ក្រុមមន្ត្រី និងអាជីវករម្នាក់បាននិយាយកាលពីម្សិលមិញថា ចោរប្លន់ប្រដាប់អាវុធបីនាក់បានប្លន់តូបលក់គ្រឿងអលង្ការមួយនៅផ្សារក្នុងស្រុកអន្លង់វែង ខេត្តឧត្ដរមានជ័យ កាលពីរសៀលថ្ងៃពុធ ដោយបាញ់កាំភ្លើងបណ្ដាលឲ្យជាងមាសបីនាក់រងរបួសធ្ងន់ ដែលបានព្យាយាមធ្វើអន្តរាគមន៍។
លោក វង្ស ភក្ត្រ មេឃុំអន្លង់វែងបានមានប្រសាសន៍ថា បុរសទាំងបីនាក់នេះបានចូលក្នុងផ្សារធំ ក្នុងស្រុកអន្លង់វែងនៅម៉ោងប្រហែល៤និង៤០នាទីរសៀល ប្រដាប់ដោយកាំភ្លើងអាកា-៤៧ពីរដើម និងកំាភ្លើងខ្លីមួយដើមលាក់ក្នុងការុង បន្ទាប់មកបានដើរទៅកាន់ប្លុកលក់គ្រឿងអលង្ការ។
លោក វង្ស ភក្ត្រ បានមានប្រសាសន៍ថា ” ពួកគេបានលាក់កាំភ្លើងក្នុងការុងគ្របចំបើងពីលើ ដើម្បីកុំឲ្យមនុស្សក្នុងផ្សារមើលឃើញ ហើយបានចាប់ផ្ដើមធ្វើប្រតិបត្តិការនៅពេលពួកគេមកដល់តូបលក់គ្រឿងអលង្ការ។ នៅពេលមនុស្សម្នាបានប្រវាយប្រតប់ជាមួយពួកគេ ខ្មាន់កាំភ្លើងទាំងនេះបានដកកាំភ្លើងបាញ់បណ្ដាលឲ្យបុរសបីនាក់រងរបួសធ្ងន់”។
លោកបានបន្ថែមថា ក្រុមចោរទាំងនោះយកបានប្លាទីនប្រហែល៧០តម្លឹងពីអាជីវករម្នាក់មុនពេលគេចខ្លួនតាមម៉ូតូរបស់អ្នកសមគំនិតបីនាក់។
យោងតាមលោក វង្ស ភក្ត្រ បានមានប្រសាសន៍ថា ជាងមាសបីនាក់ដែលធ្វើមាសនៅក្បែរតូបលក់គ្រឿងអលង្ការទាំងនោះឈ្មោះ ឡាន គឹមឆេង អាយុ៣៦ឆ្នាំ ហាក់ ហ៊ី អាយុ៣៦ឆ្នាំ និង រស់ សុភា អាយុ៣៦ឆ្នាំដែរ ត្រូវបានក្រុមចោរប្លន់បាញ់ឲ្យរបួស ហើយត្រូវបានប្រញាប់ប្រញាល់បញ្ជូនទៅមន្ទីរពេទ្យបង្អែកខេត្តសៀមរាប ដើម្បីធ្វើការវះកាត់។ លោកបានមានប្រសាសន៍ថា ” អ្នកទាំងបីកំពុងសម្រាកព្យាបាលនៅមន្ទីរពេទ្យនៅឡើយកាលពីម្សិលមិញ។
លោក លឹម វណ្ណា ជាម្ចាស់តូបលក់គ្រឿងអលង្ការដែលត្រូវចោរប្លន់នោះបាននិយាយថា លោកបានបាត់បង់ប្លាទីនគិតជាទឹកប្រាក់៣០.០០០ដុល្លារ។ លោកបាននិយាយថា “ពួកគេបានយកកាំភ្លើងភ្ជង់ក្បាលប្រពន្ធរបស់ខ្ញុំ ហើយបាននិយាយថា ពួកគេនឹងបាញ់នរណាដែលហា៊នចូលមក”។
លោក វង្ស តាន់ នាយប៉ុស្តិ៍ឃុំបានមានប្រសាសន៍ថា មន្ត្រីរបស់លោក៣០នាក់កំពុងស្វែងរកក្រុមចោរប្លន់ទាំងនេះនៅក្នុងព្រៃចម្ងាយប្រហែល១០គីឡូម៉ែត្រពីផ្សារ៕ សារុន