កាលពីម្សិលមិញ មន្ត្រីក្រសួងបរិស្ថានបានរកឃើញឈើប្រភេទលេខ១ ដែលកាប់រួចខុសច្បាប់ជាង៤០០ដុំនៅក្នុងដែនជម្រកសត្វព្រៃលំផាត់ក្នុងខេត្តរតនគិរី ដែលក្រសួងនេះមើលការខុសត្រូវ ហើយសង្ស័យលើមន្ត្រីមកពីបន្ទាយកងរាជអាវុធហត្ថក្បែរនោះថា ជាប់ពាក់ព័ន្ធ។
លោក ធិន ង៉ោល អនុប្រធានដែនជម្រកសត្វព្រៃនេះបានមានប្រសាសន៍ថា ក្រុមមន្ត្រីបានរកឃើញឈើសុក្រម ៤១៨ដំុនៅក្នុងតំបន់ការពារនេះចម្ងាយប្រហែលមួយគីឡូម៉ែត្រពីការិយាល័យសន្តិសុខមូលដ្ឋាននៃកងរាជអាវុធហត្ថខេត្ត ដែលក៏ស្ថិតនៅក្នុងដែនជម្រកសត្វព្រៃនេះដែរ។
លោកបានមានប្រសាសន៍ថា “ឥឡូវនេះយើងកំពុងប្រមូលយកឈើនោះ។ យើងនឹងដឹកឈើនេះទៅការិយាល័យរបស់យើង ហើយរង់ចាំសេចក្តីសម្រេចពីថ្នាក់លើថា តើត្រូវធ្វើអ្វីជាមួយឈើនេះ”។
លោក ធិន ង៉ោល បានមានប្រសាសន៍ ថា មន្ត្រីរបស់លោកកំពុងស្វែងរកអ្នកដែលកាប់ឈើទាំងនេះ ប៉ុន្តែ បានដាក់ការសង្ស័យលើកងរាជអាវុធហត្ថ។
លោកបានមានប្រសាសន៍ថា “យើងមិនអាចសន្និដ្ឋានថា ការិយាល័យសន្តិសុខរបស់កងរាជអាវុធហត្ថខេត្តជាប់ពាក់ព័ន្ធជាមួយឈើនេះទេ។ ប៉ុន្តែ បើពួកគេមិនជាប់ពាក់ព័ន្ធនឹងឈើនេះ ហេតុអ្វីបានជាពួកគេមិនដឹងពី រឿងនេះ ? ពីព្រោះឈើនេះត្រូវបានគេយកមកទុកនៅក្បែរការិយាល័យនេះ”។
វាគ្មានអ្វីប្លែកសម្រាប់មន្ត្រីកងកម្លាំងប្រដាប់អាវុធដែលគេឃើញដឹកឈើកាប់រួចខុសច្បាប់ទូទាំងប្រទេសឡើយ។
ប៉ុន្តែ លោក គឹម រស្មី មេបញ្ជាការកងរាជអាវុហត្ថខេត្តរតនគិរីបានមានប្រសាសន៍ ថា
មន្ត្រីរបស់លោកមិនជាប់ពាក់ព័ន្ធនឹងការកាប់ឈើ ឬគំនរឈើដែលគេរកឃើញនៅជិតការិយាល័យសន្តិសុខនេះកាលពីម្សិលមិញឡើយ។
លោកបានមានប្រសាសន៍ថា “ខ្ញុំសូមបដិសេធថា មន្ត្រីកងរាជអាវុធហត្ថរបស់ខ្ញុំមិនពាក់ព័ន្ធនឹងឈើនេះទេ។ ខ្ញុំគិតថា មន្ត្រីមកពីដែនជម្រកសត្វព្រៃត្រូវទទួលខុសត្រូវចំពោះឈើនេះ ពីព្រោះឈើនេះនៅលើដីដែលពួកគេគ្រប់គ្រង”។
លោកបានបន្ថែមថា “មន្ត្រីរបស់ខ្ញុំមិនបានធ្វើអ្វីដូចដែលពួកគេត្រូវបានចោទប្រកាន់ឡើយ ពីព្រោះខ្ញុំតែងតែណែនាំពួកគេកុំឲ្យធ្វើខុស ហើយថា ពួកគេនឹងប្រឈមមុខច្បាប់ប្រសិនបើពួកគេធ្វើអ្វីផ្ទុយនឹងច្បាប់នោះ”។
លោក គង់ ស្រ៊ុន អភិបាលស្រុកលំផាត់បានមានប្រសាសន៍ថា មន្ត្រីរបស់លោកតែងតែទទួលបានរបាយការណ៍ពីការកាប់ឈើខុសច្បាប់ពីដែនជម្រកសត្វព្រៃនេះ និងរបាយការណ៍អំពីរថយន្តដឹកឈើចេញនៅពេលយប់ ប៉ុន្តែ កម្រឃើញអ្នកមើលការខុសត្រូវរបស់ដែនជម្រកសត្វព្រៃនេះចាត់វិធានការណាស់។ លោកបានមានប្រសាសន៍ថា “យើងជាអាជ្ញាធរមូលដ្ឋានគ្មានអំណាចក្នុងការរារាំងជនទាំងនោះកុំឲ្យកាប់ឈើក្នុងព្រៃឡើយ ពីព្រោះវាស្ថិតក្រោមការគ្រប់គ្រងរបស់ដែនជម្រកសត្វព្រៃលំផាត់”។ លោកបានបន្ថែមថា “គ្មាននរណាម្នាក់ [មកពីការិយាល័យរបស់ខ្ញុំ] អាចចូលក្នុងព្រៃនេះបានឡើយ ពីព្រោះដែនជម្រកសត្វព្រៃនេះមានកាំភ្លើង”៕សារុន