ការតវ៉ាពីសំណាក់មន្ត្រីគណបក្សសង្គ្រោះជាតិម្នាក់ដែលត្រូវបានបណ្តេញចេញកាលពីថ្ងៃព្រហស្បតិ៍ពីគណបក្សប្រឆាំងនេះធ្វើឲ្យមានការចាប់អារម្មណ៍កាលពីម្សិលមិញនៅពេលគាត់មានជម្លោះជាមួយអតីតសហសេវិក ជាមនុស្សម្នាក់ដែលបានយកទូរស័ព្ទរបស់លោកស្រីជំនួសឲ្យការជំពាក់ប្រាក់២០ដុល្លារ។
គណៈកម្មាធិការវិន័យរបស់គណបក្សសង្គ្រោះជាតិបានបណ្តេញលោកស្រី ឡាក់ សុភាព ជំនួយការផ្ទាល់របស់លោក កឹម សុខា អនុប្រធានគណបក្ស បន្ទាប់ពីអ្នកស្រីបានធ្វើការអះអាងជាសាធារណៈថា លោក សម រង្ស៊ី ប្រធានគណបក្សសង្គ្រោះជាតិបានយកប្រាក់ប្រហែល២០លានដុល្លារដោយខុសច្បាប់។
នៅក្បែរខ្លោងទ្វារចូលទីស្នាក់ការគណបក្សសង្គ្រោះជាតិនៅក្នុងខណ្ឌមានជ័យ រាជធានីភ្នំពេញ លោកស្រី ឡាក់ សុភាព បានដឹកនាំការតវ៉ាតូចមួយកាលពីម្សិលមិញដោយមានអ្នកគាំទ្រប្រហែល២០នាក់ ដែលពួកគេបានរិះគន់គណបក្សប្រឆាំងនេះពីបទបណ្តេញលោកស្រី សុភាព ចេញ។
លោកស្រី សុភាព បានមានប្រសាសន៍នៅកន្លែងតវ៉ាដោយនិយាយអាក្រក់ពីគណបក្សសង្គ្រោះជាតិថា “ខ្ញុំនឹងមិនត្រឡប់ទៅវិញទេទោះក្នុងកាលៈទេសៈណាក៏ដោយ”។
លោកស្រីបានមានប្រសាសន៍ថា “មានបក្ខពួកនិយមនៅក្នុងគណបក្ស ដូចជានៅក្នុងគណៈកម្មាធិការអចិន្ត្រៃយ៍ ដែលមានលោក កឹម សុខា កូនស្រីរបស់លោក លោក សម រង្ស៊ី ប្រពន្ធរបស់លោក លោក គួយ ប៊ុនរឿន និងលោក អេង ឆៃអ៊ាង ដែលជាបងប្អូនថ្លៃនឹងគ្នា និងលោកស្រី កែ សុវណ្ណរតន៍ និងប្តីរបស់គាត់គឺលោក យឹម សុវណ្ណ ជាដើម”។
ក្នុងចំណោមអ្នកគាំទ្រទាំង២០នាក់ដែលលោកស្រី សុភាពបានឲ្យមកជួបជុំគ្នានៅទីស្នាក់ការកណ្តាលគណបក្សប្រឆាំងនេះ ភាគច្រើនលើកឡើងថា លោកស្រីមិនបានប្រាប់ពួកគាត់ពីមូលហេតុដែលពួកគាត់ធ្វើការតវ៉ានោះឡើយ។
សេង សុខេង អាយុ៦០ឆ្នាំ ដែលបានធ្វើដំណើរមកពីខេត្តតាកែវ បានមានប្រសាសន៍ថា “លោកស្រីបានប្រាប់ពួកយើងឲ្យមកកាន់ទីស្នាក់ការគណបក្សសង្គ្រោះជាតិ ហើយខ្ញុំមិនដឹងថា យើងមកតវ៉ាប្រឆាំងនឹងគណបក្សសង្គ្រោះជាតិឡើយ ហើយខ្ញុំមកតាមគាត់ប្រាប់តែប៉ុណ្ណោះ។ ប្រសិនបើខ្ញុំដឹងថា យើងមកតវ៉ានឹងគណបក្សសង្គ្រោះជាតិ ខ្ញុំនឹងមិនមកទីនេះឡើយ”។
អ្នកផ្សេងទៀតបាននិយាយថា ពួកគេបានគាំទ្រលោកស្រី សុភាព ដោយអះអាងថា លោកស្រីគឺជាសមាជិកជាប់ឆ្នោតរបស់គណៈកម្មាធិការអចិន្ត្រៃយ៍គណបក្សសង្គ្រោះជាតិ ហេតុដូចនេះហើយមិនអាចត្រូវបណ្តេញចេញភ្លាមៗឡើយ។
មឿន ណុន អាយុ៧០ឆ្នាំមកពីខេត្តកំពង់ស្ពឺបាននិយាយថា “ខ្ញុំមកតវ៉ានឹងគណបក្សសង្គ្រោះជាតិដែលបានប្រព្រឹត្តអំពើពុករលួយ ចាប់តាំងពីយើងបានបោះឆ្នោតឲ្យលោកស្រី។ ហេតុអ្វីបានជាគណបក្សសង្គ្រោះជាតិមិនសួរប្រជាជនពីរឿងនេះសិន?”។
ការតវ៉ារបស់លោកស្រី សុភាពត្រូវបានឆ្លើយតបភ្លាមៗដោយការតវ៉ាតបវិញរបស់អ្នកគាំទ្រគណបក្សសង្គ្រោះជាតិប្រហែល៣០នាក់ដែលបានប្រមូលផ្តុំគ្នាដើម្បីព្យាយាមបង្ខំឲ្យក្រុមនេះចាកចេញពីបរិវេណគណបក្សសង្គ្រោះជាតិ។
ជម្លោះបានផ្ទុះឡើងបន្ទាប់ពីអ្នកលក់កាហ្វេម្នាក់នៅក្បែរទីស្នាក់ការគណបក្សសង្គ្រោះជាតិបានអះអាងថា លោកស្រី សុភាព បានទិញភេសជ្ជៈរបស់គាត់មិនឲ្យលុយ។
អ្នកលក់កាហ្វេរូបនេះបាននិយាយថា “គាត់ជំពាក់ថ្លៃកាហ្វេខ្ញុំ១.០០០រៀល ហើយគាត់មិនទាន់បានឲ្យលុយខ្ញុំនៅឡើយទេ ដូច្នេះសូមឲ្យលុយខ្ញុំឥឡូវនេះមក” ជាអ្វីដែលលោកស្រី សុភាព បានបដិសេធ។
អ្នកស្មោះស្ម័គ្រនឹងគណបក្សសង្គ្រោះជាតិម្នាក់បានចេញមកពីក្រុមនេះ អះអាងថា លោកស្រី សុភាព បានជំពាក់គាត់២០ដុល្លារ ហើយលើកឡើងថា គាត់បានឲ្យលុយអតីតមន្ត្រីគណបក្សសង្គ្រោះជាតិនេះខ្ចីច្រើនខែមកហើយ។
លោកស្រី សុភាព បានសួរអ្នកទារលុយនោះថា “តើអ្នកហា៊នស្បថដាក់ជីវិតទេថា ខ្ញុំជំពាក់លុយអ្នក?”។ ខ្ញុំនឹងប្តឹងអ្នកពីបទបរិហារកេរ្តិ៍ខ្ញុំ”។
ដោយមិនសប្បាយចិត្ត អ្នកទារប្រាក់រូបនេះបានយកទូរស័ព្ទតម្លៃថោកមួយគ្រឿងរបស់លោកស្រី សុភាព ជំនួសឲ្យលុយ២០ដុល្លារ ហើយបានចាកចេញទៅ។
បន្តិចក្រោយមក លោកស្រី សុភាព និងក្រុមរបស់គាត់ត្រូវបានបញ្ចុះបញ្ចូលឲ្យចាកចេញពីទីស្នាក់ការគណបក្សសង្គ្រោះជាតិ៕សារុន