ពីរសប្ដាហ៍បន្ទាប់ពីអ្នកស្វែងរកសិទ្ធិជ្រកកោនជនជាតិម៉ុងតាញ៉ាចំនួនប្រាំនាក់ បានឆ្លងកាត់ព្រំដែនពីប្រទេសវៀតណាមចូលមកខេត្តរតនគិរី អង្គការសហប្រជាជាតិបានលើកឡើងកាលពីម្សិលមិញថា សេចក្ដីរាយការណ៍អំពីការមកដល់នៃអ្នកស្វែងរកសិទ្ធិជ្រកកោនជនជាតិម៉ុងតាញ៉ាចំនួនប្រាំបួននាក់បន្ថែមទៀត ក្នុងនោះរួមមានទាំងក្មេងៗបីនាក់ផង គឺត្រូវបានបន្ថែមចូលទៅក្នុងស្ថានភាពមួយដែលត្រូវជួយសង្គ្រោះជាបន្ទាន់។
អ្នកភូមិជនជាតិដើមភាគតិចចារ៉ាយចំនួនពីរនាក់ ដែលរស់នៅក្នុងខេត្តរតនគិរីបានឲ្យដឹងថា ជនជាតិភាគតិចម៉ុងតាញ៉ាចំនួនប្រាំបួននាក់បានមកដល់កាលពីថ្ងៃសៅរ៍ ហើយកំពុងតែលាក់ខ្លួននៅក្នុងព្រៃក្នុងស្រុកអណ្ដូងមាស។ ជនជាតិភាគតិចម៉ុងតាញ៉ាគឺជាក្រុមជនជាតិភាគតិចដែលមកពីតំបន់ខ្ពង់រាបភាគកណ្ដាលនៃប្រទេសវៀតណាម។
លោកស្រី វ៉ានហៀ លី (Wan-Hea Lee) ប្រធានប្រចាំប្រទេសនៅការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) បានលើកឡើងតាមរយៈអុីម៉េលមួយកាលពីម្សិលមិញថា ការិយាល័យរបស់លោកស្រីកំពុងតែពិភាក្សាអំពីជនជាតិភាគតិចម៉ុងតាញ៉ាជាមួយក្រសួងមហាផ្ទៃនៅឡើយ ប៉ុន្តែលោកស្រីមិនបាននិយាយថា តើអង្គការសហប្រជាជាតិនឹងមានបំណងចូលទៅជួបពួកគេឬក៏អត់ឡើយ។
លោកស្រីបានមានប្រសាសន៍ថា ” OHCHR កំពុងព្រួយបារម្ភអំពីសេចក្ដីរាយការណ៍ក្នុងពេលថ្មីៗនេះដែលថា មានក្រុមជនជាតិភាគតិចម៉ុងតាញ៉ាថ្មីបានឆ្លងកាត់ព្រំដែនមក ក្នុងនោះរួមមានទាំងក្មេងៗផង ដោយត្រូវបន្ថែមចូលក្នុងស្ថានភាពដែលត្រូវជួយសង្គ្រោះជាបន្ទាន់។ វាគួរតែមានការផ្ដល់ឱកាសដល់ជនជាតិភាគតិចម៉ុងតាញ៉ា ដើម្បីបង្ហាញថា តើពួកគេកំពុងស្វែងរកសិទ្ធិជ្រកកោនឬយ៉ាងណា”។
គេមិនអាចទាក់ទងលោក ខៀវ សុភ័គ អ្នកនាំពាក្យក្រសួងមហាផ្ទៃបានឡើយ។
នគរបាលនៅក្នុងស្រុកអូរយ៉ាដាវជាទីដែលជនជាតិភាគតិចម៉ុងតាញ៉ាចំនួនប្រាំនាក់បានឆ្លងកាត់ព្រំដែនមកកាលពីដើមខែនេះ ហើយបច្ចុប្បន្នកំពុងតែលាក់ខ្លួននោះបានចាប់ផ្ដើមចូលឆែកឆេរផ្ទះរបស់អ្នកភូមិជនជាតិដើមភាគតិចចារ៉ាយពីមួយទៅមួយកាលពីថ្ងៃទី៩ ខែមករា ដើម្បីស្វែងរកអ្នកស្វែងរកសិទ្ធិជ្រកកោន ដោយគំរាមថានឹងចាប់ខ្លួនអ្នកណាដែលហ៊ានលាក់បំពួនពួកគេផងដែរ។
អ្នកភូមិជនជាតិដើមភាគតិចចារ៉ាយម្នាក់ដែលស្នើសុំមិនបញ្ចេញឈ្មោះ ព្រោះខ្លាចមានការធ្វើទុក្ខបុកម្នេញពីអាជ្ញាធរបាននិយាយថា ជនជាតិភាគតិចម៉ុងតាញ៉ាចំនួនប្រាំបួននាក់បន្ថែមទៀតនេះបានអះអាងថា ពួកគេគេចខ្លួនចេញពីការផ្ដន្ទាទោសពាក់ព័ន្ធនឹងសាសនា និងរឿងនយោបាយនៅក្នុងប្រទេសវៀតណាម។
អ្នកភូមិរូបនេះបាននិយាយដោយសំដៅទៅលើជនជាតិភាគតិចម៉ុងតាញ៉ាចំនួន១៣នាក់ ដែលគាត់ជួយលាក់បំពួននៅក្នុងខេត្តរតនគិរីកាលពីខែតុលាថា ” យើងបានសួរអ្នកទាំងនោះថា ហេតុអ្វីបានជាពួកគេគេចពីប្រទេសវៀតណាមមក ហើយពួកគេបានប្រាប់យើងដូចហេតុផលដែលជនជាតិភាគតិចម៉ុងតាញ៉ាចំនួន១៣នាក់មុនបានប្រាប់យើងដែរ”។ ជនជាតិភាគតិចម៉ុងតាញ៉ាទាំង១៣នាក់នោះ ត្រូវបានអង្គការសហប្រជាជាតិបញ្ជូនមករាជធានីភ្នំពេញ ចាប់តាំងពីខែតុលានោះមក ហើយឥឡូវពួកគេកំពុងដាក់ពាក្យសុំសិទ្ធិជ្រកកោន។
អ្នកភូមិរូបនេះបាននិយាយទៀតថា “ឥឡូវនេះ ក្រុមនេះកំពុងនៅកន្លែងមានសុវត្ថិភាពហើយ ប៉ុន្តែយើងមានផែនការប្ដូរទីតាំងរបស់ពួកគេ ព្រោះយើងព្រួយបារម្ភខ្លាចក្រែងអាជ្ញាធររកឃើញ ហើយចាប់ខ្លួនពួកគេ”។
អ្នកភូមិជនជាតិដើមភាគតិចចារ៉ាយម្នាក់ទៀតដែលរស់នៅក្នុងស្រុកអណ្ដូងមាសបានលើកឡើងថា គាត់បាននិយាយជាមួយក្រុមជនជាតិភាគតិចម៉ុងតាញ៉ានោះ បន្ទាប់ពីជួបពួកគេខណៈកំពុងប្រមូលផលដំឡូងមីកាលពីរសៀលថ្ងៃសៅរ៍។
គាត់បាននិយាយថា ” ពួកគេបានប្រាប់ខ្ញុំថា ពួកគេបានគេចពីប្រទេសវៀតណាមមក ព្រោះពួកគេត្រូវអាជ្ញាធរវៀតណាមគំរាមកំហែង”។ គាត់បានបន្ថែមទៀតថា ក្រុមនេះមានបុរសប្រាំនាក់ និងស្ត្រីម្នាក់ក៏ដូចជាកូនស្រីចំនួនពីរនាក់ និងកូនប្រុសអាយុ៩ខែម្នាក់របស់ស្ត្រីរូបនេះផងដែរ។
លោក ងួន គឿន ស្នងការនគរបាលខេត្ត និងលោក ភិន សុវណ្ណ អធិការនគរបាលស្រុកអណ្ដូងមាសបានលើកឡើងថា ពួកគេគាត់មិនបានដឹងថាមានជនជាតិភាគតិចម៉ុងតាញ៉ាចំនួនប្រាំបួននាក់បន្ថែមទៀតបានឆ្លងកាត់ព្រំដែនមកឡើយ៕ ស៊ុយឈាង