុ៥០ឆ្នាំម្នាក់ទៀតបានស្លាប់នៅតាមផ្លូវពេលបញ្ជូនទៅកាន់មន្ទីរពេទ្យបង្អែកខេត្ត។ក្រោយមក នគរបាលបានចាប់ខ្លួនអ្នកបើកបរដែលបានបាក់ជើងទាំងពីរនៅក្នុងគ្រោះថ្នាក់ចរាចរណ៍នោះ ។លោក សាម៉េត បានមានប្រសាសន៍ថា “ វាជាកំហុសរបស់អ្នកបើកបររថយន្តធុនធំ ដែលបានបត់ឆ្វេង ហើយបុករថយន្តវ៉ែនតែម្ដង”។ លោកបានបន្ថែមថា អ្នករងរបួសត្រូវបានបញ្ជូនទៅកាន់មន្ទីរពេទ្យបង្អែកខេត្ត។
គ្រោះថ្នាក់ចរាចរណ៍ទី៣ បានកើតឡើងកាលពីថ្ងៃអាទិត្យ នៅក្នុងក្រុងកំពង់ចាម ខេត្តកំពង់ចាម។
លោក ឡុង ម៉េងសែ ប្រធានការិយាល័យនគរបាលចរាចរខេត្តបានមានប្រសាសន៍ថា អ្នកបើកបររថយន្តដឹកសាំងឲ្យក្រុមហ៊ុនក្នុងស្រុកឈ្មោះ ថារី បានបើកបរក្នុងល្បឿនលឿនតាមផ្លូវជាតិលេខ៧ ហើយបានបុកជាមួយម៉ូតូមួយគ្រឿង និងរថយន្តមួយគ្រឿងទៀត។ លោក ម៉េងសែ បានមានប្រសាសន៍ថា បុរសអាយុ៥៥ឆ្នាំម្នាក់ និងក្មេងប្រុសអាយុ២ឆ្នាំ ដែលបានធ្វើដំណើរតាមម៉ូតូបានស្លាប់ភ្លាមៗ ចំណែកមនុស្សប្រាំនាក់ទៀតដែលជិះក្នុងរថយន្តបានរងរបួស។ លោកបានបន្ថែមថា អ្នកបើកបររថយន្តដឹកប្រេងឥន្ធនៈបានគេចខ្លួនពីកន្លែងកើតហេតុ។ លោកបានមានប្រសាសន៍ថា “ អ្នកបើកបររថយន្តធុនធំបានរំលោភច្បាប់ចរាចរណ៍ ពីព្រោះបើកបរក្នុងល្បឿនលឿន។ ឥឡូវនេះ យើងកំពុងរៀបចំឯកសារដើម្បីបញ្ជូនទៅតុលាការ”។
ស្ត្រីឈ្មោះ សេង ចន្ធូ លេខាផ្ទាល់របស់លោក សុខ គង់ ដែលជាម្ចាស់ក្រុមហ៊ុនសូគីម៉ិច បានបដិសេធមិនធ្វើអត្ថាធិប្បាយទេ។ បុគ្គលិកជាស្ត្រីម្នាក់នៅក្រុមហ៊ុនប្រេងឥន្ធនៈតេលាដែលបដិសេធមិនប្រាប់ឈ្មោះដែរនោះក៏បានបដិសេធមិនធ្វើអត្ថាធិប្បាយដែរ ហើយបាននិយាយថា ប្រធានរបស់គាត់ជាប់រវល់។
យោងតាមគេហទំព័រស្នងការនគរបាលជាតិបានឲ្យដឹងថា នៅថ្ងៃច័ន្ទ មួយប៉ុណ្ណោះ មនុស្ស១១នាក់បានស្លាប់ និង៣៧នាក់បានរងរបួសនៅក្នុងគ្រោះថ្នាក់ចរាចរណ៍ដាច់ដោយឡែកពីគ្នា១៤ករណី រួមទាំងគ្រោះថ្នាក់ចរាចរណ៍ពីរលើកពាក់ព័ន្ធរថយន្តរបស់ក្រុមហ៊ុនសូគីម៉ិច និងក្រុមហ៊ុនតេលាផង៕សារុន