ជនជាតិរុស្ស៊ីម្នាក់ដែលបានធ្វើឲ្យក្មេងប្រុសអាយុ១៤ឆ្នាំម្នាក់រងរបួសនៅក្នុងខេត្តព្រះសីហនុ បន្ទាប់ពីបើកបរម៉ូតូទាំងស្រវឹងជ្រុលទៅបុករទេះប្រមូលសំរាមរបស់ក្មេងប្រុសរងគ្រោះកាលពីថ្ងៃអង្គារ ត្រូវបានដោះលែងពីមន្ទីរឃុំឃាំងរបស់នគរបាលកាលពីថ្ងៃពុធ នេះបើយោងតាមមន្ត្រីបានលើកឡើងកាលពីថ្ងៃម្សិលមិញ។
យោងតាមលោក ព្រំ ពៅ នាយការិយាល័យនគរបាលចរាចរខេត្តព្រះសីហនុ បានឲ្យដឹងថា ខណៈពេលបុរសជនជាតិរុស្ស៊ីដែលមានឈ្មោះ អ៊ែនឌ្រូ ហ្វេរ៉ូវ (Andrew Ferov) អាយុ២៤ឆ្នាំ កំពុងបើកបរត្រឡប់ទៅកាន់ផ្ទះសំណាក់ដែលខ្លួនស្នាក់នៅក្នុងសង្កាត់លេខ៣ក្រុងព្រះសីហនុវិញ ក៏ស្រាប់តែរេចង្កូតជ្រុលទៅបុករទេះដឹកសំរាមតែម្ដង។
លោកបានមានប្រសាសន៍ថា “ជនសង្ស័យជនជាតិរុស្ស៊ីបានបុករទេះ ហើយរទេះក៏បានបុកត្រូវក្មេងប្រុសដែលកំពុងរើសដប។ ក្មេងប្រុសរូបនោះបានរងរបួសស្រាល”។ លោកបានមានប្រសាសន៍បន្ថែមទៀតថា ជនជាតិរុស្ស៊ីរូបនេះត្រូវបានដោះលែងវិញ បន្ទាប់ពីមេធាវីរបស់គាត់បានដាក់សំណើសុំដោះលែងទៅសាលាដំបូងខេត្តព្រះសីហនុ។
ព្រះរាជអាជ្ញារង រស់ សារ៉ាំ បានមានប្រសាសន៍ថា ករណីនេះនៅតែត្រូវស៊ើបអង្កេត ហើយថា បុរសជនជាតិរុស្ស៊ីរូបនេះនឹងត្រូវចាប់ខ្លួនវិញ ប្រសិនបើមានការចោទប្រកាន់។ លោកបានបន្តថា “យើងបានដោះលែងគាត់ដោយសារតែជនរងគ្រោះមិនរងរបួសធ្ងន់ ហើយម្យ៉ាងគាត់ជាភ្ញៀវទេសចរនៅក្នុងប្រទេសរបស់យើង ដូច្នេះបញ្ហាតូចមិនគួរធ្វើឲ្យក្លាយបញ្ហាធំទេ”៕ សុខុម