ស្ត្រីអាយុ៣៣ឆ្នាំម្នាក់ បានស្លាប់អំឡុងការវះកាត់ដែលគ្មានជំនាញ នៅគ្លីនិកគ្មានអាជ្ញាប័ណ្ណមួយក្នុងក្រុងពោធិ៍សាត់កាលពីថ្ងៃច័ន្ទ។អាជ្ញាធរមូលដ្ឋានបានបិទគ្លីនិកនេះម្តងរួចមកហើយកាលពីដើមខែនេះ ប៉ុន្តែ បានបើកឡើងវិញនៅពេលអាជ្ញាធរមិនបានចាប់អារម្មណ៍។
លោក តាំង អេង នាយការិយាល័យផ្នែកបច្ចេកទេស និងវិទ្យាសាស្ត្រនៃនគរបាលខេត្តបានឲ្យដឹងថា នគរបាលខេត្តពោធិ៍សាត់បានបិទគ្លីនិកនេះជាលើកទី២កាលពីម្សិលមិញ ហើយបានចាប់ផ្តើមតាមស្វែងរកបុគ្គលិកពេទ្យចំនួនពីរនាក់ដែលកំពុងរត់គេចខ្លួន និងដែលគេសង្ស័យថា ជាអ្នកធ្វើឲ្យស្ត្រីរូបនេះបាត់បង់ជីវិត។
លោក តាំង អេង បានឲ្យដឹងបន្តថា ក្រុមគ្រួសាររបស់ស្ត្រីរងគ្រោះ សឹង ចាន់ធឿន ដែលរស់នៅក្នុងស្រុកក្រគរ បាននាំស្ត្រីរងគ្រោះនេះទៅគ្លីនិកមួយក្នុងសង្កាត់ផ្ទះព្រៃក្នុងក្រុងពោធិ៍សាត់ កាលពីយប់ថ្ងៃច័ន្ទ ដើម្បីវះកាត់យកគីសចេញពីស្បូន។
លោកបានមានប្រសាសន៍ថា “យើងទទួលបានការហៅទូរស័ព្ទពីក្រុមគ្រួសារជនរងគ្រោះព្រោះពួកគេសង្ស័យថា ជនរងគ្រោះបានស្លាប់ដោយសារការវះកាត់ដោយគ្រូពេទ្យជនជាតិចិន”។
លោក តាំង អេង បានលើកឡើងបន្ថែមថា បុគ្គលិកពេទ្យទាំងពីរនាក់នេះ ដែលសុទ្ធតែជនជាតិចិនដូចគ្នាបានព្យាយាមសូកប៉ាន់គ្រួសារជនរងគ្រោះកុំឲ្យប្តឹងនគរបាល បន្ទាប់ពីដឹងថា អ្នកជំងឺបានស្លាប់នៅម៉ោងប្រហែល១០យប់។
លោកបានមានប្រសាសន៍ថា “គ្រូពេទ្យជនជាតិចិនបានព្យាយាមចរចាជាមួយគ្រួសារជនរងគ្រោះដើម្បីកុំឲ្យប្តឹងពួកគេ ប៉ុន្តែ គ្រួសារជនរងគ្រោះមិនព្រមចរចាឡើយ។ គ្លីនិកនេះត្រូវបានបិទ ហើយបរិក្ខាពេទ្យត្រូវបានរិបអូស”។
លោក វេជ្ជបណ្ឌិត ច័ន្ទ សុខា ប្រធានមន្ទីរពេទ្យបង្អែកខេត្តពោធិ៍សាត់បានលើកឡើងថា គេបានធ្វើកោសល្យវិច័យសាកសពនៅម៉ោងប្រហែល៣ទៀបភ្លឺកាលពីម្សិលមិញតាមសំណើរបស់នគរបាល។ លោកបានមានប្រសាសន៍ថា “លទ្ធផលនៃការធ្វើកោសល្យវិច័យបង្ហាញថា ជនរងគ្រោះបានស្លាប់ដោយសារការវះកាត់គ្មានជំនាញ”។ លោកបានបន្ថែមថា អ្នកស្រី ចាន់ធឿន បានបាត់បង់ឈាមជាច្រើន។
លោកបានមានប្រសាសន៍បន្តថា “ជាទូទៅសម្រាប់ការវះកាត់បែបនេះ យើងត្រូវការគ្រូពេទ្យយ៉ាងតិចប្រាំនាក់ ប៉ុន្តែ ក្នុងករណីនេះមានគ្រូពេទ្យតែម្នាក់ ឬពីរនាក់ប៉ុណ្ណោះ”។
លោកវេជ្ជបណ្ឌិត សុខា បានមានលើកឡើងទៀតថា គ្រូពេទ្យជនជាតិចិនបានព្យាយាមលាក់បាំងការធ្វេសប្រហែសរបស់ខ្លួន ដោយដេរភ្ជាប់មុខរបួសឡើងវិញ ខណៈការវះកាត់នៅមិនទាន់ចប់រួចរាល់។
លោក ខូយ ឌី ប្រធានមន្ទីរសុខាភិបាលខេត្តបានលើកឡើងថា អាជ្ញាធរបានបញ្ជាឲ្យគ្លីនិកគ្មានអាជ្ញាប័ណ្ណនេះបិទទ្វារម្តងរួចមកហើយកាលពីដើមខែនេះ ប៉ុន្តែ បានបើកឡើងវិញដោយស្ងាត់ៗ។ លោកបានមានប្រសាសន៍ថា “វាគឺជាការធ្វេសប្រហែសរបស់យើង ដែលអនុញ្ញាតឲ្យគ្លីនិកនេះបើកឡើងវិញ ព្រោះយើងគ្មានធនធានដើម្បីតាមដាន”៕ស៊ុយឈាង