នគរបាលបាននិយាយកាលពីម្សិលមិញថា កាលពីថ្ងៃពុធនគរបាលខេត្តកោះកុង បានចាប់ខ្លួនជនជាតិវៀតណាមបួននាក់ដែលជាប់ចោទថា បានបោកប្រាស់អាជីវករយកប្រាក់អស់រាប់ពាន់ដុល្លារ តាមរយៈការប្ដូរមាសក្លែងក្លាយនិងការដូរលុយ។
លោក ឡាយ ម៉េងលាំង នាយការិយាល័យនគរបាលព្រហ្មទណ្ឌកម្រិតស្រាលខេត្តបានមានប្រសាសន៍ថា នគរបាលកំពុងស្វែករកមេខ្លោងបោកប្រាស់ពីរនាក់ទៀត។
លោក ម៉េងលំាង បានមានប្រសាសន៍ថា “នៅពេលពួកគេបង្ហាញខ្សែករមាសដល់អ្នកលក់ដូរ ពួកគេបង្ហាញខ្សែករពិត ប៉ុន្តែបន្ទាប់ពីអ្នកលក់បានយល់ព្រមថា មាសនោះពិត រួចពួកគាត់បានឲ្យខ្សែកនោះមកវិញ ហើយជនសង្ស័យទាំងនោះបានប្ដូរជាមួយនឹងមាសក្លែងក្លាយ”។ លោកបានបន្ថែមថា ការបោកប្រាស់ដូចគ្នានេះដែរត្រូវបានប្រើជាមួយនឹងប្រាក់ដុល្លារក្លែងក្លាយដូរយកប្រាក់បាតថៃ។ ពួកគេជំនាញក្នុងរឿងនេះណាស់”។ លោក ម៉េងលាំង បានមានប្រសាសន៍ថា “ពួកគេបានបំបែកគ្នាជាពីរក្រុម ហើយបានទៅកាន់ហាងផ្សេងគ្នា ដើម្បីប្រើល្បិចបោកប្រាស់”។
លោកបានមានប្រសាសន៍ថា កាលពីព្រឹកថ្ងៃពុធ នៅក្នុងក្រុងខេមរភូមិន្ទ ជនសង្ស័យពីរនាក់បានបោកប្រាស់អាជីវករម្នាក់នៅផ្សារដងទង់ សង្កាត់ស្មាច់មានជ័យ ដោយលក់ខ្សែករមាសក្លែងក្លាយឲ្យពួកគាត់ក្នុងតម្លៃ១.៣០០ដុល្លារ។ ប៉ុន្មានម៉ោងក្រោយមក នៅក្នុងស្រុកកោះកុង ជនសង្ស័យពីរនាក់ទៀតនៅក្នុងឃុំកោះកាពិ បានដូរលុយដុល្លារអាមេរិកក្លែងក្លាយចំនួន៩.០០០ដុល្លារយកលុយបាតថៃ។
លោក ស៊ុំ យៀម អធិការនគរបាលស្រុកកោះកុងបានមានប្រសាសន៍ថា អ្នកទាំងបួននាក់នេះត្រូវបានចាប់ខ្លួន នៅពេលពួកគេបានព្យាយាមមកជួបគ្នាក្នុងស្រុករបស់លោកតាមផ្លូវជាតិលេខ៤៨នៅម៉ោងប្រហែល១រសៀល។
លោកបានមានប្រសាសន៍ថា “ពួកគេត្រូវបានចាប់ខ្លួន ខណៈដែលព្យាយាមគេចខ្លួនតាមទូក។ ជនសង្ស័យទាំងនេះកំពុងត្រូវបានឃុំខ្លួននៅស្នងការដ្ឋាននគរបាលខេត្ត ដើម្បីសាកសួរនៅពេលខាងមុខ”។
លោក ស៊ុំ យៀម បានបង្ហាញអត្តសញ្ញាណជនសង្ស័យដែលចាប់ខ្លួនបានគឺឈ្មោះ ឡេ តានលិច អាយុ៤០ឆ្នាំ ហ៊ុញ ង៉ុកត្រាញ់ អាយុ៤០ឆ្នាំ ង្វៀន វ៉ានម៉ាញ់ អាយុ២៨ឆ្នាំ និង ង្វៀន វ៉ាន់ថយ អាយុ៣៥ឆ្នាំ។ លោកមិនចេញឈ្មោះជនសង្ស័យពីរនាក់ទៀតទេ គឺបុរសជនជាតិវៀតណាមម្នាក់ និងស្ត្រីម្នាក់ ពីព្រោះនគរបាលកំពុងស្វែងរកពួកគេនៅឡើយ៕ សារុន