មេបញ្ជាការរងកងពលតូចលេខ៧០នៃកងយោធពលខេមរភូមិន្ទបានមានប្រសាសន៍កាលពីថ្ងៃអង្គារថា ទាហានប្រដាប់អាវុធនឹងបន្តល្បាតនៅផ្លូវវេងស្រេង ដែលមានរោងចក្រជាជួរអមសងខាងក្នុងខណ្ឌពោធិ៍សែនជ័យ រាជធានីភ្នំពេញ ទីដែលកម្លាំងកងរាជអាវុធហត្ថបានបាញ់សម្លាប់កម្មករប្រាំនាក់អំឡុងកូដកម្មទូទាំងប្រទេសមួយកាលពីខែមុន រហូតទាល់តែស្ថានភាពចលាចលនៅក្នុងវិស័យកាត់ដេរស្ងប់ស្ងាត់ទៅវិញ។
ទាហានមកពីកងពលតូចលេខ៧០ និងកងពលតូចលេខ៩៩នៃកងយោធពលខេមរភូមិន្ទ ដែលស្ពាយសម្ញែងកាំភ្លើងវែងអាកា៤៧ និងដែលត្រូវបានបញ្ជូនទៅកាន់តំបន់នោះជាលើកដំបូង បន្ទាប់ពីមានការបង្ក្រាបបង្ហូរឈាមលើកូដកម្មកាលពីខែមុន បានបង្ហាញវត្តមាននៅតាមបណ្ដោយផ្លូវវេងស្រេងចាប់តាំងពីការបដិសេធរបស់កម្មករមិនធ្វើការបន្ថែមម៉ោង ដែលដឹកនាំដោយសហជីពបានចាប់ផ្ដើមកាលពីថ្ងៃច័ន្ទមក។
នៅពេលសាកសួរអំពីវត្តមាននៃកងកម្លាំងរបស់ខ្លួនតាមបណ្ដោយផ្លូវនេះកាលពីថ្ងៃអង្គារ ឧត្តមសេនីយ៍ ហែម ថា មេបញ្ជាការរងកងពលតូចលេខ៧០បានមានប្រសាសន៍ថា “យើងដាក់ពង្រាយកម្លាំងរបស់យើងដើម្បីការពារសន្ដិសុខជូនប្រជាពលរដ្ឋនិងកម្មករ និងដើម្បីធ្វើឲ្យវិនិយោគិនមានការជឿទុកចិត្ត”។លោកបានមានប្រសាសន៍បន្ថែមទៀតថា “នៅពេលស្ថានភាពវិលទៅរកសភាពធម្មតា យើងនឹងបញ្ជូនពួកគេទៅកាន់អង្គភាពរបស់ពួកគេវិញ”។
កម្មករដែលដើរចេញពីរោងចក្រនានានៅពេលចប់ម៉ោងការងាររបស់ខ្លួននៅម៉ោង៤រសៀលកាលពីម្សិលមិញ និងដែលភាគច្រើនបានមើលឃើញសកម្មភាពកម្លាំងកងរាជអាវុធហត្ថបង្ក្រាបបង្ហូរឈាមលើកូដកម្មរបស់កម្មកររោងចក្រកាត់ដេរកាលពីខែមុនបណ្ដាលឲ្យអ្នកតវ៉ាប្រាំនាក់ត្រូវគ្រាប់កំាភ្លើងបាត់បង់ជីវិតនោះ បាននិយាយថា ពួកគេមិនដឹងពីគោលបំណងរបស់ទាហានទាំងនេះទេ។ “ពេលខ្លះនៅពេលពួកយើងចេញពីធ្វើការលឿន ពួកគេសួររកមូលហេតុ” នេះជាការលើកឡើងរបស់កម្មការិនីម្នាក់ឈ្មោះ វុន អ៊ីតាន អាយុ២៧ឆ្នាំ ដែលបានចូលរួមនៅក្នុងកូដកម្មមិនធ្វើការបន្ថែមម៉ោងនេះ ប៉ុន្តែនាងមានការព្រួយបារម្ភចំពោះសមត្ថភាពរបស់សហជីពនៅក្នុងការបន្តផែនការសម្រាប់កូដកម្មទូទាំងប្រទេសលើកទី២ ដែលនឹងធ្វើឡើងនៅខែក្រោយនេះ ។
នាងបាននិយាយទៀតថា “អ្នកខ្លះមិនហ៊ានធ្វើបាតុកម្មទៀតទេ ពីព្រោះពួកគេភ័យខ្លាចជាខ្លាំង។ នៅពេលទាហានបង្ហាញមុខ អ្នកគ្រប់គ្នាមានការភ័យខ្លាចជាខ្លាំង”។
កម្មករម្នាក់ទៀតឈ្មោះ ឃុំ បារំាង អាយុ២៤ឆ្នាំបានបញ្ចេញទស្សនយល់ឃើញដូចកម្មករផ្សេងៗទៀតដែរ ពាក់ព័ន្ធនឹងការដើរចេញពីវេនការងាររបស់ខ្លួនថា “យើងកំពុងស្ថិតក្នុងស្ថានភាពលំបាក។ យើងមានការភ័យខ្លាច ពីព្រោះយើងដឹងថា ពួកគេនឹងបាញ់មកលើពួកយើង ប៉ុន្តែប្រសិនបើកម្មករផ្សេងៗទៀតធ្វើកូដកម្ម យើងត្រូវតែចូលរួមជាមួយពួកគេ”។
នៅខាងក្នុងសួនឧស្សាហកម្មកាណាឌីយ៉ា ដែលជាចំណុចស្នូលនៃការផ្ទុះបាតុកម្មនៅលើកំណាត់ផ្លូវវេងស្រេងកាលពីខែមុន អង្គភាពមួយមកពីកងពលតូចលេខ៩៩ បានបង្កើតប៉ុស្ដិ៍ប្រចាំការតូចមួយនៅច្រកចូលទៅកាន់រោងចក្រចំនួនពីរ។
ទាហានម្នាក់ ដែលចាំឃ្លាំមើលសកម្មភាពនៅប៉ុស្ដិ៍ប្រចាំការតូចនេះបានប្រាប់អ្នកយកព័ត៌មាន ដែលដើរកាត់ទីនោះថា “ប្រសិនបើអ្នកឯងចូលទៅទីនោះ នឹងមានបញ្ហាធំ” ប៉ុន្តែទាហានម្នាក់នេះបានបដិសេធមិនឆ្លើយសំណួរពាក់ព័ន្ធនឹងវត្តមានរបស់យោធានេះទេ។ ទាហានដដែលបាននិយាយទៀតថា “យើងគ្រាន់តែមកទីនេះ ដើម្បីការពារសន្ដិសុខតែប៉ុណ្ណោះ”។
នៅតាមបណ្ដោយផ្លូវវេងស្រេង ទាហានម្នាក់ដែលអះអាងថា ខ្លួនជាមេដឹកនាំអង្គភាពមួយនៃកងពលតូចលេខ៧០ ប៉ុន្តែដែលសុំមិនបញ្ចេញឈ្មោះបានលើកឡើងថា កងកម្លាំងរបស់លោកដឹងច្បាស់ពីផែនការធ្វើកូដកម្មជាថ្មីនេះ។
អង្គុយនៅឯហាងកាហ្វេមួយឆ្លងផ្លូវពីសួនឧស្សាហកម្មនេះ លោកបានមានប្រសាសន៍ថា “យើងបានឮថា ស្ថានភាពប្រហែលជាមិនធ្ងន់ធ្ងរខ្លាំងប៉ុន្មានទេ។ មានអាជ្ញាធរនៅតាមបណ្ដោយផ្លូវនេះ ហើយប្រសិនបើមានបញ្ហាកើតឡើងនៅកន្លែងផ្សេង យើងនឹងទៅកាន់ទីនោះ ហើយប្រាប់ឲ្យពួកគេបំបែកគ្នា”។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាបានមានប្រសាសន៍ថា វត្តមានរបស់យោធានេះគួរឲ្យភ័យខ្លាច ប៉ុន្តែមិនអាចរារាំងកូដកម្មទូទាំងប្រទេសលើកទី២បានឡើយ។លោកបានមានប្រសាសន៍បន្ថែមទៀតថា “នឹងគ្មានបញ្ហាអ្វីកើតឡើងទេ ពីព្រោះកម្មករអាចនៅតែផ្ទះ។ វាអាចមានបញ្ហាប្រសិនបើកម្មករព្យាយាមប្រមូលផ្ដុំឬហែក្បួន ប៉ុន្តែយើងមិនទាន់មានផែនការធ្វើបែបនោះនៅឡើយទេ”៕សុខុម