ជាការឆ្លើយតបទៅនឹងកង្វល់ដែលបានលើកឡើងដោយអ្នកភូមិ ក្រុមមន្ត្រីខេត្តកណ្ដាលកាលពីម្សិលមិញបានចុះទៅពិនិត្យមើលច្រាំងទន្លេដែលហូរច្រោះដីក្រោមស្ពានព្រែកតាមាក់ ដែលសាងសង់ឡើងដោយក្រុមហ៊ុនចិន ក្នុងស្រុកមុខកំពូល។
លោក ខៀវ សុខណាត អភិបាលរងស្រុកខ្សាច់កណ្ដាលដែលស្ពាននេះតភ្ជាប់ទៅស្រុកមុខកំពូលបានមានប្រសាសន៍ថា ការច្រោះដីនៅក្បែរសសរគ្រឹះស្ពានកាន់តែធ្ងន់ធ្ងរចាប់តាំងពីឆ្នាំ២០១៣មក ដោយសារទឹកភ្លៀង និងចរន្តទឹកទន្លេ ប៉ុន្តែថា លោកជឿថាសសរគ្រឹះស្ពានដែលលោកលើកឡើងថា បុកចូលក្នុងដីជម្រៅ៥០ម៉ែត្រនោះ នឹងការពារស្ពានមិនឲ្យបាក់ឡើយ។
លោក សុខណាត បានមានប្រសាសន៍ថា “ការច្រោះដីបានកើតឡើងពីមុនមក ហើយវានៅតែកើតឡើងតាមធម្មជាតិដដែល ដោយសារទឹកហូរ”។
លោកបានបន្ថែមថា អាជ្ញាធរនឹងចាក់ទប់ជម្រាលចោតដោយប្រើបេតុង។ វានឹងមិនបណ្ដាលឲ្យមានគ្រោះថ្នាក់ ឬប៉ះពាល់ដល់ការធ្វើដំណើរឆ្លងកាត់់ស្ពានទេ ប្រសិនបើយើងចាក់ដីបំពេញនោះ។
លោក អុន រស្មី អនុប្រធានមន្ទីរសាធារណការ និងដឹកជញ្ជូនខេត្តបានមានប្រសាសន៍ថា លោកបានចុះទៅពិនិត្យមើលកន្លែងនោះកាលពីម្សិលមិញជាមួយមន្ត្រីរដ្ឋាភិបាលដទៃទៀត និងវិស្វករមកពីក្រុមហ៊ុនសំណង់សៀងហៃ (Shanghai Construction Group) ដែលបានសាងសង់ស្ពាននេះ។ លោកបានមានប្រសាសន៍ថា ” ផ្អែកតាមការពិនិត្យជាក់ស្ដែង នៅសល់បីឬបួនម៉ែត្រទៀតឯណោះពីច្រាំងទន្លេទៅសសរស្ពាន។ គ្មានអ្វីត្រូវព្រួយបារម្ភឡើយ”៕ សារុន