អ្នកអូសរទេះជាង១០០នាក់ដែលបានដឹកទំនិញឆ្លងកាត់ព្រំដែនកម្ពុជា-ថៃបានធ្វើការតវ៉ានៅច្រកទ្វារអន្តរជាតិប៉ោយប៉ែតស្ថិតក្នុងខេត្តបន្ទាយមានជ័យកាលពីម្សិលមិញ ដោយចោទអភិបាលក្រុងប៉ោយប៉ែតថា មិនបានគោរពតាមការសន្យារបស់លោកក្នុងការហាមឃាត់មន្ត្រីគយកុំឲ្យទាមទារប្រាក់សំណូកខ្ពស់ហួសហេតុពីពួកគាត់។
អ្នកអូសរទេះម្នាក់ដែលបដិសេធមិនប្រាប់ឈ្មោះរបស់ខ្លួនដោយបារម្ភខ្លាចការរករឿងពីអាជ្ញាធរមូលដ្ឋានបាននិយាយថា ” មន្ត្រីគយបានទាមទារតម្លៃទ្វេជាពីរតាមតែមាត់ថា ហើយបានផ្ដល់បង្កាន់ដៃមិនផ្លូវការដល់ពួកយើង”។
អ្នកអូសរទេះម្នាក់ទៀតដែលប្រាប់ពីមូលហេតុដូចគ្នានេះដែរ ដោយប្រាប់ត្រឹមតែថាឈ្មោះ ម៉ៅ បាននិយាយថា លោក ង៉ោ ម៉េងជ្រួន អភិបាលក្រុងប៉ោយប៉ែតកាលពីសប្ដាហ៍មុនបានសន្យារធ្វើអន្តរាគមន៍បន្ទាប់ពីមន្ត្រីគយបានផ្លាស់ទៅប៉ុស្តិ៍ត្រួតពិនិត្យថ្មីឆ្ងាយពីព្រំដែន ហើយបានបង្កើនតម្លៃភ្លាមៗដែលពួកគេបានទាមទារសម្រាប់រទេះអូសនីមួយៗដែលបានដឹកទំនិញចូលប្រទេសកម្ពុជា។
គេមិនអាចទាក់ទងលោក ង៉ោ ម៉េងជ្រួន បានទេកាលពីម្សិលមិញ។ លោក ឈួន ហៃ ប្រធានការិយាល័យគយនៅច្រកព្រំដែនបានមានប្រសាសន៍ថា ការតវ៉ាកាលពីម្សិលមិញ បានបណ្ដាលឲ្យមានការកកស្ទះចរាចរណ៍យ៉ាងខ្លាំងនៅតាមព្រំដែន។
លោកបានមានប្រសាសន៍ថា “មានរទេះចំនួន៤០ដាក់បិទច្រកទ្វារអន្តរជាតិប៉ោយប៉ែតនៅថ្ងៃនេះ ចាប់ពីម៉ោង៧ព្រឹកនេះរហូតដល់ម៉ោង៤ល្ងាចថ្ងៃនេះ ហើយរថយន្តទេសចរណ៍ និងរថយន្តដឹកស៊ីម៉ង់ត៍មិនអាចបើកឆ្លងកាត់បានទេ”។
លោក ឈួន ហៃ បានមានប្រសាសន៍ថា មន្ត្រីរបស់លោកមិនបានទាមទារសំណូកទេ ប៉ុន្តែតែងតែផាកពិន័យអ្នកអូសរទេះដែលបានព្យាយាមដឹកទំនិញខុសច្បាប់ចូលក្នុងប្រទេសកម្ពុជា៕ សារុន