កាលពីម្សិលមិញ លោក ជា សុផារ៉ា រដ្ឋមន្ត្រីក្រសួងអភិវឌ្ឍន៍បទ បានជួបប្រជុំជាមួយគណៈកម្មការអភិវឌ្ឍន៍ជនបទ បរិស្ថាន និងធនធានទឹកនៃរដ្ឋសភា សម្រាប់ការពិនិត្យផ្ទៀងផ្ទាត់ការងាររបស់ក្រសួងលោកក្នុងរយៈពេល១ឆ្នាំមកនេះ។
លោក ប៉ុល ហំម តំណាងរាស្ត្រជាន់ខ្ពស់របស់គណបក្សសង្គ្រោះជាតិ ដែលជាប្រធានគណៈកម្មការនេះ បានប្រាប់ក្រុមអ្នកយកព័ត៌មានបន្ទាប់ពីកិច្ចជំនួបបិទទ្វារកាលពីម្សិលមិញថា ក្រុមតំណាងរាស្ត្របានផ្ដោតសំណួររបស់ខ្លួនទៅលើការចាត់វិធានការពង្រឹងសេដ្ឋកិច្ចនៅតាមតំបន់ជនបទដើម្បីកុំឲ្យប្រជាពលរដ្ឋកម្ពុជាបង្ខំចិត្តធ្វើចំណាកស្រុក ដើម្បីស្វែងរកការងារធ្វើ។
លោកបានមានប្រសាសន៍ថា “សមាជិកគណៈកម្មការនេះបានកោតសរសើរកិច្ចប្រឹងប្រែងរបស់ក្រសួងអភិវឌ្ឍន៍ជនបទ ប៉ុន្តែយើងបានស្នើសុំលោករដ្ឋមន្ត្រីឲ្យជួយប្រជាពលរដ្ឋក្រីក្រនៅតាមតំបន់ជនបទ និងជាពិសេសជួយធ្វើឲ្យប្រសើរឡើងនូវកម្រិតជីវភាពរបស់អ្នកភូមិ ដើម្បីកាត់បន្ថយការធ្វើចំណាកស្រុក។ បញ្ហាសំខាន់ដែលគណៈកម្មការមើលឃើញគឺការធ្វើចំណាកស្រុក”។
យោងតាមអង្គការពលកម្មអន្តរជាតិ ILO បានឲ្យដឹងថា ប្រជាពលរដ្ឋកម្ពុជាប្រមាណ១លាននាក់ក្នុងចំណោមប្រជាពលរដ្ឋសរុបជាង១៥លាននាក់ បានចាកចោលផ្ទះសំបែងដើម្បីធ្វើការនៅក្រៅប្រទេស។ ក្រសួងការបរទេសបានប៉ាន់ប្រមាណថា គ្រាន់តែនៅក្នុងប្រទេសថៃមួយ មានប្រជាពលរដ្ឋកម្ពុជាប្រមាណ៦៦០.០០០នាក់ធ្វើការនៅទីនោះ។
លោក ជា សុផារ៉ា ដែលត្រូវបានដកចេញពីតំណែងអភិបាលរាជធានីភ្នំពេញកាលពីឆ្នាំ២០០៣ បានប្រាប់ក្រុមអ្នកយកព័ត៌មានថា ក្រសួងរបស់លោកបានខិតខំប្រឹងប្រែងបង្កើតការងារ និងគាំទ្រដល់អាជីវកម្មនានានៅតាមតំបន់ជនបទ។
លោកបានមានប្រសាសន៍ថា “នៅចំណុចនេះ ក្រសួងអភិវឌ្ឍន៍ជនបទបានបង្កើតមជ្ឈមណ្ឌលបណ្ដុះបណ្ដាល ហើយបានផ្ដល់កម្ចីឥណទានខ្នាតតូចដោយគិតអត្រាការប្រាក់ទាប ដើម្បីបង្កើតការងារ និងជំនាញសម្រាប់ប្រជាពលរដ្ឋកាត់បន្ថយការធ្វើចំណាកស្រុក និងពង្រឹងផលិតភាព”។
លោក ជា សុផារ៉ា ក៏បានអួតសរសើរដែរអំពីការទទួលបានសេវាទឹកស្អាត និងបង្គន់អនាម័យយ៉ាងច្រើនជាងមុន ដោយសារតែការខិតខំប្រឹងប្រែងរបស់ក្រសួងលោក។ លោកមានប្រសាសន៍ថា “ក្រសួងផ្គត់ផ្គង់ទឹកស្អាតបាន៥០ភាគរយនៅទូទាំងប្រទេស ហើយប្រជាពលរដ្ឋ៤៩ភាគរយមានបង្គន់អនាម័យ”។
លោកបានលើកឡើងបន្ថែមទៀតថា ក្រសួងរបស់លោកបានស្ថាបនាផ្លូវលំប្រវែង៥០០គីឡូម៉ែត្រនៅតាមបណ្ដាខេត្តកាលពីឆ្នាំមុន ហើយគ្រោងនឹងស្ថាបនាឲ្យបានប្រវែង១.២០០គីឡូម៉ែត្របន្ថែមទៀតឲ្យបានមុនដំណាច់ឆ្នាំ២០១៨។
ហើយទោះបីជាមានវិវាទជាច្រើនរវាងក្រុមហ៊ុនឯកជន និងសហគមន៍ជនជាតិដើមភាគតិចជុំវិញបញ្ហាដីធ្លីនៅតាមតំបន់ជនបទក្ដី ក៏លោក ជា សុផារ៉ា បានមានប្រសាសន៍ថា រដ្ឋាភិបាលបានប្ដេជ្ញាជួយការពារជនជាតិដើមភាគតិចនៅក្នុងប្រទេស។ លោកបានបន្តថា ” ជាឧទាហរណ៍ ពួកគាត់ត្រូវមានព្រៃសហគមន៍ និងដីបញ្ចុះសព”៕ សុខុម