កាលពីថ្ងៃសៅរ៍ អាជ្ញាធរអប្សរាបានគំរាមចាត់វិធានការលើបុគ្គលដែលនៅពីក្រោយការបង្ហាញរូបភាពស្ត្រីអាក្រាតមួយកំណាត់លើម្នាក់ ដែលបានថតនៅឧទ្យានបុរាណវត្ថុអង្គរ ក្នុងក្រុងសៀមរាប ដោយហៅរូបថតនោះថា “គ្មានការពិចារណា និងអាសអាភាស”។
រូបថតដែលធ្វើឲ្យអ្នកប្រើប្រាស់ហ្វេសប៊ុកជនជាតិខ្មែរជាច្រើនមានកំហឹង ដែលបានចែករំលែកតគ្នាកាលពីចុងសប្ដាហ៍ បង្ហាញស្ត្រីអាស៊ីម្នាក់ដែលឈរថតតាមប្រាសាទនៅក្នុងឧទ្យានបុរាណវត្ថុអង្គរ ដោយមានពាក់ឆ្នួតក្បាលផង។
ដំបូងរូបថតនោះត្រូវបានគេបង្ហោះក្នុងប្លុក “Wanimal” ដែលបង្ហាញរូបថតស្ត្រីអាក្រាតឬអាក្រាតមួយកំណាត់ខ្លួន ដែលជារឿយៗថតក្នុងទីសាធារណៈ កាលពីខែតុលា ឆ្នាំ២០១៣ ដោយមានសរសេរអក្សរថា “ស្ត្រីខ្មែរ”។ អ្នកផ្ដល់យោបល់តាមហ្វេសប៊ុកម្នាក់បាននិយាយកាលពីថ្ងៃសៅរ៍ថា ” ខ្ញុំចង់តែសម្លាប់នាងពីឥឡូវនេះទេ”។
បើតាមលក្ខណៈបែបការទូត អាជ្ញាធរអប្សរាជាស្ថាប័នរបស់រដ្ឋាភិបាល ដែលគ្រប់គ្រងឧទ្យានបុរាណវត្ថុអង្គរក៏បានថ្កោលទោសរូបថតនេះនៅថ្ងៃដដែលនោះដែរ។
អាជ្ញាធរអប្សរាបានលើកឡើងនៅក្នុងសេចក្ដីថ្លែងការណ៍ថា “អាជ្ញាធរអប្សរាសូមថ្កោលទោសរូបថតអាក្រាតមួយកំណាត់ខ្លួនរបស់ស្ត្រីនេះដែលឈរថតនៅមុខប្រាសាទ ពីព្រោះការថតរូបអាក្រាតបែបនេះគឺជាទង្វើផ្ទុយនឹងក្រមសីលធម៌ និងវប្បធម៌ខ្មែរ។ អាជ្ញាធរអប្សរា…បានសម្រេចចាត់វិធានការផ្លូវច្បាប់តាមគ្រប់មធ្យោបាយដើម្បីដាក់ទោសទង្វើដែលគ្មានការពិចារណា និងអាសអាភាសបែបនេះ។
អាជ្ញាធរអប្សរាដែលសរសេរអក្សរកាត់ថា “APSARA” ដោយសំដៅដល់ទេពអប្សរតាមជំនឿហិណ្ឌូ និងពុទ្ធសាសនា។ ជារឿយៗអប្សរាត្រូវគេពិពណ៌នាតាមរយៈផ្ទាំងគំនូរ ចម្លាក់ សិលាចារឹកជារូបស្ត្រីមានសុដន់នៅកណ្ដាលវាល។ អាជ្ញាធរអប្សរាបានបង្ហាញរូបថតអប្សរាដែលមានសុដន់កណ្ដាលវាលនេះនៅលើគេហទំព័ររបស់ខ្លួន។
លោក ឡុង កុសល អនុប្រធាននាយកដ្ឋានទំនាក់ទំនងរបស់អាជ្ញាធរអប្សរាបានមានប្រសាសន៍កាលពីម្សិលមិញថា រូបថតនេះទំនងជាថតនៅប្រាសាទព្រះខ័ន និងប្រាសាទបន្ទាយក្ដី។
លោកបានមានប្រសាសន៍ថា “បើតាមការស្រាវជ្រាវបឋមរបស់យើង យើងរកឃើញថា ក្រុមនេះមានមូលដ្ឋាននៅប្រទេសចិន ហើយមានជំនាញខាងផលិតរូបអាសអាភាស”។
លោក កុសល បានមានប្រសាសន៍ថា អាជ្ញាធរអប្សរាមិនទាន់បានកំណត់អត្តសញ្ញាណអ្នកថតរូបឬម៉ូដែលនោះទេ ដែលលោកអះអាងថា មិនមែនជាជនជាតិខ្មែរឡើយ។
លោក រី អញ្ជលី អនុប្រធានមន្ទីរវប្បធម៌ និងវិចិត្រសិល្បៈខេត្ត បានមានប្រសាសន៍ថា រូបថត និងការពិពណ៌នាផ្សេងៗអំពីស្ត្រីដែលអាក្រាតមួយកំណាត់ខ្លួននៅតាមប្រាសាទនានា គឺមិនសមរម្យឡើយ ដោយមិនគិតដល់ការពិតដែលថា ប្រាសាទជាច្រើនពោរពេញទៅដោយរូបចម្លាក់ស្ត្រីដែលអាក្រាតមួយកំណាត់ខ្លួននោះ។
លោកបានបន្ថែមថា “រឿងនោះវាកើតឡើង១.០០០ឆ្នាំមកហើយ ដូច្នេះយើងមិនចង់ធ្វើអត្ថាធិប្បាយទេ ប៉ុន្តែអ្នកកំពុងសួរខ្ញុំក្នុងឆ្នាំ២០១៥ ដូច្នេះរឿងនេះវាជាបញ្ហាផ្សេងគ្នា…។ វាជាការខុសឆ្គង”៕ សារុន (រាយការណ៍បន្ថែមដោយ Ben Woods)