កាលពីថ្ងៃអង្គារ នគរបាលខេត្តកណ្ដាលបានរឹបអូសឈើមួយចំនួនធំ រួមទាំងឈើគ្រញូងដ៏មានតម្លៃជាច្រើនដុំផងដែរ ដែលត្រូវបានទាហានដឹកដោយខុសច្បាប់មកកាន់រាជធានីភ្នំពេញដើម្បីយកមកសាងសង់ការិយាល័យមេបញ្ជាការកងអនុសេនាតូច។
មេបញ្ជាការរូបនេះបានស្នើទៅលោក ប៉ុល សារឿន អគ្គមេបញ្ជាការកងយោធពលខេមភូមិន្ទដើម្បីសុំប្រាក់មកបង់ពិន័យឲ្យរដ្ឋបាលព្រៃឈើ ប៉ុន្តែឧត្ដមសេនីយ៍រូបនេះបានបដិសេធមិនជួយទេ។
លោក ដួង តេង អធិការនគរបាលស្រុកពញាឮ ខេត្តកណ្ដាល បានមានប្រសាសន៍ថា លោក និងមន្ត្រីរបស់លោកកំពុងដោះស្រាយគ្រោះថ្នាក់ចរាចរណ៍រវាងរថយន្តលុចស៊ីស និងរថយន្តកងយោធពលខេរមភូមិន្ទតាមផ្លូវជាតិលេខ៥ ស្រាប់តែពួកគេបានឃើញឈើនៅលើរថយន្តនោះ។
លោកបានមានប្រសាសន៍ថា យើងបានសួរអ្នកបើកបររកលិខិតអនុញ្ញាតឲ្យដឹកឈើនេះ ប៉ុន្តែគាត់បានប្រាប់យើងថា ឈើនេះជារបស់ចៅហ្វាយនាយរបស់គាត់ គឺលោកមេបញ្ជាការកងអនុសេនាតូចលេខ៩០”។
លោក ដួង តេង បានមានប្រសាសន៍ថា បន្ទាប់មកអ្នកបើកបរបានទូរស័ព្ទទៅ ហើយទាហានប្រាំមួយនាក់បានមកដល់ដោយបានស្នើសុំដឹកឈើនេះទៅជាមួយពួកគេជំនួសឲ្យមេបញ្ជាការកងអនុសេនាតូច គឺលោកឧត្ដមសេនីយ៍ត្រី ឈរ សុខ។
លោកបានមានប្រសាសន៍ថា “មន្ត្រីយោធាទាំងនេះបានមកនិយាយជាមួយខ្ញុំ ហើយបានសុំដឹកឈើឲ្យមេបញ្ជាការរបស់ខ្លួន ប៉ុន្តែខ្ញុំបានបដិសេធ ពីព្រោះពួកគេមិនមានលិខិតអនុញ្ញាតក្នុងការដឹកឈើនេះទេ”។ លោកបានបន្ថែមថា ឈើទាំងនេះត្រូវបានបញ្ជូនទៅសង្កាត់រដ្ឋបាលព្រៃឈើព្រែកព្នៅ ក្នុងរាជធានីភ្នំពេញ។
លោក អ៊ុំ ច័ន្ទរិទ្ធ នាយសង្កាត់រដ្ឋបាលព្រៃឈើបានមានប្រសាសន៍ថា ឈើទាំងនេះរួមមាន ឈើទាលជាប្រភេទឈើលេខ២ ចំនួន១១ម៉ែត្រគូប និងឈើគ្រញូងជាប្រភេទឈើប្រណីតចំនួន១៤ដុំទម្ងន់ប្រហែល៨០គីឡូក្រាម។
លោកបានមានប្រសាសន៍ថា “យើងនឹងស្នើសុំឲ្យអង្គភាពយោធានេះបង់ប្រាក់ពិន័យសម្រាប់ឈើនេះ”។ លោកបានបន្ថែមថា យើងមិនទាន់គណនាចំនួនពិតប្រាកដនៅឡើយទេ។ យើងនឹងយកឈើនេះទុកជាសម្បត្តិរដ្ឋ បើទោះជាពួកគេបង់ប្រាក់ពិន័យក៏ដោយ ពីព្រោះពួកគេដឹកឈើដោយគ្មានលិខិតអនុញ្ញាត។
ឧត្ដមសេនីយ៍ត្រី ឈរ សុខ បានបញ្ជាក់កាលពីម្សិលមិញថា ឈើប្រភេទឈើទាលនេះសម្រាប់យកទៅសាងសង់ការិយាល័យរបស់លោក ប៉ុន្តែបានបដិសេធថា លោកមិនដឹងពីឈើគ្រញូងទេ ដោយអះអាងថា វាប្រាកដជារបស់អ្នកបើកបររថយន្ត។
លោកបានមានប្រសាសន៍ថា ឈើប្រភេទឈើទាលមួយចំនួនត្រូវបានទាហានកាប់នៅលើដីសម្បទានសង្គមកិច្ចសម្រាប់ក្រុមគ្រួសារទាហាននៅក្នុងខេត្តព្រះវិហារ ហើយថា ឈើនៅសល់ពីនោះត្រូវបានទិញពីអ្នកភូមិនៅក្នុងតំបន់នោះ។ លោកបានមានប្រសាសន៍ថា “ឈើនេះជារបស់អង្គភាពខ្ញុំ។ យើងបានដឹកឈើនេះពីខេត្តព្រះវិហារមក ដើម្បីយកមកសាងសង់ការិយាល័យសម្រាប់កន្លែងធ្វើការរបស់ខ្ញុំ”។
មេបញ្ជាការកងអនុសេនាតូចរូបនេះបានមានប្រសាសន៍ថា ទាហានដែលបានកាប់ឈើនៅលើដីសម្បទានសង្គមកិច្ចនោះបានកាប់ច្រើនពេក ហេតុដូច្នេះហើយយើងសម្រេចឲ្យដឹកឈើនេះមករាជធានីភ្នំពេញ ជាជាងទុកចោល។
លោកបានមានប្រសាសន៍ថា អង្គភាពរបស់លោកមិនអាចរកប្រាក់បង់ពិន័យឲ្យរដ្ឋបាលព្រៃឈើបានទេ ហើយលោកបានបញ្ជូនសំណើទៅលោកឧត្ដមសេនីយ៍ ប៉ុល សារឿន ដើម្បីសុំប្រាក់។
ប៉ុន្តែឧត្ដមសេនីយ៍រូបនេះបានមានប្រសាសន៍កាលពីម្សិលមិញថា លោកមិនពាក់ព័ន្ធរឿងនេះទេ។ ឧត្ដមសេនីយ៍ ប៉ុល សារឿន បានមានប្រសាសន៍ថា ” ខ្ញុំមិនអាចជួយបានទេ ពីព្រោះនេះជារឿងខុសច្បាប់ ដូច្នេះហើយយើងទុកឲ្យអាជ្ញាធរចាត់វិធានការតាមច្បាប់”៕ សារុន