នគរបាលប្រឆាំងការជួញដូរមនុស្សបានចាប់ខ្លួនជនសង្ស័យចំនួនបីនាក់ កាលពីពីរថ្ងៃកន្លងមកនេះពីបទបញ្ជូនស្ត្រីខ្មែរយ៉ាងតិចចំនួនបួននាក់ ឲ្យទៅរៀបការជាមួយបុរសនៅក្នុងប្រទេសចិនកាលពីមួយឆ្នាំមុន។
លោក កែវ ធា នាយការិយាល័យនគរបាលប្រឆាំងការជួញដូរមនុស្សរាជធានី បានលើកឡើងថា ស្ត្រីខ្មែរម្នាក់ក្នុងចំណោមស្ត្រីខ្មែរទាំងបួននាក់ដែលត្រូវបានបញ្ជូនទៅប្រទេសចិនបានត្រឡប់មកវិញហើយកាលពីថ្ងៃអង្គារ បន្ទាប់ពីនគរបាលចិនបានឃាត់នាងនៅអាកាសយានដ្ឋានមួយក្នុងប្រទេសចិនកាលពីថ្ងៃអាទិត្យ។
លោកបានមានប្រសាសន៍ថា ”នគរបាលចិនបានឃាត់នាងនៅអាកាសយានដ្ឋាន”។ លោកបានគូសបញ្ជាក់ថា នាងបានវង្វេងផ្លូវ ហើយបានសុំជំនួយពីនគរបាលចិន។ លោកបានមានប្រសាសន៍បន្ថែមថា “នៅពេលនគរបាលចិនបានបញ្ជូននាងត្រឡប់មកប្រទេសកម្ពុជាវិញ ជនសង្ស័យបានដឹងរឿងនេះ ហើយទាមទារប្រាក់១០.០០០ដុល្លារពីនាងជាថ្លៃសម្រាប់ការរៀបចំនៅក្នុងការបញ្ជូននាងឲ្យទៅរៀបការជាមួយបុរសនៅក្នុងប្រទេសចិន”។
លោក កែវ ធា បានមានប្រសាសន៍បន្ថែមទៀតថា “ជនសង្ស័យបានសារភាពថា ចាប់តាំងពីឆ្នាំមុនមក ពួកគេបានជួញដូរស្ត្រីអស់ចំនួនបីនាក់រួចហើយដើម្បីឲ្យទៅរៀបការជាមួយបុរសជនជាតិចិន”។
លោក កែវ ធា បានលើកឡើងទៀតថា គេមិនដឹងថាស្ត្រីខ្មែរទាំងបីនាក់នេះដែលត្រូវបានបញ្ជូនទៅប្រទេសចិនរស់នៅកន្លែងណាឡើយ ហើយលោកបានបង្វែរសំណួរបន្ថែមទៀតទៅលោក ម៉ក់ ដារ៉េន មន្ត្រីនគរបាលប្រឆាំងការជួញដូរមនុស្សរាជធានីដែលធ្វើការពាក់ព័ន្ធនៅក្នុងករណីនេះ។
លោក ម៉ក់ ដារ៉េន បានលើកឡើងថា ក្រោយពេលជនសង្ស័យទាំងបីនេះទារប្រាក់១០.០០០ដុល្លារពីស្ត្រីដែលត្រឡប់ពីប្រទេសចិនមកកម្ពុជាវិញកាលពីថ្ងៃអង្គារ ស្ត្រីរូបនេះបានដាក់ពាក្យប្ដឹងទៅកាន់នគរបាល។
លោក ម៉ក់ ដារ៉េន បានមានប្រសាសន៍ថា “កាលពីព្រឹកថ្ងៃអង្គារ យើងទទួលបានពាក្យបណ្ដឹងមួយពីស្ត្រីរូបនេះ ដោយចោទប្រកាន់ជនសង្ស័យថា បានជួញដូរនាងទៅប្រទេសចិន។ បន្ទាប់ពីយើងទទួលបានពាក្យបណ្ដឹង យើងបានចាប់ខ្លួនស្ត្រីជនសង្ស័យម្នាក់កាលពីរសៀលថ្ងៃអង្គារដើម្បីសាកសួរ ហើយនៅព្រឹកនេះយើងបានចាប់ខ្លួនជនសង្ស័យពីរនាក់បន្ថែមទៀត”។
លោក ម៉ក់ ដារ៉េន បានប្រាប់អត្តសញ្ញាណរបស់ស្ត្រីដែលត្រឡប់ពីប្រទេសចិនមកវិញថា មានឈ្មោះ ឃឿន អាំ អាយុ២១ឆ្នាំ អតីតកម្មការិនីនៅក្នុងរាជធានីភ្នំពេញ រីឯជនសង្ស័យទាំងបីនាក់នោះវិញមានឈ្មោះដូចជា ចាន់ ឌី អាយុ២៦ឆ្នាំ បឿន សុលីន អាយុ៣៣ឆ្នាំ និង ជរ ឆោន អាយុ៣៨ឆ្នាំ។
លោក ម៉ក់ ដារ៉េន បានលើកឡើងបន្ថែមទៀតថា ជនសង្ស័យបានឲ្យប្រាក់ទៅគ្រួសាររបស់ ឃឿន អាំ ចំនួន១.០០០ដុល្លារជាថ្នូរដើម្បីឲ្យនាងយល់ព្រមទៅប្រទេសចិន។ លោកបានបន្ថែមថា “នៅពេលជនរងគ្រោះបានទៅដល់ប្រទេសចិន គ្រួសារជនរងគ្រោះត្រូវតែបង់ប្រាក់មកឲ្យជនសង្ស័យវិញចន្លោះពី៣០០ទៅ៤០០ដុល្លារ សម្រាប់សេវារត់ការផ្សេងៗ”។
លោក ម៉ក់ ដារ៉េន បានឲ្យដឹងទៀតថា ជនសង្ស័ទាំងបីនាក់នេះកំពុងត្រូវបានឃុំខ្លួននៅការិយាល័យនគរបាលប្រឆាំងការជួញដូរមនុស្សរាជធានី។ លោកបានមានប្រសាសន៍ថា “ថ្ងៃស្អែក យើងនឹងបញ្ជូនពួកគេទៅសាលាដំបូងរាជធានីដើម្បីចោទប្រកាន់”៕ ស៊ុយឈាង