41.3 C
Phnom Penh

នគរ​បាល​យក​ត្រាក់ទ័រ​ដែល​អ្នក​ភូមិ​ក្នុង​ខេត្ត​មណ្ឌល​គិរី​ចាប់​ទុក​មក​ឲ្យ​ក្រុម​ហ៊ុន​វិញ

ដោយ ឌឹ ខេមបូឌា ដេលី

បទវិភាគ

កសិករ​ជន​ជាតិ​ដើម​ភាគ​តិច​ព្នង​ដែល​ជាប់​ពាក់​ព័ន្ធ​វិវាទ​ដីធ្លី​ជាមួយ​ក្រុម​ហ៊ុន​ចម្ការ​កៅស៊ូ​មួយ​ ដែល​កាន់​កាប់​ដោយ​វៀតណាម​​នៅ​ក្នុង​ខេត្ត​មណ្ឌលគិរី​​បាន​បោះ​បង់​ការ​គ្រប់គ្រង​ត្រាក់​ទ័រ​របស់​ក្រុម​ហ៊ុន​ ដែល​ពួកគាត់​បាន​ចាប់កាល​ពី​សប្ដាហ៍​មុន បន្ទាប់ពី​នគរ​បាល​ និង​កង​រាជ​អាវុធ​ហត្ថ​​ជាច្រើន​បាន​បង្ហាញ​មុខ​កាលពី​ថ្ងៃសៅរ៍ ដើម្បី​មក​យក​ត្រាក់ទ័រ​នោះ​វិញ។

អ្នក​ភូមិ​ជនជាតិ​ដើម​ភាគតិច​ព្នង​​ប្រហែល​២០០​គ្រួសារ​ នៅ​ក្នុង​ស្រុក​កែវសីមា ​បាន​ចោទ​ប្រកាន់​ក្រុម​ហ៊ុន​ Binh Phuoc 1 ថា បាន​រំលោភ​យក​ដី​របស់​ពួកគាត់​ ដែល​ពួកគាត់លើក​ឡើង​ថា ពួកគាត់​បាន​ធ្វើ​ស្រែចម្ការ​ច្រើន​ជំនាន់​មក​ហើយ។

អាជ្ញាធរ​មូលដ្ឋាន​អះអាង​ថា ​គ្រួសារ​ទាំង​នេះ​គឺ​ជា​អ្នក​មក​តាំង​ទីលំនៅ​ខុស​ច្បាប់ ដែល​ទើប​តែផ្លាស់មក​រស់នៅ​ក្នុង​តំបន់​នេះ​ថ្មីៗ​តែ​ប៉ុណ្ណោះ​ ហើយ​​ផ្ទះ​សំបែង​របស់​ពួកគាត់​​ជាច្រើន​ខ្នង​ត្រូវ​បាន​បំផ្លាញ​កាលពី​ខែ​មុន។

លោក យ៉ាន ម៉ៅ ជា​កសិករ​ម្នាក់​បាន​និយាយ​ថា ពួកគាត់​​បាន​​ចាប់​ត្រាក់​ទ័រ​មួយ​គ្រឿង របស់​ក្រុម​ហ៊ុន​នេះ​​​ទុក​កាលពី​ថ្ងៃ​ទី​២៩ ខែ​ធ្នូ នៅពេល​ត្រាក់​ទ័រ​នេះកំពុង​​រាន​ដី​ ប៉ុន្តែ​បាន​ប្រគល់​ឲ្យ​វិញ​កាលពី​ថ្ងៃ​សៅរ៍ បន្ទាប់ពី​នគរ​បាល​ និង​កង​រាជ​អាវុធ​ហត្ថ​ប្រហែល​៦០​នាក់​បាន​មក​ដល់​កន្លែង​កើត​ហេតុ ហើយ​ធ្វើ​ការ​គំរាមកំហែង​។

លោក​បាន​និយាយ​ថា “យើង​ភ័យ​ខ្លាច​ ពីព្រោះ​នគរ​បាល និង​កង​រាជ​អាវុធហត្ថ​បាន​ឡោម​ព័ទ្ធ​ពួកយើង ហើយ​បាន​យក​កាំភ្លើង​មក​ភ្ជង់​គំរាម​សម្លាប់ ឬ​គំរាម​ចាប់​ខ្លួន​ ប្រសិន​បើ​ពួក​យើង​ណា​ម្នាក់​ព្យាយាម​រារាំង​អាជ្ញាធរ​​មិន​ឲ្យ​យក​ត្រាក់​ទ័រ​នេះ​ត្រឡប់​ទៅ​វិញ​។

លោក យ៉ាន ម៉ៅ បាន​និយាយ​ថា កសិករ​ក៏​បាន​សាង​សង់​ជម្រក​ចំនួន​១២​​នៅ​កន្លែង​ដែល​ត្រូវ​បាន​បំផ្លាញ​កាលពី​សប្ដាហ៍​មុន ប៉ុន្តែ​ត្រូវ​បានគំរាម​មិន​ឲ្យធ្វើបន្ថែមទៀត​ដោយ​លោក ស៊ិន វ៉នវុធ អភិបាល​ស្រុក​ដែល​បាន​មកជាមួយ​នគរ​បាល​​កាលពី​ថ្ងៃសៅរ៍។ លោក​បាន​និយាយ​ថា “អភិបាល​ស្រុក​បាន​គំរាម​ដុត​ជម្រក​របស់​យើង ហើយ​​ចាប់​ពួក​យើង​ដាក់ខ្នោះ ​ប្រសិន​បើ​យើង​បន្ត​សាងសង់​ជម្រក​ទៀត”។ លោក វ៉នវុធ បាន​បដិសេធ​មិន​ធ្វើអត្ថាធិប្បាយ​។

លោក ស៊ុន ប៊ុនធឿន ​អធិការ​នគរ​បាលស្រុក​បាន​បញ្ជាក់​ថា លោក​បាន​ដាក់​ពង្រាយ​មន្ត្រី​ទាំង​នេះ​ដើម្បី​យក​ត្រាក់ទ័រ​ពី​កសិករ​មក​វិញ​ ប៉ុន្តែ​បាន​អះអាង​ថា លោកមិន​ដឹងអំពី​វិវាទ​ដីធ្លី​នេះ​ទេ។ លោក​បាន​មាន​ប្រសាសន៍​ថា “ខ្ញុំ​មិន​ដឹងរឿង​នេះ​ទេ ពីព្រោះ​ខ្ញុំ​គ្រាន់​តែ​ធ្វើ​តាមបញ្ជា​​របស់លោក​​អភិបាល​តែ​ប៉ុណ្ណោះ”។

លោក ចេង សុវិចិត្រ អ្នក​គ្រប់គ្រង​នៅ​ចម្ការ​កៅស៊ូ​នេះ​បាន​មាន​ប្រសាសន៍​ថា ក្រុម​ហ៊ុន​របស់​លោក​ទទួល​បាន​ដីសម្បទាន​​ក្នុងតំបន់​ដែល​មាន​វិវាទ​នេះ​ពី​រដ្ឋាភិបាល ហើយ​បាន​សុំ​ឲ្យ​មន្ត្រី​ថ្នាក់​ស្រុក​ជួយ​អន្តរាគមន៍​ជំនួស​។

លោក​បាន​មាន​ប្រសា​សន៍​ថា “យើង​គិត​ថា ការ​ចាប់​យក​ត្រាក់ទ័រ​គឺ​ជា​ការ​ខុស​ច្បាប់ ពីព្រោះ​អ្នក​ភូមិ​ទាំង​នេះ​បាន​រារាំង​ក្រុម​ហ៊ុន​មិន​ឲ្យ​ធ្វើ​ការ​ងារ​។ យើង​ចង់​ស្វែង​រក​ដំណោះ​ស្រាយ​ដោយ​សន្តិវិធី​ ប៉ុន្តែ​អ្នកភូមិ​ទាំង​នោះ​បាន​បដិសេធ ដូច្នេះ​​ហើយ​យើង​​បាន​សុំ​ឲ្យ​​អាជ្ញាធរ​ជួយ​អន្តរា​គមន៍​”។ លោក យ៉ាន ម៉ៅ បាន​និយាយ​ថា ​ក្រុម​អ្នកភូមិ​​មាន​គម្រោង​ធ្វើ​ដំណើរ​មក​រដ្ឋសភា​ក្នុង​រាជ​ធានីភ្នំពេញ​នៅ​ថ្ងៃ​អង្គារ ដើម្បី​តវ៉ា​ប្រឆាំងក្រុម​ហ៊ុន​នេះ និង​មន្ត្រី​មូលដ្ឋាន​របស់​ខ្លួន​៕ សារុន​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស