38 C
Phnom Penh

ជនសង្ស័យ​​ក្នុង​ករណី​ជួញដូរ​គ្រឿង​ញៀន​នៅ​ព្រះវិហារ​គ្រិស្ត​ត្រូវ​បាន​សាក​សួរ​ និង​ឃុំខ្លួន​

ដោយ ឌឹ ខេមបូឌា ដេលី

បទវិភាគ

បុរស​ជនជាតិ​នីហ្សេរីយា៉​ប្រាំបី​នាក់ និង​ស្ត្រី​ជនជាតិ​ខ្មែរ​ម្នាក់​​​ដែល​​​ជួញដូរ​គ្រឿង​ញៀន​​បាន​​ពី​ព្រះវិហារ​គ្រិស្ត​មួយ​កន្លែង​នៅ​ក្នុង​ខណ្ឌ​មានជ័យ រាជធានី​ភ្នំពេញ​ ត្រូវ​បាន​ឃុំ​ខ្លួន​ជា​បណ្ដោះ​អាសន្ន​នៅ​ពន្ធនាគារ​ព្រៃស​កាលពី​ម្សិលមិញ បន្ទាប់ពី​​សាកសួរ​រួច​នៅ​សាលា​ដំបូង​រាជធានី​ភ្នំពេញ។

​ជនសង្ស័យទាំង​ប្រាំបួន​ត្រូវ​បាន​ចោទ​ប្រកាន់​ពីបទ​ជួញដូរ​គ្រឿង​ញៀន​​កាលពី​ថ្ងៃច័ន្ទ បន្ទាប់​ពី​នគរ​បាល​សហការ​ជាមួយ​ការិយាល័យ​ប្រឆាំង​ការ​ជួញដូរ​គ្រឿង​ញៀន​នៃ​ក្រសួង​មហាផ្ទៃ​ បាន​ចាប់​ខ្លួន​ពួកគេ​នៅ​ក្នុង​ប្រតិបត្តិការ​បន្លំ​ខ្លួន​ដាក់​អន្ទាក់​មួយ​​កាលពី​សប្ដាហ៍​មុន​។ នគរ​បាល​ជឿ​ថា ពួកគេ​​បាន​ជួញដូរ​​គ្រឿង​ញៀន​មេតំហ្វេតាមីន​ចេញ​ពី​ព្រះវិហារ​ Mountain of Fire and Miracles Ministries Church។

​ព្រះវិហារ​នេះ​​ទទេស្អាត និង​​ចាក់​សោ​ចោល​កាលពី​ម្សិលមិញ​ ប៉ុន្តែ​នៅ​តែ​មាន​ស្លាក​សញ្ញា​តូច​មួយ​​ចង​ភ្ជាប់​​នឹង​ទ្វារ​មុខ​ ដោយ​បង្ហាញ​ថា វា​ជា​សាខា​របស់​ព្រះវិហារ​គ្រិស្ត​ដែល​មាន​ទីស្នាក់​ការ​កណ្ដាល​​នៅ​ក្នុង​ប្រទេស​នីហ្សេរីយ៉ា​​ និង​​ដែល​មាន​សាខា​នៅ​អាស៊ី​ អាហ្វ្រិក អឺរ៉ុប និង​អាមេរិក​ខាង​ជើង​ នេះ​បើ​យោង​តាម​គេហទំព័រ​របស់​ព្រះវិហារ​​នេះ​។

លោក​ យិន បញ្ញរិទ្ធ ប្រធាន​ស្ដីទី​​នៃ​ការិយាល័យ​​ប្រឆាំង​ការ​ជួញដូរ​គ្រឿង​ញៀន​នៃ​ក្រសួង​មហាផ្ទៃ​ បាន​មាន​ប្រសាសន៍​ថា នគរ​បាល​ជឿ​ថា ជនសង្ស័យទាំង​នេះ​បាន​ស្តុក​ទុក​គ្រឿង​ញៀន​នៅ​ព្រះវិហារ​នេះ​​ ហើយ​​​យក​វា​ទៅ​ចែក​ចាយ​​ឲ្យ​អ្នក​ទិញ​ក្នុង​បរិមាណ​​តិច​ៗ។

លោក​បាន​មាន​ប្រសាសន៍​ថា “នៅ​ពេល​មាន​អ្នក​​កុម្ម៉ង់​ទិញ​​គ្រឿង​ញៀន​២គីឡូ​​​​ពីពួកគេ​ ពួកគេ​មិន​លក់​ឲ្យ​២គីឡូ​ទេ គឺ​ពួកគេ​​យក​តែ​២០០​ក្រាម​ប៉ុណ្ណោះ​​​​សម្រាប់​ការ​​ចែក​ចាយ​មួយ​លើកៗ​​​រាល់​១៥​នាទី​ម្ដង​ចេញ​ពីព្រះវិហារ​មួយ​កន្លែង​”។

លោក​បាន​បន្ត​ថា ជនសង្ស័យ​ទាំង​នេះ​ត្រូវ​បាន​ចាប់​ខ្លួន​នៅ​ទីតាំង​ប្រាំ​កន្លែង​ផ្សេង​គ្នា​ក្នុង​ខណ្ឌ​មានជ័យ និង​ខណ្ឌ​ចំការ​​មន ដោយ​រួម​ទាំង​នៅ​ព្រះវិហារ​នេះ​​ដែល​នគរ​បាល​រក​មិន​ឃើញ​គ្រឿង​ញៀន​ផង​ដែរ​។

លោក​បាន​បន្ថែម​ទៀត​ថា “ពួកគេ​បាន​រក្សាទុក​គ្រឿង​ញៀន​នៅទីនោះ ប៉ុន្តែ​នៅ​ពេល​យើង​ទៅ​ដល់​ព្រះវិហារ ពួកគេ​បាន​បំផ្លាញ​គ្រឿង​ញៀន​ទាំង​អស់​នោះ​​​ចោល​ដោយ​ការ​​ចាក់​ចូល​ក្នុង​បង្គន់​រួច​ទៅ​ហើយ​”។

លោក យិន បញ្ញរិទ្ធ បាន​បញ្ចេញ​​អត្តសញ្ញាណ​ជនសង្ស័យ​ទាំង​នេះ​​ដែល​មានឈ្មោះ​ដូច​ជា អិនណាមេហ្ស៊ី វីកទ័រ (Nnamezie Victor)​ អាយុ​៣០​ឆ្នាំ ហ្វ្រានស៊ីស អិនណាមឌី (Francis Nnamdi) អាយុ​៣០​ឆ្នាំ សាន់ដេ អិនវា៉ប៊ូអុីស៊ី (Sunday Nwabuisi) អាយុ​៣១​ឆ្នាំ តូនី អិមម៉ាឌូកា ជុកវូអូនយេ (Tony Mmaduka Chukwuonye)​ អាយុ​៣៤​ឆ្នាំ អូកូរុំ គីហ្ស៊ីតូ (Okorom Kizito) អាយុ​៣៥​ឆ្នាំ ហ្វាវើ អិនណាប៊ូអុីហ្វេ អូកូរុំ (Favour Nnabuife Okorom) អាយុ​៣៦​ឆ្នាំ ម៉ាឌូកា ស៊ីម៉ុន យូកានឌូ​ (Maduka Simon Ukandu) អាយុ​៣៧ឆ្នាំ និង​ អុីហ្សូ៊ជុកវូ ជុកវូម៉ា (Izuchukwu Chukwuma) អាយុ​៤០​ឆ្នាំ និង​ស្ត្រីជនជាតិ​ខ្មែរ​ឈ្មោះ ម៉ុន វិនយុង​ អាយុ​២៥​ឆ្នាំ។

ចៅក្រម​ស៊ើបសួរ​ លាង សំណាត បាន​បញ្ជាក់​ថា លោក​​បាន​តម្កល់​ការ​ចោទ​ប្រកាន់​ពីបទ​ជួញដូរ​គ្រឿង​ញៀន​​​ពី​សំណាក់​​ព្រះរាជអាជ្ញា​រង ប៉ុន្តែ​លោក​បាន​បដិសេធ​​មិន​​ធ្វើ​អត្ថាធិប្បាយ​បន្ថែម​ទៀត​អំពី​ករណី​នេះ​ទេ។

លោក សុខ សេង ក្រឡាបញ្ជី​របស់​ចៅក្រម​ លាង សំណាត បាន​លើក​ឡើង​ថា ក្រុម​នេះ​ត្រូវ​បាន​បញ្ជូន​ខ្លួន​ទៅ​ពន្ធនាគារ​ព្រៃស​ បន្ទាប់ពី​ចៅក្រម​សាកសួរ​រួច​។ លោក​បាន​លើក​ឡើង​ទៀត​ថា “ពួកគេ​ [ជនជាតិ​នីហ្សេរីយ៉ា​ទាំង​ប្រាំបី​នាក់​] បាន​ច្រាន​ចោល​ការ​ចោទ​ប្រកាន់​ ហើយ​និយាយ​ថា គ្មាន​គ្រឿង​ញៀន​នៅ​ក្នុង​ព្រះវិហារ​ទេ។ ពួកគេ​និយាយ​ថា ពួកគេ​មិន​ដឹង​​ថា ហេតុអ្វី​បាន​ជា​​នគរ​បាល​ចាប់​ខ្លួន​ពួកគេ​ទេ​​”។

លោក​បាន​មាន​ប្រសាសន៍​បន្ថែម​ទៀត​ថា ស្ត្រី​ឈ្មោះ មុ៉ុន វិនយុង បាន​សារភាព​ថា ​ខ្លួន​​ពិត​ជា​បាន​យក​កញ្ចប់​គ្រឿង​ញៀន​ទៅ​​ចែក​ចាយ​ឲ្យ​បុរស​ជនជាតិ​នីហ្សេរីយ៉ា​ទាំង​នេះ​ប្រាកដ​មែន។ យោង​តាម​លោក​ យិន បញ្ញរិទ្ធ បាន​ឲ្យ​ដឹង​ថា ភ្នាក់​ងារ​សម្ងាត់​របស់​លោក​​បាន​​​បន្លំ​ខ្លួន​ធ្វើ​ជា​បញ្ជា​ទិញ​គ្រឿង​ញៀន​ពី​ស្ត្រី​​ឈ្មោះ ម៉ុន វិនយុង ដែល​​មក​ទទួល​ពួកគេ​នៅ​ព្រះវិហារ​នេះ​កាលពី​ថ្ងៃ​ព្រហស្បតិ៍​ មុន​ពេល​ប្រគល់គ្រឿង​ញៀន​៕ សុខុម​​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស