ក្រុមមន្ត្រីបាននិយាយកាលពីម្សិលមិញថា កងរាជអាវុធហត្ថខេត្តកំពង់ស្ពឺកាលពីថ្ងៃសុក្រ បានចាប់ខ្លួនបុរសប្រាំបីនាក់ពីបទប៉ុងប៉ងប្លន់រថយន្តកុងតឺន័រចតចោលមួយគ្រឿងដឹកសម្លៀកបំពាក់ឈុតក្នុងពេញពីរោងចក្រកាត់ដេរមួយក្នុងរាជធានីភ្នំពេញ ប៉ុន្តែបានដោះលែងជនសង្ស័យប្រាំមួយនាក់វិញនៅថ្ងៃដដែលនោះ។
លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេសបានមានប្រសាសន៍កាលពីម្សិលមិញថា “កងរាជអាវុធហត្ថបានចាប់ខ្លួនមនុស្សប្រាំបីនាក់កាលពីយប់ថ្ងៃសុក្រ។ ពួកគេទាំងអស់គឺជាជនសង្ស័យ ប៉ុន្តែឥឡូវនេះមានតែពីរនាក់ប៉ុណ្ណោះត្រូវបានឃុំខ្លួន ពីព្រោះអ្នកផ្សេងទៀតមិនជាប់ពាក់ព័ន្ធឡើយ”។
លោក ហុង វិបុល ប្រធាននាយកដ្ឋានព័ត៌មាន និងសន្តិសុខនៃកងរាជអាវុធហត្ថបានមានប្រសាសន៍ថា ជនដែលគេសង្ស័យថាជាចោរទាំងនោះត្រូវចាប់ខ្លួនបានមុនពេលគាស់កុងតឺន័រដែលបានចតចោលនៅក្នុងដីឡូត៍ទំនេរមួយ។
លោកបានមានប្រសាសន៍ថា “ពួកគេហៀបនឹងកាត់សោរថយន្តកុងតឺន័រនោះទៅហើយ។ ពួកគេមានម៉ូទ័រកាត់ រណារដែក និងឧបករណ៍ផ្សេងៗទៀត”។
លោក ទិត វណ្ណៈ នាយការិយាល័យនគរបាលព្រហ្មទណ្ឌនៃកងរាជអាវុធហត្ថខេត្តកំពង់ស្ពឺ បានបញ្ជាក់អត្តសញ្ញាណបុរសទាំងពីរនាក់នេះដែលស្ថិតក្នុងការឃុំខ្លួននៅឡើយថា ឈ្មោះ ឌិត វន្ថា អាយុ៣៦ឆ្នាំ និង វ៉ាន់ សារុំ អាយុ៣៥ឆ្នាំ ហើយលោកបានលើកឡើងថា ពួកគេកំពុងត្រូវឃុំខ្លួននៅទីបញ្ជាការដ្ឋានកងរាជអាវុធហត្ថខេត្ត។
លោក វណ្ណៈ បានមានប្រសាសន៍ថា អ្នកបើកបររថយន្តកុងតឺន័របានរត់គេចខ្លួនពីកន្លែងកើតហេតុ មុនពេលនគរបាលអាចបញ្ជាក់អត្តសញ្ញាណ ឬចាប់ខ្លួនជននេះ។
អ្នកស្រី វី សូលីណា ជាបុគ្គលិករដ្ឋបាលនៅរោងចក្រកាត់ដេរ CIK Cambodia ក្នុងខណ្ឌពោធិ៍សែនជ័យ រាជធានីភ្នំពេញបាននិយាយកាលពីម្សិលមិញថា សម្លៀកបំពាក់នោះភាគច្រើនជាអាវទ្រនាប់ និងខោទ្រនាប់ជាកម្មសិទ្ធិរបស់រោងចក្រ។ អ្នកស្រីបាននិយាយថា រោងចក្រកាត់ដេរ CIK Cambodia បានជួលក្រុមហ៊ុនមួយឈ្មោះ Pantos Logistics ឲ្យដឹកទៅកំពង់ផែស្វយ័តភ្នំពេញ។
អ្នកស្រីបាននិយាយថា “ក្រុមហ៊ុន Pantos Logistics បានទូរស័ព្ទមកយើងកាលពីថ្ងៃសុក្រ ហើយបានឲ្យដឹងថា ពួកគេមិនទាន់ឃើញរថយន្តកុងតឺន័រមកដល់កំពង់ផែនៅឡើយទេ។ អ្នកស្រីបានបន្ថែមថា “យើងចង់ឲ្យរថយន្តកុងតឺន័រនេះបើកទៅកំពង់ផែស្វយ័តភ្នំពេញ ប៉ុន្តែអ្នកបើកបរបានបើកទៅទិសដៅបញ្ច្រាសគ្នាទៅវិញ ហើយត្រូវគេឃើញក្នុងខេត្តកំពង់ស្ពឺ។
អ្នកស្រី ម៉ៅ គន្ធា ប្រធានផ្នែកគណនេយ្យនៅក្រុមហ៊ុន Pantos Logistics បាននិយាយថា ក្រុមហ៊ុនរបស់អ្នកស្រីបានជួលរថយន្តនេះបុរសម្នាក់ដែលគ្រប់គ្រងក្រុមហ៊ុនដឹកជញ្ជូនមិនស្គាល់ឈ្មោះមួយ។
អ្នកស្រីបាននិយាយថា “រថយន្តនោះមានបំពាក់ឧបករណ៍ GPS ដែលជាមូលហេតុអាចឲ្យកងរាជអាវុធហត្ថរកឃើញ។ អ្នកបើកបរប្រហែលជាស្គាល់ជនសង្ស័យទាំងនោះ ហើយបានបណ្ដោយឲ្យពួកគេប្លន់សម្លៀកបំពាក់នោះ”៕ សារុន