សន្តិសុខក្រុមហ៊ុនចិនដែលសាងសង់អាកាសយានដ្ឋាន ដើម្បីបម្រើដល់គម្រោងរមណីយដ្ឋានមួយក្នុងខេត្តកោះកុងនោះ កាលពីម្សិលមិញបានបំផ្លាញផ្ទះរបស់អ្នកភូមិ១១គ្រួសារ ហើយបានឈូសឆាយដីស្រែចម្ការទំហំ៣០ហិកតានៅក្នុងតំបន់ដែលអះអាងសិទ្ធិកាន់កាប់ដោយអ្នកភូមិ។
ក្រុមហ៊ុន Union Development Group (UDG) បានបណ្ដេញអ្នកភូមិជាង១.០០០គ្រួសាររួចហើយដែលពួកគាត់បានរស់នៅលើដីទំហំ៤៥.០០០ហិកតា នៅក្នុងឧទ្យានជាតិបទុមសាគរ ដែលក្រុមហ៊ុននេះបានប្រែក្លាយឲ្យទៅជាកន្លែងទេសចរណ៍ដែលចំណាយទឹកប្រាក់អស់៣,៨ពាន់លានដុល្លារចាប់តាំងពីឆ្នាំ២០១០មក។
លោក សោម ធី អាយុ៣៩ឆ្នាំបាននិយាយថា ក្រុមគ្រួសាររបស់លោកស្ថិតក្នុងចំណោមគ្រួសារដែលផ្ទះសំបែងរបស់ពួកគាត់ត្រូវបានបំផ្លាញកាលពីម្សិលមិញ បានកាន់កាប់ដីទំហំ៨ហិកតា នៅក្នុងតំបន់ដែលមានវិវាទនេះចាប់តាំងពីឆ្នាំ១៩៧៩មក។
លោក សោម ធី បាននិយាយថា សន្តិសុខក្រុមហ៊ុន UDG ១៩នាក់ និងបុគ្គលិកជនជាតិចិនបួននាក់បានមកដល់កាលពីព្រឹកម្សិលមិញជាមួយត្រាក់ទ័រមួយគ្រឿង ហើយបានចាប់ផ្ដើមបំផ្លាញជម្រកទាំងនោះ។
លោកបានមានប្រសាសន៍ថា “សន្តិសុខក្រុមហ៊ុនបានរុះផ្ទះ១០ខ្នង និងបានដុតបំផ្លាញមួយខ្នង។ បន្ទាប់មកពួកគេបានយកត្រាក់ទ័រមកឈូសឆាយដីស្រែរបស់យើង”។
លោក សោម ធី បាននិយាយថា លោកបានបង្ហាញឯកសារដល់សន្តិសុខថា លោកជាម្ចាស់ដីនេះ ប៉ុន្តែពួកគេនៅតែបន្តឈូសឆាយដដែល។ លោកបាននិយាយថា “ពួកគេមិនព្រមមើលទេ ហើយបានចោទក្រុមគ្រួសាររបស់ខ្ញុំថាបានកាន់កាប់ដីរបស់ក្រុមហ៊ុនដោយខុសច្បាប់”។
លោក ង៉ោ សា៊ងឡុង អ្នកគ្រប់គ្រងក្រុមហ៊ុន UDG បានលើកឡើងថា ក្រុមហ៊ុនបានផ្ដល់សំណងដល់អ្នកភូមិ១.១០០គ្រួសាររួចហើយសម្រាប់ដីរបស់ពួកគាត់ រួមទាំងអ្នកភូមិ១១គ្រួសារ ដែលផ្ទះសំបែងរបស់ពួកគាត់ត្រូវបានបំផ្លាញកាលពីម្សិលមិញ។
លោកបាននិយាយថា “យើងបានសុំឲ្យគ្រួសារទាំងនេះរុះផ្ទះរបស់ពួកគាត់ចេញពីដីនេះច្រើនលើកច្រើនសាមកហើយ ពីព្រោះយើងត្រូវប្រើដីនេះដើម្បីសាងសង់អាកាសយានដ្ឋាន។ ប៉ុន្តែពួកគាត់នៅតែសាងសង់ជម្រកនៅលើដីនេះ ដើម្បីធ្វើស្រែចម្ការ និងដាំដំណាំផ្សេងៗដដែល”។
លោក ស៊ាងឡុង បាននិយាយថា ក្រុមហ៊ុនបានឈូសឆាយដីស្រែចម្ការសរុប៣០ហិកតាកាលពីម្សិលមិញ។
លោក អុិន គង់ចិត្រ អ្នកសម្របសម្រួលអង្គការសិទ្ធិមនុស្សលីកាដូប្រចាំខេត្តនេះ បានច្រានចោលការអះអាងរបស់អ្នកគ្រប់គ្រងរូបនេះ ដោយលើកឡើងថា ក្រុមហ៊ុន UDG មិនទាន់ផ្ដល់សំណងដល់អ្នកភូមិ១១គ្រួសារនៅឡើយទេ។
លោក ស៊ុន តារា អភិបាលខេត្តបានមានប្រសាសន៍ថា អាជ្ញាធរមូលដ្ឋានមិនទទួលខុសត្រូវក្នុងការផ្ដល់សំណងដល់អ្នកភូមិ១១គ្រួសារនេះទេ ពីព្រោះពួកគាត់បានរស់នៅលើដីរបស់រដ្ឋ។ លោកបានមានប្រសាសន៍ថា “យើងនឹងស្នើឲ្យរដ្ឋាភិបាលផ្ដល់ដីសម្បទានសង្គមកិច្ចសម្រាប់គ្រួសារដែលត្រូវបានបណ្ដេញចេញទាំងនេះ”៕ សារុន