29 C
Phnom Penh

កម្មករ​សំណង់​ត្រូវ​ចាប់​ខ្លួន​​​ខណៈ​កំពុង​ចាប់​រំលោភ​ក្មេង​ស្រី​សិស្ស​សាលា​នៅ​តាម​ផ្លូវ​

ដោយ ឌឹ ខេមបូឌា ដេលី

បទវិភាគ

នគរ​បាល​និយាយ​កាលពី​ម្សិលមិញ​ថា យុវជន​​អាយុ​២១​ឆ្នាំ​ម្នាក់​ត្រូវ​បាន​ចាប់​ខ្លួន​នៅ​​ក្នុង​ខេត្ត​បន្ទាយ​មានជ័យ កាលពី​ថ្ងៃ​ច័ន្ទ​ ខណៈ​កំពុង​ធ្វើ​សកម្មភាព​រំលោភ​ក្មេង​ស្រី​អាយុ​១២​ឆ្នាំ​ម្នាក់ដែល​ខ្លួន​​បាន​ចាប់​ទម្លាក់​ពីលើ​កង់ ពេល​​នាង​ជិះកង់​ចេញពី​សាលា​ត្រឡប់​ទៅ​ផ្ទះ​វិញ ហើយ​ក្រោយ​មក​ជននេះ​បានសារភាព​ថា ខ្លួន​ក៏​បាន​ចាប់​រំលោភ​ក្មេងស្រី​អាយុ​៩​​ឆ្នាំ​ម្នាក់​ទៀត​ដែរ​​កាលពី​ដើម​ខែ​នេះ​។

លោក េសត ឡោះ ស្នង​ការ​រង​ខេត្ត​បន្ទាយមានជ័យ​បាន​មាន​ប្រសាសន៍​ថា នគរ​បាល​​មូលដ្ឋាន​​បាន​ចាប់​ខ្លួន​កម្មករ​សំណង់​ម្នាក់​ឈ្មោះ មឿន សេត នៅ​ក្នុង​ឃុំចំណោម ស្រុក​មង្គលបុរី បន្ទាប់ពី​អ្នក​ស្រុក​ម្នាក់​បាន​​​ប្ដឹង​អាជ្ញាធរ​អំពី​បទ​ល្មើស​នេះ។

លោក​បាន​មាន​ប្រសាសន៍​ទៀត​ថា “ពេល​ក្មេងស្រី​ម្នាក់​កំពុង​ជិះកង់​តាម​ផ្លូវ ជននេះ​​បាន​​មក​ចាប់​នាង​ពីក្រោយ​ ហើយ​រំលោភ​នាង​។ យុវជន​​នេះ​គឺ​ជាជនសង្ស័យ​នៅ​ក្នុង​​ករណី​រំលោភ​ក្មេង​ស្រី​ពីរ​នាក់​នៅ​ក្នុង​ឃុំ​នេះ​នៅ​ខែ​នេះ​”។

លោក​ អុិន សំអាត នាយ​ប៉ុស្តិ៍​ឃុំ​ចំណោម​ បាន​មាន​ប្រសាសន៍​ថា ឈ្មោះ មឿន សេត បាន​សម្ងំ​លាក់​ខ្លួន​​នៅ​ក្នុង​ព្រៃ​តាម​បណ្ដោយ​ផ្លូវ ហើយ​បាន​ចាប់​ក្មេង​ស្រី​អាយុ​១២​ឆ្នាំ​នេះ​នៅ​ពេល​នាង​ជិះកង់​តាម​ពីក្រោយ​ក្មេងស្រី​មួយ​ក្រុម​ត្រឡប់​​ទៅ​ផ្ទះវិញ​។

លោក​បាន​មាន​ប្រសាសន៍​​ទៀត​ថា “កាលពី​ម្សិលមិញ បន្ទាប់ពី​រង់ចាំ​ប្រហែល​៣ម៉ោង ជននេះ​បាន​ឃើញ​ក្មេងស្រី​ម្នាក់​ជិះកង់ ហើយ​ក៏រត់​ដេញ​តាម​នាង​​ប្រហែល​៧០​ម៉ែត្រ​មុន​ពេល​ចាប់​រំលោភ​នាង​នៅ​ទីនេះ។ ពេល​នោះ​​ស្ត្រី​កសិករ​ម្នាក់​​ដែល​នៅ​ក្បែរ​នោះ​​បាន​ទូរស័ព្ទ​ប្ដឹង​នគរ​បាល​ឲ្យ​ទៅ​ចាប់​​ខ្លួន​ជននេះ​”។

លោក​បាន​លើក​ឡើង​ទៀត​ថា ​នគរ​បាល​​បាន​ចាប់​ខ្លួន​ជននេះ​​ពេល​កំពុង​​ធ្វើ​សកម្មភាព​រំលោភ​ក្មេងស្រី​រងគ្រោះ​។ ” ក្រោយ​ពីការ​ចាប់​ខ្លួន​​ភ្លាមៗ​ ជនសង្ស័យ​បាន​បដិសេធ​ថា ខ្លួន​មិន​បាន​ចាប់​រំលោភ​ទេ ប៉ុន្តែ​៣ម៉ោង​ក្រោយ​មក ​ជននេះ​បានសារភាព​ទទួល​ស្គាល់​​ទង្វើ​គ្រប់​យ៉ាង​ដែល​ខ្លួន​បាន​ប្រព្រឹត្ត​​”។

នាយ​ប៉ុស្តិ៍​រូប​នេះ​បាន​មាន​ប្រសាសន៍​ទៀត​ថា ឈ្មោះ​ មឿន សេត បាន​សារភាព​ថា ខ្លួន​ធ្លាប់​បាន​ចាប់​រំលោភ​ក្មេងស្រី​​សិស្សសាលា​អាយុ​៩ឆ្នាំ​ម្នាក់​​ទៀត​កាលពី​ថ្ងៃទី​៦ ខែ​មករា ដែល​ខ្លួន​បាន​ប្រព្រឹត្ត​ក្រោម​ស្ថានភាព​ស្រដៀង​គ្នា​ ដោយ​ប្រាប់​នគរ​បាល​ថា ខ្លួន​បាន​រំលោភ​ក្មេងស្រី​រងគ្រោះ​ បន្ទាប់​ពី​បោក​បញ្ឆោត​សិស្ស​មួយ​ក្រុម​​ដែល​ជិះកង់​ត្រឡប់​ទៅ​ផ្ទះ​វិញ ឲ្យ​តាម​ខ្លួន​ចូល​ទៅ​ក្នុង​ព្រៃ​។

លោក​បាន​មាន​ប្រសាសន៍​បន្ត​ថា “ជននេះ​បាន​​ឃាត់​ក្មេងៗ​ប្រាំបួន​នាក់​ ក្នុង​នោះ​រួម​មាន​ក្មេងស្រី​ប្រាំមួយ​នាក់ ដោយ​កុហក​ពួកគេ​ថា មាន​ចោ​រប្លន់​នៅ​តាម​ផ្លូវ​។ បន្ទាប់​មក​ជន​សង្ស័យ​បាន​បញ្ជា​ឲ្យ​ក្មេងស្រី​​បួន​នាក់​ស្រាត​សម្លៀក​បំពាក់​ចេញ និង​ដេក​ទៅ​លើ​ដី​ រួច​​​ជន​សង្ស័យ​បាន​ចាប់​រំលោភ​ក្មេងស្រី​ម្នាក់ ហើយ​បម្រុង​រំលោភ​ក្មេងស្រី​ផ្សេងទៀត ប៉ុន្តែ​ពេល​នោះ​ក្មេង​ៗ​ផ្សេង​ទៀត​បាន​ស្រែក​ឲ្យ​គេ​ជួយ”។

​លោក សេត ឡោះ ស្នង​ការ​រង​ខេត្ត​នេះ​បាន​មាន​ប្រសាសន៍​ថា ឈ្មោះ មឿន សេត បាន​ប្រើ​លេស​ផ្សេងៗ​​និយាយ​ពីមូលហេតុ​ដែល​ខ្លួន​ចាប់​រំលោភ​ក្មេងស្រី​ទាំង​នេះ​។

លោក​បាន​​លើក​ឡើង​បន្ថែម​ថា “ជននេះ​បានសារភាព​ថា ខ្លួន​បាន​ចាប់​រំលោភ​ដោយ​សារ​ហេតុ​ផល​បី​យ៉ាង​ ទី១ដោយ​សារ​​ខ្លួន​ញៀន​​គ្រឿង​ញៀន ទី២​ដោយ​សារ​ខ្លួន​​ស្រវឹង​នៅ​ពេល​​ប្រព្រឹត្ត​បទ​ល្មើស ហើយ​ចុង​ក្រោយគឺ​ដោយ​សារ​ប្រពន្ធ​របស់​ជននេះ​មាន​ផ្ទៃ​ពោះ​​មិន​អាច​រួម​រ័ក​ជាមួយ​ខ្លួន​បាន​។ ពេល​នេះ​ជនសង្ស័យ​កំពុង​ជាប់​ឃុំ​នៅ​ស្នង​ការដ្ឋាន​នៅ​ឡើយ​ ដើម្បី​ធ្វើ​ការ​សាកសួរ​បន្ថែម​ទៀត​។ យើង​នឹង​បញ្ជូន​ជននេះ​ទៅ​តុលាការ​នៅ​ថ្ងៃ​ស្អែក​ដើម្បី​ធ្វើ​ការ​ចោទប្រកាន់​”។

យោង​តាម​តួលេខ​ផ្ដល់​ដោយ​អង្គការ​សិទ្ធិមនុស្ស​អាដហុក​​កាលពី​ម្សិលមិញ​បង្ហាញ​ថា ករណី​រំលោភ​កុមារ​​ដែល​ត្រូវ​រាយការណ៍​នៅ​ក​្នុង​ឆ្នាំ​២០១៤​ មាន​ចំនួន​២០១​ករណី​ ក្នុង​នោះ​រួម​មាន​​១១០​ករណី​​​រំលោភ​ក្មេងស្រី​ដែល​មាន​អាយុ​ចន្លោះ​ពី​១១​ឆ្នាំ​ដល់​១៨ឆ្នាំ​ ៤២​ករណី​ពាក់ព័ន្ធ​នឹង​ក្មេងស្រី​ដែល​មាន​អាយុ​ចន្លោះពី​៦ឆ្នាំ​ដល់​១០​ឆ្នាំ និង​១៥ករណី​​​​ពាក់​ព័ន្ធ​ក្មេងស្រី​អាយុ​ក្រោម​៥ឆ្នាំ​។

តួលេខ​របស់​អង្គការ​អាដហុក​បង្ហាញ​ទៀត​​ថា នៅ​ក្នុង​ឆ្នាំ​២០១៣​មានករណី​រំលោភ​កុមារ​ចំនួន​១៧៧​ករណី​ ក្នុង​នោះ​រួម​មាន​១០២​ករណី​ពាក់​ព័ន្ធ​នឹង​ក្មេងស្រី​អាយុ​ចន្លោះ​ពី​១១​ឆ្នាំ​ដល់​១៨​ឆ្នាំ ៥៣ករណី​ពាក់​ព័ន្ធ​នឹង​ក្មេងស្រី​ដែល​មាន​អាយុ​ចន្លោះ​ពី​​៦ឆ្នាំ​ដល់​១០ឆ្នាំ និង​២២​ករណី​ពាក់​ព័ន្ធនឹង​ក្មេងស្រី​ដែល​មាន​អាយុ​ក្រោម​៥ឆ្នាំ​។

លោកស្រី ខៀវ សិរីសុធា អគ្គនាយក​នៅ​ក្រសួង​កិច្ច​ការ​នារី បាន​មាន​ប្រសាសន៍​ថា លោកស្រី​​មិន​ដឹង​ច្បាស់​ថា ហេតុ​អ្វី​បាន​ជា​​ចំនួន​ករណី​រំលោភ​កុមារ​ដែល​ត្រូវ​បាន​រាយការណ៍​មាន​ការ​កើន​ឡើង​នោះ​ទេ ប៉ុន្តែ​លោកស្រី​បាន​លើក​ឡើង​​ថា រដ្ឋាភិបាល​​កំពុង​​ខិត​ខំ​ធ្វើការ​ដោះ​ស្រាយ​បញ្ហា​នេះ។

លោកស្រី​​មាន​ប្រសាសន៍​ទៀត​ថា “យើង​កំពុង​ធ្វើ​ការ​ជាមួយ​អង្គការ​យូនីសេហ្វ ដើម្បី​សិក្សា​ពីបញ្ហា​នោះ​”។ លោកស្រី​បាន​លើក​ឡើង​បន្ត​​ថា នគ​របាល​​ជា​អ្នក​ទទួល​ខុស​ត្រូវ​ចំពោះ​​បទ​ល្មើសដូច​ជា​ការ​រំលោភ​កុមារ​ជាដើម​ច្រើន​ជាង​ក្រសួង​របស់​លោកស្រី​។

លោក អំ សំអាត ប្រធាន​គ្រប់​គ្រង​ផ្នែក​បច្ចេកទេស​ស៊ើបអង្កេត​​នៅ​អង្គការ​សិទ្ធិមនុស្ស​លីកាដូ​ បាន​មាន​ប្រសាសន៍​ថា ការ​រាយការណ៍​អំពី​ការ​រំលោភ​កុមារ​កំពុង​កើន​ឡើង​​ខ្លាំង​ ដោយ​សារ​​​ការ​អនុវត្ត​ការ​ផ្ដន្ទាទោស​សម្រាប់​បទ​ល្មើស​នេះ​​មាន​ការ​ធូររលង់​។

លោក​បាន​លើក​ឡើង​ថា “មាន​ទម្លាប់​អាក្រក់​ដែល​ជនសង្ស័យ​នៅ​ក្នុង​ករណី​ចាប់​រំលោភ​ត្រូវ​បាន​​ដោះលែង​​ដោយ​គ្មាន​ការ​ចោទ​​ប្រកាន់​។ បញ្ហា​មួយ​ទៀត​គឺ​ថា ករណី​ចាប់​រំលោភ​កុមារ​មិន​ត្រូវ​បានបញ្ជូន​ទៅ​តុលាការ​ ពីព្រោះ​ក្រុមគ្រួសារ​ជនសង្ស័យ​​នឹង​បង់​សំណង​ក្រៅ​ប្រពន្ធតុលាការ​”៕ សុខុម​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស