នគរបាលបានឲ្យដឹងថា ស្ត្រីជនជាតិម៉ាឡេស៊ីអាយុ២៨ឆ្នាំម្នាក់ និងមិត្តប្រុសរបស់នាងជាជនជាតិអាមេរិកត្រូវបានចាប់ខ្លួនកាលពីរំលងអាធ្រាត្រឈានចូលថ្ងៃសោរ៍ បន្ទាប់ពីពួកគេបានបើករថយន្តម៉ាកសឺដេសរបស់ខ្លួនបុករ៉ឺម៉កម៉ូតូកង់បីដឹកអ្នកដំណើរពេញមួយគ្រឿង ហើយបន្ទាប់មកបានបង្កើនល្បឿនបើករត់។
លោក សែម គន្ធា នាយរងនគរបាលចរាចររាជធានីបានមានប្រសាសន៍ថា នៅម៉ោងប្រហែល១១និង៣០នាទីយប់ថ្ងៃសុក្រ ស្ត្រីជនជាតិម៉ាឡេស៊ីរូបនេះបានបើករថយន្តទំនើបនេះបុករ៉ឺម៉កម៉ូតូកង់បីមួយគ្រឿងតាមតីរវិថីព្រះស៊ីសុវត្ថិ ក្នុងសង្កាត់ជ័យជម្នះ ខណ្ឌដូនពេញ បន្ទាប់ពីចេញពីពិធីមួយនៅកោះពេជ្រ។
លោកបានមានប្រសាសន៍ថា “នៅពេលស្ត្រីរូបនេះបើកមកដល់មុខព្រះបរមរាជវំាង រថយន្តនោះបានរេចង្កូតទៅបុកផ្នែកខាងឆ្វេងនៃរ៉ឺម៉កម៉ូតូនោះ បណ្ដាលឲ្យមនុស្សបួននាក់រងរបួស” ដោយលោកកត់សម្គាល់ថា របួសនោះគឺស្រាលទេ។
លោក គន្ធា បានបដិសេធមិនបង្ហាញអត្តសញ្ញាណស្ត្រីជនជាតិម៉ាឡេស៊ីរូបនោះទេ ប៉ុន្តែបានប្រាប់ឈ្មោះបុរសជនជាតិអាមេរិក ដែលអង្គុយក្នុងរថយន្តនោះថា ឈ្មោះ Vic Boyle។ លោកបានមានប្រសាសន៍ថា ពួកគេទាំងពីរនាក់បានផឹកស៊ីមុនពេលបង្កគ្រោះថ្នាក់ចរាចរណ៍នេះ។
លោកបានមានប្រសាសន៍ថា “បន្ទាប់ពីបង្កគ្រោះថ្នាក់មក បុរសជនជាតិអាមេរិករូបនោះបានបើករថយន្តជំនួសនាង ហើយបានបង្កើនល្បឿនបើកចេញពីកន្លែងកើតហេតុ។ ពួកគេបានបើកចេញពីកន្លែងកើតហេតុយ៉ាងលឿន ពីព្រោះពួកគេខ្លាចមនុស្សក្នុងមូលដ្ឋានវាយពួកគេ”។
លោក គន្ធា បានមានប្រសាសន៍ថា នគរបាល និងកងរាជអាវុធហត្ថបានដេញតាមពួកគេនោះ ហើយបានតាមទាន់នៅផ្លូវលេខ២១៤ស្ថិតក្នុងសង្កាត់បឹងរាំង។
លោក គន្ធា បានមានប្រសាសន៍ថា “នគរបាល និងកងរាជអាវុធហត្ថបានដេញតាមពួកគេ ហើយចាប់ខ្លួនបានចម្ងាយប្រហែល១,៥គីឡូម៉ែត្រពីកន្លែងកើតហេតុ”។
លោក គន្ធា បានបន្ថែមថា លោក Boyle ត្រូវបានដោះលែងពីកន្លែងឃុំខ្លួនរបស់នគរបាលកាលពីថ្ងៃសៅរ៍។ លោកបានមានប្រសាសន៍ថា ” យើងបាននាំពួកគេទាំងពីរទៅសាកសួរនៅប៉ុស្តិ៍នគរបាលចរាចរណ៍រាជធានី ប៉ុន្តែយើងបានដោះលែងបុរសជនជាតិអាមេរិកនេះវិញ ពីព្រោះគាត់មិនមែនជាអ្នកបើកបរទេ”។
លោកបានបន្ថែមថា “ទោះជាយ៉ាងណា យើងកំពុងឃុំខ្លួនស្ត្រីជនជាតិម៉ាឡេស៊ីរូបនេះ ហើយនាំនាងទៅសាកសួរនៅតុលាការនៅថ្ងៃនេះ ដោយចោទប្រកាន់ពីបទបង្ករបួសស្នាមនៅពេលបើកបរ”។
លោក Boyle ដែលបានបង្ហាញអត្តសញ្ញាណរបស់ខ្លួននៅលើគេហទំព័រ LinkedIn ថា ជាអគ្គនាយកក្រុមហ៊ុនមួយឈ្មោះថា S.S. Digital Media Advertising នោះ មិនអាចទាក់ទងសុំអត្ថាធិប្បាយបានទេកាលពីម្សិលមិញ។
រូបថតដែលផ្សព្វផ្សាយតាមប្រព័ន្ធផ្សាយក្នុងស្រុកស្ដីពីការចាប់ខ្លួននេះ ហើយក្រោយមកទំនងជាបានបង្ហាញថា អ្នកជិតស្និទ្ធរបស់លោក Boyle គឺស្ត្រីឈ្មោះ Edrea Chua ជាស្ត្រីជនជាតិម៉ាឡេស៊ី ដែលរូបថតរបស់នាងក៏មាននៅលើទំព័រហ្វេសប៊ុករបស់លោក Boyle ដែលស្ត្រីរូបនេះត្រូវបានគេសន្និដ្ឋានថា ជាមិត្តស្រីរបស់គាត់។
លោក តាំង អាន មន្ត្រីនគរបាលចរាចររាជធានីដែលធ្វើការរឿងក្ដីនេះបានមានប្រសាសន៍ថា ស្ត្រីជនជាតិម៉ាឡេស៊ីរូបនេះត្រូវបានសាលាដំបូងរាជធានីធ្វើការសាកសួរកាលពីម្សិលមិញ ប៉ុន្តែមិនបានចោទប្រកាន់ពីបទឧក្រិដ្ឋទេ។
លោកបានមានប្រសាសន៍ថា “នៅព្រឹកនេះលោក អ៊ុំ សុភ័ក្ត្រ ព្រះរាជអាជ្ញារងអមសាលាដំបូងរាជធានីបានសាកសួរស្ត្រីរូបនេះអំពីករណីនោះ ប៉ុន្តែលោកមិនទាន់បានចោទប្រកាន់ស្ត្រីរូបនេះនៅឡើយទេ។ នាងកំពុងត្រូវឃុំខ្លួននៅប៉ុស្តិ៍នគរបាលចរាចរណ៍រាជធានីនៅឡើយ”។
លោក សឿន សារឿន មន្ត្រីនគរបាលចរាចររាជធានីម្នាក់ទៀតដែលធ្វើការលើករណីបានមានប្រសាសន៍ថា តុលាការនឹងបន្តសាកសួរស្ត្រីជនជាតិម៉ាឡេស៊ីរូបនេះនៅថ្ងៃនេះ៕ សារុន