កាលពីថ្ងៃសុក្រ លោកនាយករដ្ឋមន្ត្រី ហ៊ុន សែន បានថ្លែងទៅកាន់វេទិកាពិភាក្សាមួយអំឡុងវេទិកាសេដ្ឋកិច្ចពិភពលោក ដែលប្រព្រឹត្តឡើងនៅក្នុងទីក្រុងដាវ៉ូស ប្រទេសស្វ៊ីសថា លោកមានសង្ឃឹមយ៉ាងមុតមាំចំពោះសមាហរណកម្មសេដ្ឋកិច្ចនៃប្រទេសសមាជិកអាស៊ាន ដែលគ្រោងនឹងបញ្ចូលគ្នានៅក្នុងឆ្នាំនេះ។
ពេលមានវត្តមានជាមួយលោក Pham Binh Minh រដ្ឋមន្ត្រីក្រសួងការបរទេសវៀតណាម លោក Pridiyathorn Devakula ឧបនាយកដ្ឋមន្ត្រីថៃ និងលោក Abdul Wahid Omar រដ្ឋមន្ត្រីទទួលបន្ទុកផ្នែកផែនការសេដ្ឋកិច្ចរបស់ប្រទេសម៉ាឡេស៊ី លោក ហ៊ុន សែន បានលើកឡើងថា ការធ្វើសមាហរណកម្មនេះគឺនឹងកើតឡើងចំពេលសេដ្ឋកិច្ចក្នុងតំបន់មានភាពខ្លាំង។
លោកនាយករដ្ឋមន្ត្រីបានមានប្រសាសន៍ថា “អាស៊ាននឹងទទួលបានប្រយោជន៍យ៉ាងច្រើនពីសេដ្ឋកិច្ចរបស់ប្រទេសចិន ដែលកំពុងតែកើនឡើងជាទៀងទាត់ និងសេដ្ឋកិច្ចរបស់ប្រទេសឥណ្ឌាដែលកំពុងកើនឡើងជាបណ្ដើរៗ ព្រមទាំងពីសេដ្ឋកិច្ចរបស់ប្រទេសជប៉ុន និងប្រទេសកូរ៉េខាងត្បូងផងដែរ ដែលនឹងបង្កើតឲ្យមានឱកាសពាណិជ្ជកម្ម និងការវិនិយោគដ៏ធំបន្ថែមពីលើទីផ្សាររបស់អាស៊ាន ដែលធ្លាប់តែចាប់ដៃគូជាមួយសហរដ្ឋអាមេរិក និងសហភាពអឺរ៉ុប”។
ប៉ុន្តែលោកនាយករដ្ឋមន្ត្រី ហ៊ុន សែន ក៏បានគូសបញ្ជាក់ផងដែរថា ភាពខុសគ្នាមួយចំនួននៃវប្បធម៌នៅតំបន់អាស៊ីអាគ្នេយ៍ប្រហែលជាធ្វើឲ្យមានការលំបាក ទោះបីជាមានការធ្វើសមាហរណកម្មហើយក្ដី។
លោកបានមានប្រសាសន៍ថា “ខ្ញុំចង់បញ្ជាក់ឲ្យបានច្បាស់នូវរឿងមួយដែលមិនអាចធ្វើឡើងឲ្យស្របគ្នាបានគឺថា អាស៊ានមានផ្លូវដែលប្រកាន់ឆ្វេង និងប្រកាន់ស្ដាំ។ នេះគឺជាចំណុចមួយដ៏លំបាក។ វាលំបាកនៅក្នុងការដោះស្រាយប្រព័ន្ធផ្លូវច្បាប់នេះ ព្រោះថា ប្រទេសដែលធ្លាប់នៅក្រោមអាណានិគមបារាំងប្រើរថយន្តចង្កូតឆ្វេង រីឯប្រទេសដែលធ្លាប់នៅក្រោមអាណានិគមអង់គ្លេសប្រើរថយន្តចង្កូតស្ដាំ៕ ស៊ុយឈាង