យោងតាមឯកសារតុលាការដែលទទួលបានកាលពីដើមខែនេះបានឲ្យដឹងថា សាលាដំបូងខេត្តព្រះសីហនុ បានចោទប្រកាន់លោក នីកូឡៃ ដូរ៉ូសិនកូ ពាណិជ្ជករជនជាតិរុស្ស៊ីពីបទរំលោភសេចក្ដីទុកចិត្ត ហើយបានបង្គាប់ឲ្យឃុំខ្លួនលោកចំពោះការមិនប្រគល់អាជ្ញាប័ណ្ណវិនិយោគកោះចំនួនបួននៅក្នុងសមុទ្រខេត្តព្រះសីហនុទៅឲ្យលោក សេរហ្គេ ប៉ូលុនស្គី ជាគូប្រជែងរបស់ខ្លួនយូរមកហើយនោះ។
មន្ត្រីនគរបាលមាននិយាយកាលពីម្សិលមិញថា លោក ដូរ៉ូសិនកូ អាយុ៥៤ឆ្នាំកំពុងលាក់ខ្លួន។ សេចក្ដីសម្រេចរបស់តុលាការកាលពីថ្ងៃទី២៣ ខែធ្នូ ធ្វើឡើងបន្ទាប់ពីមានជម្លោះទាំងឯកជន និងរដ្ឋរវាងជនជាតិរុស្ស៊ីដ៏មានអំណាចទាំងនេះ រួមមានការប្ដឹងតបតគ្នាក្នុងតុលាការកាលពីខែធ្នូ ជុំវិញការអះអាងរបស់លោក ដូរ៉ូសិនកូ ថា លោក ប៉ូឡុនស្គី អាយុ៤២ឆ្នាំ ដែលគេតាមចាប់ខ្លួននៅក្នុងប្រទេសរុស្ស៊ីពីបទកិបកេងប្រាក់រាប់លានដុល្លារនោះ បានបញ្ជាឲ្យមានការវាយប្រហារដោយហិង្សាមកលើរូបគាត់ ដែលបានបណ្ដាលឲ្យកូនប្រុសរបស់គាត់ឈ្មោះ អូសថេប បាក់ឆ្អឹងថ្គាម។
សេចក្ដីសម្រេចដែលចុះហត្ថលេខាដោយលោក ហួត វិចិត្រ ព្រះរាជអាជ្ញារងមានខ្លឹមសារថា “កាលពីថ្ងៃទី១៨ ខែមីនា ឆ្នាំ២០១៣ លោក នីកូឡៃ ដូរ៉ូសិនកូ បានចុះហត្ថលេខាលើកិច្ចសន្យាប្រគល់អាជ្ញាប័ណ្ណវិនិយោគកោះ១ កោះ២ កោះដំឡូង និងកោះព្រីង ទៅឲ្យលោក សេរហ្គេ យូរីវីក ប៉ូលុនស្គី ក្នុងរយៈពេលបីខែកន្លះចាប់ពីថ្ងៃចុះហត្ថលេខានេះតទៅ”។
សេចក្ដីសម្រេចនេះមានខ្លឹមសារថា “ប៉ុន្តែរហូតមកទល់ពេលនេះលោក នីកូឡៃ ដូរ៉ូសិនកូ មិនបានប្រគល់អាជ្ញាប័ណ្ណវិនិយោគឡើយ”។ សេចក្ដីសម្រេចដដែលនេះបន្តថា លោក ប៉ូលុនស្គី បានផ្តល់ប្រាក់ឲ្យលោក ដូរ៉ូសិនកូ ចំនួន១លានដុល្លារ សម្រាប់បង់ពន្ធនិងសម្រាប់ការចំណាយផ្សេងៗទៀតក្នុងការអភិវឌ្ឍកោះទាំងបួននេះ។
សេចក្ដីសម្រេចនេះលើកឡើងថា “សកម្មភាពខាងលើគឺជាបទល្មើស គឺបទរំលោភសេចក្ដីទុកចិត្ត” ។ ការចោទប្រកាន់នេះមានទោសជាប់ពន្ធនាគាររហូតដល់៣ឆ្នាំ។
សេចក្ដីសម្រេចរបស់តុលាការបញ្ចប់ដោយបង្គាប់ឲ្យឃុំខ្លួនលោក ដូរ៉ូសិនកូ បណ្ដោះអាសន្ន…ដើម្បីរារាំងលោកមិនឲ្យប្រព្រឹត្តបទល្មើសថ្មី ហើយដើម្បីទុកឲ្យតុលាការចាត់វិធានការតាមផ្លូវច្បាប់បន្ថែមទៀត។
លោក វិចិត្រ ព្រះរាជអាជ្ញារងបានបដិសេធមិនធ្វើអត្ថាធិប្បាយអំពីរឿងក្តីនេះទេ ដោយបង្វែរសំណួរទៅលោក ម៉ុង មុនីចរិយា ប្រធានសាលាដំបូងខេត្ត។
លោកចៅក្រម ម៉ុង មុនីចរិយា បានមានប្រសាសន៍ថា លោកមិនចាំសេចក្ដីសម្រេចកាលពីថ្ងៃទី២៣ ខែធ្នូទេ ពីព្រោះឯកសារតុលាការមួយចំនួនសុទ្ធតែមានឈ្មោះលោក ដូរ៉ូសិនកូ នៅក្នុងនោះ។ លោកបានមានប្រសាសន៍កាលពីម្សិលមិញថា “ខ្ញុំមិនចាំទេ។ មានរឿងក្ដីច្រើនទាក់ទងលោក នីកូឡៃ ដូរ៉ូសិនកូ”។
លោក បែនសុន សម័យ មេធាវីតំណាងលោក ប៉ូលុនស្គី បានមានប្រសាសន៍ថា លោកបានទទួលច្បាប់ចម្លងនៃសេចក្ដីសម្រេចនោះហើយ ប៉ុន្តែបានបដិសេធមិនធ្វើអត្ថាធិប្បាយអំពីខ្លឹមសារឡើយ។ ទោះជាយ៉ាងណា លោកបានមានប្រសាសន៍ថា លោកបានដាក់ពាក្យបណ្ដឹងចំនួន១២ទៅសាលាដំបូងខេត្តព្រះសីហនុ ទាក់ទងជម្លោះរបស់កូនក្ដីលោកជាមួយលោក ដូរ៉ូសិនកូ រួមទាំងពាក្យបណ្ដឹងជុំវិញ “បញ្ហាដីធ្លី ការផ្ទេរភាគហ៊ុន និងឯកសារក្លែងក្លាយជាដើម”។
គេមិនអាចទាក់ទងលោក ដូរ៉ូសិនកូ និងលោក ស៊ុន សំអុល មេធាវីរបស់គាត់បានទេ។ ទាំងលោក ចេង កុសល ស្នងការនគរបាលខេត្ត និងលោក កុល ផល្លី ស្នងការរងបានមានប្រសាសន៍ថា តុលាការមិនបានទាក់ទងនគរបាលអំពីរឿងក្ដីនេះទេ។
នៅពេលត្រូវបានសួរថា តើលោកបានដឹងថា លោក ដូរ៉ូសិនកូ នៅឯណាទេ លោក ផល្លី បានមានប្រសាសន៍ថា ខ្ញុំមិនដឹងទេ។ ពួកគេកំពុងលាក់បាំងពីយើង” ហើយលោកបានបដិសេធមិននិយាយលម្អិតឡើយ។
នៅក្នុងបទសម្ភាសកាលពីដើមខែនេះ លោក អុីលយ៉ា រ៉ូសិនហ្វីល មន្ត្រីទំនាក់ទំនងរបស់លោក ប៉ូលុនស្គី បាននិយាយថា លោកជឿថាការចោទប្រកាន់ពីបទរំលោភសេចក្ដីទុកចិត្តមកលើលោក ដូរ៉ូសិនកូ គឺយុត្តិធម៌សម្រាប់ចៅហ្វាយនាយរបស់លោក។
លោក រ៉ូសិនហ្វីល ក៏បានមានប្រសាសន៍ផងដែរថា លោកជឿថា ទំនាក់ទំនងរវាងលោក ដូរ៉ូសិនកូ និងអាជ្ញាធរមូលដ្ឋានមិនអាចជួយលោក ដូរ៉ូសិនកូ ក្នុងករណីនេះបានទេ។ លោកបានមានប្រសាសន៍ថា “មិនពាក់ព័ន្ធរឿងទំនាក់ទំនងឡើយ។ ភាគីមួយត្រូវភាគីមួយទៀតខុស”។
លោក ដូរ៉ូសិនកូ និងកូនប្រុសរបស់លោកដែលកាន់កាប់អចលនទ្រព្យមួយចំនួននៅក្នុងក្រុងព្រះសីហនុ រួមទាំងភោជនីយដ្ឋានផ្ទះពស់ជាដើមនោះ មានសញ្ជាតិខ្មែរ។ រូបថតដែលបង្ហោះក្នុងទំព័រហ្វេសប៊ុករបស់លោក អូសថេប ដូរ៉ូសិនកូ អាយុ៣៦ឆ្នាំ ដែលជាអនុសេនីយ៍ឯកក្នុងកងកម្លាំងនគរបាលអន្តោប្រវេសន៍ខេត្ត បង្ហាញពីរូបលោកឈរថតជាមួយរថយន្តស្ព័រ ដែលមានកាតសមាជិកគណបក្សប្រជាជនកម្ពុជា ហើយមានកាន់កាំភ្លើងទៀតផង។
កាលពីខែធ្នូ លោក សំអុល ជាមេធាវីរបស់លោក នីកូឡៃ ដូរ៉ូសិនកូ បានមានប្រសាសន៍ថា កូនក្ដីរបស់លោកបានជំរុញឲ្យសាលាដំបូងខេត្តអនុវត្តបទបញ្ជាបង្គាប់ឲ្យបណ្ដេញលោក ប៉ូលុនស្គី ចេញពីកោះឯកជនរបស់លោក គឺកោះដែកគោល។ លោក ប៉ូលុនស្គី បានបដិសេធមិនចេញពីកោះនោះឡើយ ហើយអាជ្ញាធរមូលដ្ឋានមិនដែលចាត់វិធានការណាមួយឡើយ”៕ សារុន (រាយការណ៍បន្ថែមដោយ វណ្ណ រើន)