40.2 C
Phnom Penh

ជនបរទេស​ពីរ​​នាក់​ត្រូវ​សាលា​ដំបូង​ខេត្ត​ព្រះសីហនុ ចោទ​ប្រកាន់​ពីបទ​ក្លែង​រូបិយប័ណ្ណ​ដុល្លារ​អាមេរិក​

ដោយ ឌឹ ខេមបូឌា ដេលី

បទវិភាគ

ជនជាតិ​​សៀរា៉ឡេអូន​ ម្នាក់ និង​ជនជាតិ​លីបេរីយ៉ា​ ម្នាក់​ ត្រូវ​បាន​សាលា​ដំបូង​ខេត្ត​ព្រះសីហនុ ចោទ​ប្រកាន់​កាលពី​ម្សិលមិញ​ពីបទ​ឆបោក និង​ក្លែង​​រូបិយប័ណ្ណ​ដុល្លារ​​អាមេរិក​ចំនួន​៣០០.០០០ដុល្លារ​។ បុរស​ទាំង​ពីរ​​នាក់នេះ​ត្រូវ​បាន​ចាប់​ខ្លួន​បន្ទាប់ពី​បុរស​ជនជាតិ​ជប៉ុន​ម្នាក់ដែល​អះអាង​ថា ខ្លួន​​ចាញ់​បោក​បុរស​ទាំង​ពីរ​នេះ បាន​​ជួយ​នគរ​បាល​​រៀបចំ​អន្ទាក់​ចាប់​ខ្លួន​ជន​ទាំង​នេះ​​។

​លោក សាន ប៊ុនថន ​​ស្នង​ការ​រង​ខេត្ត​ព្រះសីហនុ ​បាន​មាន​ប្រសាសន៍​ថា ឈ្មោះ ហ្គីម៉េត ​ប៉ាប៊ី (Gmmett Parbey) អាយុ​៤០​ឆ្នាំ មកពី​ប្រទេស​​លីបេរីយ៉ា និង​ឈ្មោះ ហ្វូដេ កាម៉ារ៉ា (Foday Kamara) អាយុ​៣៨​ឆ្នាំ មកពី​ប្រទេស​សៀរ៉ាឡេអូន ត្រូវ​បាន​ចាប់​ខ្លួន​កាលពី​ថ្ងៃច័ន្ទ ​នៅ​ម៉ោង​ប្រហែល​​៣រសៀល​ នៅ​សណ្ឋាគារ​មួយ​ក្នុង​សង្កាត់៣ ក្រុង​ព្រះសីហនុ ក្រោយ​ពី​មាន​​ពាក្យ​បណ្ដឹង​ពី​​ឈ្មោះ តាណាកា សេនយ៉ា (Tanaka Shenya)។

លោក សាន ប៊ុនថន បាន​មាន​ប្រសាសន៍​ថា ជនសង្ស័យទាំងពីរ​បាន​​បង្ហាញ​ក្រដាស​ប្រាក់​១០០ដុល្លារ​ដែល​​ប្រឡាក់​ទឹក​ខ្មៅ​ពេញឲ្យ​លោក​ តាណាកា សេនយ៉ា ​​មើល ហើយ​បាន​ប្រាប់​ថា ពួកគេ​ត្រូវ​ការ​ទិញ​​ទឹកខ្មៅ​ពិសេស​​ដែល​​អាច​លាង​ជម្រះ​វា​ឲ្យ​ស្អាត​។

លោក​បាន​បន្ត​ថា “យោង​តាម​ពាក្យ​បណ្ដឹង​កាលពី​ថ្ងៃទី​២៥ ខែ​ធ្នូ ជនសង្ស័យ​ទាំង​ពីរ​​បា​បញ្ចុះ​បញ្ចូល​ជន​រងគ្រោះ​ឲ្យ​ទិញ​ទឹក​ខ្មៅ​ដើម្បី​លាង​សម្អាត​ដុល្លារ​ខ្មៅ​ឲ្យ​ក្លាយ​ជា​ប្រាក់​​​ធម្មតា [ស្អាត]។ កាលពី​ថ្ងៃទី​២៦ ខែធ្នូ ​ជនសង្ស័យ​ទាំង​នេះ​បាន​យក​ទឹកខ្មៅ​មួយ​ដប​តូច​មក​លាង​ជម្រះ​លុយ​នោះ ហើយ​បន្ទាប់​មក​​បាន​​បង្ហាញ​ជនរងគ្រោះ​ថា លុយ​នោះ​បានប្រែក្លាយ​ជា​លុយ​ធម្មតា។ នៅ​ថ្ងៃ​ដដែល​​ ជនរងគ្រោះ​បាន​យល់​ព្រម​​ឲ្យ​ពួកគេ​១.០០០ដុល្លារ​បន្ថែម​ទៀត​ដើម្បី​ទិញ​ទឹក​ខ្មៅ​បន្ថែម​ពីបរទេស”។

លោក​បាន​ពន្យល់​ថា ឈ្មោះ ប៉ាប៊ី និង​​ឈ្មោះ កាម៉ារា៉ បាន​បញ្ចុះ​បញ្ចូល​​លោក សេនយ៉ា ឲ្យ​ប្រគល់​ប្រាក់ទៅ​ពួកគេ​សរុប​ចំនួន​៣.០០០ដុល្លារ​ ដើម្បី​ទិញ​ទឹកខ្មៅ​ពិសេស​ពី​សហរដ្ឋ​អាមេរិក​ ដោយ​សន្យា​សង​គាត់​វិញ​ចំនួន​៦.០០០ដុល្លារ​ នៅ​ពេល​​លាង​ក្រដាស​ប្រាក់​​​ទាំង​នេះស្អាត​។

លោក​ ចេវ ម៉េង ​នាយការិយាល័យ​​​នគរ​បាល​​ប្រឆាំង​បទល្មើស​សេដ្ឋកិច្ច​នៃ​ស្នង​ការ​ដ្ឋាន​នគរ​បាល​ខេត្ត​ព្រះសីហនុ បាន​មាន​ប្រសាសន៍​ថា លោក​ សេនយ៉ា មាន​ការ​​សង្ស័យ​កាន់​តែ​ខ្លាំង​ចំពោះ​បុរស​ទាំង​ពីរ​នាក់​នេះ បន្ទាប់ពី​ពួកគេ​បាន​ពន្យារ​ពេល​​លាង​សម្អាត​ប្រាក់ ដោយ​អះអាង​ថា មានក្រដាស​ប្រាក់​​មិន​គ្រប់គ្រាន់។

លោក​មាន​ប្រសាសន៍​ថា “ជនរងគ្រោះ​បាន​​សុំ​ឲ្យ​ជនសង្ស័យ​ទាំងពី​​រទៅ​កាន់​​សណ្ឋាគារ​ដែល​គាត់​ស្នាក់​នៅ ប៉ុន្តែ​ពេល​ពួកគេ​ទៅ​ដល់​ នគរ​បាល​ក៏​បាន​ឡោមព័ទ្ធ [សណ្ឋាគារ] ហើយ​ចាប់​ខ្លួន​ពួកគេ​តែ​ម្ដង”។

នគរបាល​បាន​ដឹង​ពី​ប្រតិបត្តិការ​ក្លែង​ក្រដាស​ប្រាក់​របស់​បុរស​ទាំង​នេះ និង​បាន​រក​ឃើញ​​ក្រដាសប្រាក់​ក្លែង​ក្លាយ​​​ប្រហែល​៣០០.០០០ដុល្លារ​។

លោក​​ ចេវ ម៉េង បាន​មាន​ប្រសាសន៍​ថា “ជនសង្ស័យ​ទាំង​នេះ​បាន​បដិសេធ​ថា ពួកគេ​មិន​បាន​ប្រព្រឹត្តបទ​​ល្មើស​ទេ ហើយ​​អះអាង​ថា ពួកគេ​មិន​ដែល​ស្គាល់​បុរស​ជនជាតិ​ជប៉ុន​នេះ​ទេ ប៉ុន្តែ​នៅ​ពេល​បង្ហាញរូប​ថត​​ឲ្យ​ពួកគេ​​មើល​ ពួកគេ​អះអាង​ថា ពួក​គេ​ស្គាល់​គាត់​តាម​ទូរស័ព្ទ​”៕ សុខុម​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស