27 C
Phnom Penh

តុលាការ​បញ្ចប់​សវនាការ​ជំនុំ​ជម្រះ​រឿង​ក្តី​​ក្រុម​ប្រឆាំង​នៃ​ចលនា​អំណាច​ពល​រដ្ឋ​ខ្មែរ

ដោយ ឌឹ ខេមបូឌា ដេលី

បទវិភាគ

ដោយ​សា្តាប់​សេចក្តីថ្លែងការណ៍​ចាស់​ៗ​រយៈ​ពេល​ជា​ច្រើន​ម៉ោង​ពី​ក្រុម​ប្រឆាំង​ កាល​​​ពី​​​ម្សិលមិញ សាលា​​​ដំបូង​​​រាជ​​​ធានី​ភ្នំពេញ​​​បាន​​​បញ្ចប់​​​សវនា​ការ​ជំនុំ​​​ជម្រះ​​​​​​​​​រយៈ​​​ពេល​​​បី​​​ថ្ងៃ​​​​​​លើ​លោក សួន សេរី​​​រដ្ឋា ជន​​​ជាតិ​​​ខ្មែរ​​​​​​និរទេស​​​ខ្លួន​​​ឯង​​​ និង​​​មនុស្ស​​​បី​​​នាក់​​​ទៀត​​​ ដែល​​​ជាប់​​​ចោទ​​​ពី​បទ​​​ឃុប​​​ឃិត​​​ ដើម្បី​​​ផ្តួល​​​រំលំ​​​រដ្ឋាភិបាល​​​របស់​​​លោក​​​នាយក​​​រដ្ឋ​​​មន្ត្រី​​​ ហ៊ុន សែន ។

លោក សួន សេរី​រដ្ឋា ប្រធាន​​​ចលនា​​​អំណាច​​​ពល​​​រដ្ឋ​​​ខ្មែរ​​​ ដែល​​​មាន​​​មូល​​​ដ្ឋាន​​​នៅ​​​សហ​​​រដ្ឋ​​​អាមេរិក​​​ត្រូវ​​​បាន​​​ចោទ​​​ប្រកាន់​​​ពី​​​បទ​​​​​​មាន​​​​ផែន​​​ការ​​​វាយ​​​ប្រហារ​​​រដ្ឋាភិបាល​​​ និង​​​​រារាំង​​​ការ​​​បោះ​​​ឆ្នោត​​​ ហើយ​​​ត្រូវ​​​បាន​​​ផ្តន្ទា​ទោស​​​កំបាំង​​​មុខ។

​​​ចុង​​​ចោទ​​​បី​​​នាក់​​​ទៀត​​​ដែល​​​កំពុង​​​ជាប់​​​ឃុំ​​​ប្រឈម​​​នឹង​​​ការ​​​ចោទ​​​ប្រកាន់​ដ​​​ូច​​​គ្នា​​​នឹង​​​លោក​​​ សួន សេរី​​​រដ្ឋា ដែរ​​​ពី​បទ​​​ព្យាយាម​​​ចែក​​​អាវ​​​យឺត​​​ចលនា​​​អំណាច​​​ពល​​​រដ្ឋ​​​ខ្មែរ​​​កាល​​​ពី​​​ឆ្នាំ​​​មុន​​​ដោយ​​​មាន​​​សារ​​​ជំរុញ​​​ឲ្យ​​​ប្រជា​​​ជន​​​កុំ​​​ទៅ​​​បោ​​​ះ​ឆ្នោត​​​នៅ​​​ពេល​​​បោះ​​​ឆ្នោត​​​ជាតិ។

បន្ទាប់​​​ពី​​​បោះ​​​ឆ្នោត​​​រួច​​​ លោក សួន សេរី​​​រដ្ឋា ក៏​​​បាន​​​ព្យាយាម​​​រៀប​​​ចំ​​​ចែក​​​ផ្កា​​​កុលាប​​​ពណ៌​​​លឿង​​​ដល់​​​កម្លាំង​​​សន្តិសុខ​​​ក្នុង​​​រាជ​​​ធានី​​​ភ្នំពេញ​​​ជា​​​មួយ​​​ស្ទីក​​​គ័រ​​​ជំរុញ​​​ឲ្យ​​​ពួក​​​គេ​​​ “បែរ​​​កាណុង​​​កាំ​​​ភ្លើង​​​ដាក់​​​ជន​​​ផ្ដាច់​​​ការ”។

នៅ​​​សវនាការ​​​កាល​​​ពី​​​ម្សិលមិញ ក្រឡា​​​បញ្ជី​​​ម្នាក់​​​បាន​​​អាន​​​​​សេចក្តីថ្លែង​ការណ៍​​ថា លោក សួន សេរី​រដ្ឋា តាម​ចោទ​ថា ​​​បាន​​​និយាយ​​​ទៅ​​​កាន់​​​អ្នក​​​គាំទ្រ​​​នៅ​​​សហរដ្ឋ​​​អាមេរិក​​​ និង​​​ប្រទេស​​​បារាំង​​​កាល​​​ពី​​​ឆ្នាំ​​​២០១២ និង​​​ឆ្នាំ​​​២០១៣​​​។

ដោយ​​​ប្រើ​​​ពាក្យ​​​បែប​​​ប្រមាថ​​​ដល់​​​ជន​​​ជាតិ​​​វៀតណាម​​​ មុន​​​ពេល​​​អំពាវ​​​នាវ​​​ឲ្យ​​​ផ្តួល​​​រំលំ​​​លោក​​​នាយក​​​រដ្ឋ​​​មន្ត្រី​នោះ សេចក្តីថ្លែង​ការណ៍​មួយ​មាន​ខ្លឹមសារ​​​​ថា “រដ្ឋាភិបាល​​​​​​ហ៊ុន សែន គឺ​​​ជា​​​រដ្ឋាភិបាល​​​កុម្មុយ​នីស្ត​​​ ដែល​​​លើក​​​បន្តុប​​​ដោយ​​​រដ្ឋាភិបាល​​​យួន​​​ក្នុង​​​ទី​​​ក្រុង​​​ហាណូយ​​​ ហើយ​ជា​​​រដ្ឋា​ភិបាល​​​អាយ៉ង​​​យួន​​​” ​​​។

ក្នុង​​​ចំណោម​​​បុរស​​​បី​​​នាក់​​​ដែល​​​ជាប់​​​ឃុំ​​​  បុរស​ពីរ​​​នាក់​​​បាន​​​សារភាព​​​ថា ពួកគេមាន​​​អាវ​​​យឺ​​​ត​​​របស់​​​ចលនា​​​អំណាច​​​ពល​​​រដ្ឋ​​​ខ្មែរមែន​​​ ប៉ុន្តែ បានបដិសេធ​​​ថា មិន​​​បាន​​​ចូល​​​រួម​​​ក្នុង​​​សកម្ម​​​ភាព​​​ណា​​​មួយរបស់​​​ចលនា​​​អំណាច​​​ពល​​​រដ្ឋ​​​ខ្មែរ​​​​​​ឡើយ​​​។

លោក មាស​​​ ច័ន្ទពិសិដ្ឋ​​​ ព្រះ​​​រាជ​​​អាជ្ញា​រង​​​អម​​​សាលា​​​ដំបូង​​​រាជ​​​ធានី​ភ្នំពេញ​​​​កាល​​​ពី​ម្សិល​មិញ​​​ បាន​​​ជំរុញ​​​ឲ្យ​​​តុលាការ​​​ផ្តន្ទា​ទោស​​​អ្នក​​​ទាំង​​​អស់​​​នេះ​​​។ លោក​​​បាន​មាន​​​ប្រសាសន៍​​​ថា “លោក សួន សេរីរដ្ឋា ​​​គឺ​​​ជា​​​មេខ្លោង​​​ ហើយ​​​សមាជិក​​​របស់​​​គាត់​​​ធ្វើ​​​សកម្មភាព​​​ប្រឆាំង​​​រដ្ឋា​ភិបាល​​​ដើម្បី​​​ផ្តួល​​​រំលំ​​​រដ្ឋាភិបាល​​​”។

លោក សុក សំអឿន  មេធាវី​​​ការ​​​ពារ​​​ចុង​​​ចោទ​​​បាន​​​លើក​​​ឡើង​​​ថា សេចក្តីថ្លែង​ការណ៍​របស់​​​​​​លោក សួន សេរីរដ្ឋា ​​​មិន​​​ចាត់​​​ទុក​​​ថា ជា​​​ការ​​​រំលោភ​​​ច្បាប់​​​ទេ ហើយ​​​ថា ក្នុង​​​ករណី​​​នេះ ​កូន​​​ក្តី​​​របស់​​​លោក​​​បី​​​នាក់​​​ទៀត​​​មិន​​​ត្រូវ​​​ចាត់​​​ទុក​​​ថា ជាប់​​​ពាក់​​​ព័ន្ធ​​​ក្នុង​​​ករណី​​​ដូច​​​គ្នា​​​នេះ​​​ឡើយ​​​។

លោក​​​បាន​​​មាន​​​ប្រសាសន៍​​​ថា “សូម​​​កុំ​​​ប្រើ​​​សេចក្តីថ្លែង​ការណ៍​​របស់​​​លោក សួន សេរី​រដ្ឋា ​​​ចោទប្រកាន់​មក​លើក​ចុងចោទ​​​ផ្សេង​​​ទៀត​​​។ សូម​​​តុលាការ​​​សម្រេច​​​​​​ឲ្យ​​​បុរស​​​ទាំង​​​បួន​​​នាក់​​​នេះ​​​រួច​​​ផុត​​​ពី​​​ការ​​​ចោទ​​​ប្រកាន់”។

ប្រសិន​​​បើ​​​ត្រូវ​​​បាន​​​ផ្តន្ទា​​​ទោស​​​ អ្នក​​​ទាំង​​​បួន​​​អាច​​​ប្រឈម​​​នឹង​​​ការ​​​ជាប់​​​ពន្ធនាគារ​​​រហូត​​​ដល់​​​១០​​​ឆ្នាំ។ លោក តុប ឈុន​​​ហេង ចៅ​​​ក្រម​​​ប្រធាន​​​ក្រុម​​​ប្រឹក្សា​​​ជំនុំជម្រះ​​​បាន​​​មាន​​​ប្រសាសន៍​​​ថា តុលាការ​​​​​​នឹង​​​ប្រកាស​​​សាល​​​ក្រម​​​នៅ​​​ថ្ងៃ​​​ទី​​​១៤ ខែ​​​មករា​​​​​​​​​​​៕សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស