លោក សូរ ឃុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍រយៈពេលពីរទសវត្សរ៍បានទទួលមរណភាពនៅក្នុងរាជធានីភ្នំពេញដោយសារជំងឺកាលពីម្សិលមិញ នេះបើតាមការអះអាងរបស់កូនប្រុសលោក។
លោក សុខន បញ្ញារិទ្ធ បាននិយាយថា “ឪពុករបស់ខ្ញុំធ្លាក់ខ្លួនឈើពីរខែមកហើយ ហើយ គាត់បានសម្រាកព្យាបាលនៅផ្ទះក្នុងខណ្ឌទួលគោករហូតដល់គាត់បានស្លាប់នៅថ្ងៃនេះ”។
លោក បញ្ញារិទ្ធ បានលើកឡើងថា ឪពុករបស់លោកបានធ្វើជារដ្ឋមន្ត្រីក្រសួងប្រៃសណីយ៍ និងទូរគមនាគមន៍ ពីឆ្នាំ១៩៩៣រហូតដល់ខែកញ្ញា ឆ្នាំ២០១៣ ដែលនៅពេលនោះគាត់ត្រូវបានជំនួសដោយលោក ប្រាក់ សុខុន អតីតរដ្ឋលេខាធិការទីស្តីការគណៈរដ្ឋមន្ត្រី ហើយគាត់បានក្លាយជាសមាជិកសភាគណបក្សប្រជាជនកម្ពុជាមណ្ឌលតាកែវ។
អំឡុងលោក សូរ ឃុន កាន់តំណែង វិស័យទូរគមនាគមន៍បានកើនឡើងរួមមានក្រុមហ៊ុនទូរស័ព្ទចល័តជិត១២។
លោក បញ្ញារិទ្ធ បាននិយាយថា ឪពុករបស់លោកបានស្លាប់ចោលប្រពន្ធរបស់គាត់ កូនប្រាំមួយនាក់ និងចៅ១១នាក់ ហើយសពរបស់គាត់នឹងត្រូវបូជានៅមុខវត្តបទុមវតីក្នុងរាជធានីភ្នំពេញនៅថ្ងៃអាទិត្យ៕សារុន