35 C
Phnom Penh

អភិបាល​ខេត្ត​រតនគិរី​សង្ស័យ​អ្នក​ស្រុក​រត់ពន្ធ​ជនជាតិ​ភាគតិច​ម៉ុង​តាញ៉ា​

ដោយ ឌឹ ខេមបូឌា ដេលី

បទវិភាគ

អភិបាល​ខេត្ត​រតនគិរី​បាន​និយាយ​កាលពី​ថ្ងៃ​ច័ន្ទ​ថា លោក​សង្ស័យ​ថា អ្នក​ស្វែង​រក​សិទ្ធិ​ជ្រក​កោន​ម៉ុងតាញ៉ា​១៤​នាក់​ដែល​កំពុង​លាក់​ខ្លួន​ក្នុង​ព្រៃ​ស្រុក​អូរយ៉ាដាវ ត្រូវ​បាន​រត់​ពន្ធ​ឆ្លងកាត់​ព្រំដែន​ពី​ប្រទេស​វៀតណាម​ដោយ​ក្រុម​ជនជាតិ​ភាគតិច​ចារ៉ាយ​ក្នុង​តំបន់​នោះ។

អ្នក​ភូមិ​ចារ៉ាយ​មួយ​ក្រុម​ក្នុង​ស្រុក​នេះ​បាន​និង​កំពុង​ជួយ​ជន​ម៉ុងតាញ៉ា​ឲ្យ​គេចពី​អាជ្ញាធរ ចាប់តាំងពី​ក្រុម​មួយ​មាន​គ្នា​ប្រាំ​នាក់​បាន​មក​ដល់​កាលពី​ថ្ងៃទី​៣​ខែ​មករា។ មនុស្ស​ប្រាំបួន​នាក់​ទៀត​បាន​មក​ដល់​កាលពី​ថ្ងៃ​សៅរ៍។

អ្នក​ភូមិ​ដដែល​ក៏​បាន​ជួយ​ជន​ម៉ុងតាញ៉ា​១៣​នាក់​ដែល​បាន​ឆ្លង​ព្រំដែន​កាលពីចុង​ខែ​តុលា ឲ្យ​ទាក់ទង​ជាមួយ​តំណាង​អង្គការ​សហ​ប្រជាជាតិ​កាលពី​ចុង​ខែ​ធ្នូ។ អង្គការ​សហ​ប្រជាជាតិ​បន្ទាប់​មក​បាន​បញ្ជូន​អ្នក​ទាំង​១៣​នាក់​មក​ក្រុង​ភ្នំពេញ ដើម្បី​ដាក់​ពាក្យ​សុំ​ឋានៈ​ជន​ភៀស​ខ្លួន។

អភិបាល​ខេត្ត​រតនគិរី លោក ថង សាវ៉ុន បាន​មាន​ប្រសាសន៍​ថា លោក​ជឿ​ថា ក្រុម​ចារ៉ាយ​បាន​រត់ពន្ធ​ជនជាតិភាគតិច​ម៉ុងតាញ៉ា ដែល​និយាយ​ថា ពួកគេ​កំពុង​រត់​គេច​ចេញពី​ការ​ធ្វើ​ទុក្ខ​បុកម្នេញ​ខាង​សាសនា​និង​នយោបាយ ពី​ប្រទេស​វៀតណាម​ឆ្លង​មក​ប្រទេស​កម្ពុជា។

លោក សាវ៉ុន បាន​និយាយ​ថា “អ្នក​ដែល​ជួយ​យក​អាសារ​ជន​ចារ៉ាយ​វៀតណាម​ត្រូវ​តែ​ទទួល​ខុស​ត្រូវ​ចំពោះ​ការ​ប្រមូល​មនុស្ស​ទាំង​នោះ និង​ការ​លាក់​ពួក​គេ​ក្នុង​ខេត្ត​រតនគិរី។ យើង​នឹង​ប្តឹង​អ្នក​ទាំង​នោះ​ទៅ​តុលាការ​ពី​បទ​លាក់​មនុស្ស​ដោយ​ខុស​ច្បាប់”។ លោក​ក៏​បាន​អះអាង​ដែរ​ថា ក្រុម​អ្នក​ស្វែង​រក​សិទ្ធិ​ជ្រកកោន​មិន​មែន​ជា​ជន​ម៉ុងតាញ៉ា​ពិត​ប្រាកដ​ទេ។

លោក​បាន​និយាយ​ថា “ខ្ញុំ​សូម​ប្រាប់​ថា គ្មាន​ជន​ម៉ុងតាញ៉ា​កំពុង​លាក់​ខ្លួន​ក្នុង​ខេត្ត​រតនគិរី​ទេ ប៉ុន្តែ​មាន​ប្រជាជន​ចារ៉ាយ​មួយ​ចំនួន​មកពី​វៀតណាម​កំពុង​លាក់​ខ្លួន​ពិតមែន”។

ចារ៉ាយ​ជា​ជន​អន្តោ​គ្រាម​ដែល​ច្រើនតែ​រស់​នៅ​ក្នុង​តំបន់​ខ្ពង់រាប​វៀតណាម ពួកគេ រួម​ជាមួយ​កុលសម្ព័ន្ធ​ប្រហែល​៣០​ បង្កើត​ជា​ក្រុម​ម៉ុងតាញ៉ា។

អ្នក​ភូមិ​ចារ៉ាយ​ម្នាក់​ដែល​កំពុង​ជួយ​ក្រុម​អ្នក​ស្វែង​រក​សិទ្ធិ​ជ្រកកោន និង​ដែល​បាន​សុំ​មិន​ប្រាប់​ឈ្មោះ​ព្រោះ​ខ្លាច​មាន​ការ​សងសឹក​ពី​អាជ្ញាធរ បាន​និយាយ​ថា លោក​មិន​បាន​នាំ​ជន​ម៉ុងតាញ៉ា​មកពី​ប្រទេស​វៀតណាម​ទេ។ លោក​បាន​និយាយ​បន្ថែម​ថា “ពួកគេ​បាន​មក​ដោយ​ខ្លួន​ឯង”។

អ្នក​នាំពាក្យ​ក្រសួង​មហាផ្ទៃ លោក ខៀវ សុភ័គ បាន​មាន​ប្រសាសន៍​ថា ឧត្តម​ស្នងការ​អង្គការ​សហ​ប្រជាជាតិ​ទទួល​បន្ទុក​ជន​ភៀសខ្លួន (UNHCR) គួរ​កំណត់​ថាតើ​ជន​ម៉ុងតាញ៉ា​១៤​នាក់​ថ្មី​ជា​អ្នក​ស្វែង​សុំ​សិទ្ធិ​ជ្រកកោន​ស្រប​ច្បាប់​ឬ​យ៉ាងណា ប៉ុន្តែ​មិន​បាន​និយាយ ថាតើ​ឬ ពេលណា​អង្គការ​សហ​ប្រជាជាតិ​នឹង​ទទួល​បាន​ការ​អនុញ្ញាត​ទៅ​ជួប​ពួកគេ​នោះ​ទេ។

លោក​ឧត្តម​សេនីយ៍ សុភ័គ បាន​បន្ថែម​ថា ប្រសិនបើ​ក្រុម​អ្នក​ស្វែង​រក​សិទ្ធិ​ជ្រកកោន​ត្រូវ​បាន​គេ​រក​ឃើញ​ថា​ជា​ជន​អន្តោប្រវេសន៍​ខុស​ច្បាប់ នរណា​ក៏​ដោយ​ដែល​លាក់​ពួកគេ​នឹង​ត្រូវ​មាន​ទោស។

លោក​បាន​និយាយ​ថា “យោង​តាម​ច្បាប់​អន្តោប្រវេសន៍ ប្រសិនបើ​អ្នក​ទាំង​នោះ​ចង់​លាក់​ជន​អន្តោប្រវេសន៍​ខុស​ច្បាប់ ពួកគេ​នឹង​ប្រឈម​នឹង​ច្បាប់​នៃ​ប្រទេស​កម្ពុជា”។

លោកស្រី វីវៀន តាន (Vivian Tan) មន្ត្រី​ផ្នែក​ព័ត៌មាន​ប្រចាំ​តំបន់ បាន​ឲ្យ​ដឹង​តាម​រយៈ​អីុម៉េល​ថា ការិយាល័យ​របស់​លោក​ស្រី​ទទួល​ខុស​ត្រូវ​ខាង​ការពារ​ជន​ភៀសខ្លួន​និង​អ្នក​ស្វែង​រក​សិទ្ធិ​ជ្រកកោន​ប៉ុណ្ណោះ ហើយ​មិន​អាច​ជួយ​អ្នក​ភូមិ​ចារ៉ាយ​បាន​ទេ។

លោក​ស្រី​ តាន បាន​មាន​ប្រសាសន៍​ថា “គួរ​ឲ្យ​ស្តាយ​ណាស់​ប្រសិនបើ​អ្នក​ដែល​ជួយ​ជន​ស្វែង​រក​សិទ្ធិ​ជ្រកកោន​ត្រូវ​ទទួល​រង​ទណ្ឌកម្ម​ដោយសារ​អំពើ​មនុស្ស​ធម៌​នោះ”៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស