30 C
Phnom Penh

តុលាការ​កោះហៅ​អ្នក​ភូមិ​ដែល​ជាប់​ពាក់​ព័ន្ធវិវាទដីធ្លី​មក​សាកសួរ​

ដោយ ឌឹ ខេមបូឌា ដេលី

បទវិភាគ

អ្នកភូមិ​ជន​ជាតិ​ដើម​ភាគតិច​ព្នង​៧នាក់​​ដែលជាប់ពាក់ព័ន្ធវិវាទដីធ្លី​ជាមួយ​ក្រុមហ៊ុន​ចម្ការ​កៅស៊ូដែលកាន់កាប់ដោយ​វៀត​​ណាម​​នៅក្នុង​ខេត្ត​មណ្ឌលគិរី​ ត្រូវ​សាលាដំបូង​ខេត្ត​កោះ​ហៅ​មក​សាកសួរ​​បន្ទាប់ពី​​ក្រុមហ៊ុន​នេះ​បាន​ចោ​ទ​ប្រកាន់​ពួកគាត់​ថា បាន​កាន់កាប់​ដី​របស់​ខ្លួន​ដោយ​ខុស​ច្បាប់នៅក្នុង​​ស្រុក​កែវ សីមា។

អ្នកភូមិ​ជន​ជាត​ិ​ដើម​ភាគ​ត​ិច​ព្នង​ប្រហែល​២០០គ្រួសារ​​នៅក្នុង​ឃុំ ស្រែ​ឈូក ​អះ​អាង​ថា ក្រុមហ៊ុនចម្ការ​កៅស៊ូ Binh Phuoc 1 ​​បាន​រំលោភ​យក​ដី​របស់​ខ្លួន​ ដែលពួកគាត​់​លើក​ឡើង​ថា ពួកគាត់​​បាន​ធ្វើ​ស្រែ​ចម្ការ​​ច្រើន​ជំនាន់​មកហើយ។

ប៉ុន្តែ​ក្រុមហ៊ុន​នេះ​លើកឡើង​ថា ក្រុមហ៊ុន​ទទួលបាន​ដីសម្បទាន​ពី​រដ្ឋាភិបាល ហើយ​មន្ត្រី​មូលដ្ឋាន​លើក​ឡើង​ថា គ្រួសារ​ទាំង​នេះ​គឺ​ជាអ្នក​ចំណូលថ្មី​តែ​ប៉ុណ្ណោះ។

អាជ្ញាធរ​បាន​បំផ្លាញ​ផ្ទះ​ជាច្រើន​ខ្នង​កាលពី​សប្តាហ៍ ប៉ុន្តែ​​កសិករ​ទាំង​នោះ​បាន​ត្រឡប់មក​វិញ ហើយ​បាន​សង់​ជម្រក​ស្នាក់​នៅ​ចំនួន​១២នៅ​កន្លែង​នោះ។

ដីកាកោះ​ហៅ​ចុះកាល​បរិច្ឆេទ​ថ្ងៃអង្គារ​ ហើយ​ចុះ​ហត្ថលេខាដោយ​លោក ជា សុវណ្ណថេត​ ព្រះ​រាជ​អាជ្ញារង​​មាន​ខ្លឹម​សារថា ជន​សង្ស័យ​ទាំង​នេះ​ត្រូវ​តែបង្ហាញ​មុខ​នៅ​តុលាកា​រនៅ​ថ្ងៃសុក្រ ដើម្បី​សាកសួរ។

លោក​ យ៉ាន ម៉ៅ អាយុ​៣១ឆ្នាំ ជា​អ្នក​ភូមិ​ម្នាក់ក្នុង​ចំណោម​អ្នក​ភូមិ​៧នាក់​​ដែលមាន​ឈ្មោះ​ក្នុង​ដីកា​កោះហៅ បាន​បដិសេធ​ការ​ចោទ​ប្រកាន់​នោះ ប៉ុន្តែ​​បាន​និយាយថា ​លោក​មាន​គម្រោង​បង្ហាញ​ខ្លួន​នៅ​តុលាការ​។

លោក​បាន​និយាយថា “​ខ្ញុំ​ជឿថា ការ​ចោទ​ប្រកាន់​របស់​តុលាការ​គឺ​មិន​យុត​្ត​ិធម៌ទេ ពីព្រោះ​ពួកគេ​មិន​បាន​ចាត​់​វិធានការ​ប្រឆាំង​ក្រុមហ៊ុនដែលកំពុង​រំលោភ​យកដី​ស្រែ​របស់​អ្នក​ភូមិឡើយ ប៉ុន្តែ​ពួកគេ​បែរជា​ចោទ​ប្រកាន់​​អ្នកភូមិ​ថា​ បាន​ចាប់យក​ដី​របស់ក្រុមហ៊ុន​ទៅវិញ។ ខ្ញុំ​បារម្ភថា ខ្ញុំ​អាច​ត្រូវ​ចាប់ខ្លួន​ ពីព្រោះ​​តុលាការ​មិន​ឯករាជ្យ​ឡើយ”៕សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស